Kalush Orchestra
Kalush Orchestra | |
|---|---|
| Umumiy maʼlumot | |
| Kelib chiqishi | Kalush, Ukraina |
| Janrlar | |
| Faoliyat yillari | 2021–hozirgacha |
| Leybllar | Universal Music |
| Aʼzolar |
|
Kalush Orchestra — 2021-yilda Kalush guruhining yon loyihasi sifatida tashkil etilgan ukrain folk-hip hop guruhi. Ular ukrain tilida hip-hop taronalarini ijro etishadi. Guruh „Stefania“ qoʻshigʻi bilan Eurovision qoʻshiq tanlovi 2022da Ukraina sharafini himoya qilgan hamda tanlov gʻolibiga aylangan[1]. Bu Ukrainaning tanlovdagi uchinchi gʻalabasi edi. Kalush Orchestra ukrain xalq musiqasi elementlarini zamonaviy prodyuserlik, hip-hop raqslari va ukrain tilidagi rep bilan uygʻunlashtiradi.
Tarixi
Tashkil etilishi
Kalush Orchestra 2021-yilda oltita musiqachidan iborat guruh hamda 2019-yilda asos solingan Kalush rep guruhining loyihasi sifatida tuzilgan. Guruhning nomi Ivano-Frankivsk viloyatidagi Kalush shahri — guruh frontmeni Oleg Psyukning tugʻilib oʻsgan shahri sharafiga qoʻyilgan[2].
Eurovision qoʻshiq tanlovi va keyingi faoliyati
2022-yil 12-fevralda Kalush Orchestra „Stefania“ qoʻshigʻi bilan Eurovision 2022 tanlovida Ukraina nomidan qatnashish uchun milliy saralashda („Vidbir“) ishtirok etdi. Yakunda guruh 14 ball (hakamlardan 6 va tomoshabinlardan 8 ball) toʻplab, ikkinchi oʻrinni egalladi. Tanlovda Alina Pash gʻolib chiqdi, biroq uning Qrimga safari bilan bogʻliq mojarolar tufayli u oʻz nomzodini qaytarib oldi. Natijada Kalush Orchestra guruhiga Ukrainani tanlovda himoya qilish imkoniyati berildi.
14-may kuni boʻlib oʻtgan Eurovision finalida guruh 631 ball bilan gʻolib chiqdi. „Stefania“ tanlov tarixida rep matniga ega boʻlgan birinchi gʻolib qoʻshiq, shuningdek, tomoshabinlar tomonidan eng koʻp ovoz berilgan (439 ball) tarona boʻldi[3]. Keyinchalik guruh Eurovision kubogini (kristall mikrofon) Ukraina armiyasiga yordam berish maqsadida auksionga qoʻydi. Kubok 900 000 dollarga sotildi hamda ushbu mablagʻ Ukraina harbiylari uchun PD-2 jangovar dronlarini sotib olishga sarflandi[4].
Xayriya ishlari
2022-yil 30-mayda Kalush Orchestra va Sergey Pritula Eurovision kubogini xayriya auksionida 900 000 dollarga sotishdi. Bu tanlov tarixida kubokning sotilishi bilan bogʻliq birinchi holat edi. Shuningdek, auksionda guruh solistining pushti panama qalpoqchasi ham sotilib, undan 11 million grivna yigʻildi.
2022-yil avgustidan boshlab Kalush Orchestra „Ukraina madaniyatini saqlab qolaylik“ (Save Ukrainian Culture) loyihasining elchisiga aylandi. Guruh oʻz konsertlarida maxsus QR-kodlar orqali vayron qilingan madaniy obidalarni qayta tiklash uchun mablagʻ yigʻadi. Masalan, guruh Xarkov viloyatidagi Grigoriy Skovoroda muzeyini qayta tiklash uchun 330 ming grivna xayriya qilgan.
Qiziqarli faktlar
- 2022-yil 6-oktabrda guruh aʼzolari Arnold Shvarsenegger bilan uchrashishdi va unga oʻzlarining pushti panama qalpoqchasini sovgʻa qilishdi[5]. Keyinchalik Shvarsenegger guruhning „Shchedriy vechir“ taronasi klipida suratga tushdi.
- 2023-yil 10-aprelda „Ukrposhta“ kompaniyasi Kalush Orchestra tasvirlangan yangi pochta markasini muomalaga chiqardi.
- 2022-yil may oyida Kiyev—Ivano-Frankivsk yoʻnalishidagi poyezdga rasman „Stefania Express“ nomi berildi. Bu dunyoda ona sharafiga nomlangan birinchi poyezddir. Kiyev, Kalush va Ivano-Frankivsk stansiyalarida poyezd „Stefania“ qoʻshigʻi sadosi ostida kutib olinadi.
Aʼzolari
- Oleg Psyuk — asosiy vokal
- Timofey Muzichuk — vokal va cholgʻu asboblari
- Aleksandr „Tab“ Slobodyanik — vokal
- Aleksandr Kondratyuk — vokal va cholgʻu asboblari
- Vitaliy Dujik — cholgʻu asboblari
- MC KYLYMMEN — breakdance
Manbalar
- ↑ „Ukraine: Kalush Orchestra will go to Turin with 'Stefania'“ (en-gb). Eurovision.tv (2022-yil 22-fevral). Qaraldi: 2022-yil 4-mart.
- ↑ „"Stomber Womber" is the first song of the new band KALUSH Orchestra. Watch the clip“. LISTEN - online media about music and everything around it (2021-yil 6-dekabr). 2021-yil 6-dekabrda asl nusxadan arxivlangan. Qaraldi: 2021-yil 6-dekabr.
- ↑ „Ukraine wins Eurovision Song Contest after performance by Kalush Orchestra“. Sky News. Qaraldi: 2022-yil 15-may.
- ↑ Jackson, Patrick „Ukraine war: Eurovision trophy sold to buy drones for Ukraine“. BBC News (2022-yil 31-may). Qaraldi: 2023-yil 16-fevral.
- ↑ Ліпич, Ольга „Арнольд Шварценеггер запросив у гості Kalush Orchestra: ви надихаєте mene. Фото“. OBOZREVATEL NEWS (2022-yil 27-oktyabr). Qaraldi: 2024-yil 6-fevral.