Kontent qismiga oʻtish

Johnny Logan

ZiyoSfera, erkin ensiklopediya
Johnny Logan
Logan 2017-yilda chiqish qilmoqda
Logan 2017-yilda chiqish qilmoqda
Umumiy maʼlumot
Tavalludi Seán Patrick Michael Sherrard
1954-yil 13-may (1954-05-13) (72 yosh)
Frankston Avstraliya
Kelib chiqishi Dublin Irlandiya
Janrlar
Kasbi
  • Qo‘shiqchi
  • musiqachi
Faoliyat yillari 1978–hozirgacha
Veb-sayt johnnylogan.com

Seán Patrick Michael Sherrard (1954-yil 13-mayda tugʻilgan) xalqaro miqyosda Johnny Logan nomi bilan tanilgan, Avstraliyada tugʻilgan irlandiyalik xonanda, qoʻshiqlar muallifi va sozandadir. U Eurovision qoʻshiq tanlovida ikki marta, yaʼni 1980−1987-yillarda gʻolib chiqqanligi bilan tanilgan. Bundan tashqari, u 1992-yilda gʻolib boʻlgan qoʻshiq musiqasini ham bastalagan[1][2].

Logan 1980-yilda sakkizta davlat chartlarida birinchi oʻrinni egallagan „What's Another Year“ qoʻshigʻi bilan Eurovision qoʻshiq tanlovida gʻolib boʻlgan. U 1987-yilda ikkinchi bor „Hold Me Now“ taronasi bilan gʻalaba qozongan. Ushbu qoʻshiq Isroil, Irlandiya va Belgiya chartlarida birinchi oʻringa koʻtarilgan hamda boshqa oʻnta musiqa bozorida kuchli oʻntalikka kirgan. Loreen 2023-yilda ikkinchi marta gʻalaba qozonmaguncha, Logan 36 yil davomida ushbu tanlovda ikki marta gʻolib chiqqan yagona ijrochi boʻlib kelgan[3].

Shuningdek, Logan Linda Martin uchun Eurovision tanlovida ijro etilgan ikkita qoʻshiqni bastalagan. Bular: 1984-yildagi „Terminal 3“ va 1992-yildagi „Why Me?“ taronalaridir. Birinchi qoʻshiq ikkinchi oʻrinni egallagan boʻlsa, ikkinchisi birinchi oʻrinni qoʻlga kiritgan. Shu tariqa, Logan Eurovision tanlovida gʻolib boʻlgan ikkita qoʻshiqni bastalagan dunyodagi besh nafar ijodkordan biriga aylangan[4].

Yoshligi

Johnny Logan, haqiqiy ismi Seán Patrick Michael Sherrard, 1954-yil 13-mayda Frankston shahrida tugʻilgan[5]. Uning otasi Charles Alphonsus Sherrard Derri shahrida tugʻilgan irlandiyalik tenor ovoz sohibi boʻlib, koʻproq Patrick O'Hagan taxallusi bilan tanilgan. Otasi Logan tugʻilgan vaqtda Avstraliyada gastrol safarida boʻlgan[6][7].

Xonandaning oilasi u uch yoshga toʻlganda Irlandiyaga qaytib koʻchib oʻtgan. Logan Dublin grafligidagi Howth shahrida qoʻnim topgan. U yerda gitara chalishni oʻrgangan hamda 13 yoshidan boshlab oʻz qoʻshiqlarini yoza boshlagan. Maktabni tugatgandan soʻng, u pablarda va kabare tomoshalarida qatnashish bilan birga elektrchi shogirdi boʻlib ishlagan. Loganning ilk muvaffaqiyatlaridan biri 1977-yilda Irlandiyaning „Adam and Eve“ muziklida Adam rolini ijro etgani boʻlgan[8]. Keyinchalik u „Joseph and the Amazing Technicolor Dreamcoat“ musiqiy dramasida Joseph rolini ham oʻynagan[9].

Faoliyati

1978–1986-yillar: Eurovisiondagi ilk gʻalaba

Johnny Logan 1980-yilgi Eurovision tanlovida

Logan „Johnny Guitar“ filmining bosh qahramoni sharafiga Johnny Logan taxallusi ostida ijod qila boshlagan. 1978-yilda oʻzining ilk singlini taqdim etgan. U birinchi marta 1979-yilda Eurovision qoʻshiq tanlovida ishtirok etishga urinib koʻrgan. Oʻshanda u Irlandiya milliy finalida „Angie“ qoʻshigʻi bilan uchinchi oʻrinni egallagan[10][11]. Irlandiyaning „The Connaught Telegraph“ gazetasi oʻquvchilari oʻrtasida oʻtkazilgan soʻrovnomada Logan „Eng yaxshi yangi erkak xonanda“ deb topilgan[9].

1980-yilda Logan yana Shay Healy tomonidan yozilgan „What's Another Year“ qoʻshigʻi bilan Eurovision tanlovi uchun Irlandiya milliy saralash bosqichida ishtirok etgan hamda 9-mart kuni Dublin shahrida boʻlib oʻtgan Irlandiya finalida gʻolib chiqqan[12]. Niderlandiyada Irlandiya sharafini himoya qilgan Logan 19-aprel kuni 1980-yilgi Eurovision qoʻshiq tanlovida gʻoliblikni qoʻlga kiritgan[13]. Qoʻshiq butun Yevropa boʻylab hitga aylangan va Buyuk Britaniya chartlarida birinchi oʻringacha koʻtarilgan[14].

Oʻsha yilning iyun oyida „In London“ qoʻshigʻi, koʻp oʻtmay esa „Save Me“ taronasi taqdim etilgan. Radiostansiyalar qaysi birini efirga uzatishda ikkilangani sababli, har ikkala singl ham muvaffaqiyatsizlikka uchragan. 1980-yilning oxirida chiqarilgan Cliff Richardning „Give A Little Bit More“ qoʻshigʻiga ishlangan kaver versiya uning navbatdagi jiddiy harakati boʻlgan, ammo u chartga deyarli kira olmagan. Logan Buyuk Britaniyadagi bunday muvaffaqiyatsizliklarni notoʻgʻri boshqaruv va oʻzining tajribasizligi bilan bogʻlaydi[15].

1983-yilning boshida Logan yangi ovoz yoʻnalishi, qiyofa va reklama kampaniyasi bilan „Becoming Electric“ qoʻshigʻini chiqarib, Buyuk Britaniya sahnasiga qaytishga harakat qilgan, ammo tarona chartlarga kira olmagan. 1985-yilda u oʻzining uchinchi studiyaviy albomi boʻlmish Straight From The Heartni taqdim etgan. Biroq ushbu albom ham chartlarda oʻrin egallay olmagan. Shuningdek, u Bradford City stadionidagi yongʻin qurbonlariga yordam jamgʻarmasi uchun tashkil etilgan loyihada ishtirok etgan hamda chartlarda birinchi oʻrinni egallagan „You'll Never Walk Alone“ xayriya singlini yozishda hamkorlik qilgan[9]. 1986-yilda xonanda oʻz sahna ismini Logan deb oʻzgartirib, „Stab in the Back“ qoʻshigʻini taqdim etgan boʻlsa-da, bu tarona ham chartlarda muvaffaqiyat qozonmagan.

1987–1991-yillar: Eurovisiondagi ikkinchi gʻalaba

1987-yilda Logan oʻzi yozgan „Hold Me Now“ qoʻshigʻi bilan Eurovision tanlovida yana bir bor Irlandiya sharafini himoya qilgan. Qoʻshiq tanlovda gʻolib boʻlgan hamda Logan ushbu tanlovda ikki marta gʻolib chiqqan birinchi ijrochiga aylangan. „Hold Me Now“ butun Yevropada katta hitga aylangan va Buyuk Britaniyada ikkinchi oʻrinni egallagan[16][17].

Keyinchalik u Paul Hardcastle prodyuserligida 10cc guruhining „I'm Not in Love“ qoʻshigʻiga ishlangan kaver versiyani hamda Hold Me Now albomini chiqargan. 1988-yilda Logan „Heartland“ qoʻshigʻini taqdim etgan. Ushbu tarona Irlandiya chartlarida hitga aylangan va u oʻz eʼtiborini Irlandiya hamda Yevropadagi faoliyatiga qaratgan[18].

1990-yilda Logan Elvis Presleyning The Jordanaires joʻrnavoz guruhi bilan birgalikda „Miss You Nights“ qoʻshigʻining kantri janridagi versiyasini yozgan[9]. Shuningdek, u Germaniyaning „Blue Blood“ telekoʻrsatuvi uchun „Angels Donʼt Hide“ deb nomlangan saundtrekni yozgan va uni oʻzi kuylagan[9].

Manbalar

  1. ↑ „Johnny Logan Interview“. The Baltics Today.
  2. ↑ „Eurovision Song Contest 1992“. Eurovision Song Contest — Belgrade 2008.
  3. ↑ „Eurovision: Sweden's Loreen wins again, but UK's Mae Muller is second from last“ (en-GB). BBC News (2023-yil 13-may). Qaraldi: 2023-yil 15-may.
  4. ↑ „Eurovision Song Contest 1984“. Eurovision Song Contest. 2011-yil 5-iyunda asl nusxadan arxivlangan. Qaraldi: 2014-yil 3-may.
  5. ↑ Thompson, Dave „Johnny Logan“. allmusic. 2020-yil 2-oktyabrda asl nusxadan arxivlangan. Qaraldi: 2020-yil 16-may.
  6. ↑ Barrett, Peter „Australia-born singer-songwriter Johnny Logan won Eurovision Song Contest in 1980, 1987 and 1992“ (en). The Sydney Morning Herald (2015-yil 21-may). 2020-yil 6-fevralda asl nusxadan arxivlangan. Qaraldi: 2020-yil 20-yanvar.
  7. ↑ „O'Hagan, Patrick, 1924-1993“. National Library of New Zealand. Qaraldi: 2020-yil 16-may.
  8. ↑ „Johnny Logan profile“. Irish-showbands.com. 2018-yil 5-aprelda asl nusxadan arxivlangan. Qaraldi: 2012-yil 2-fevral.
  9. ↑ 9,0 9,1 9,2 9,3 9,4 „Biography“. Johnny Logan. 2019-yil 14-mayda asl nusxadan arxivlangan. Qaraldi: 2018-yil 18-may.
  10. ↑ „Johnny Logan“. Irish-showbands.com. 2012-yil 25-fevralda asl nusxadan arxivlangan. Qaraldi: 2012-yil 2-fevral.
  11. ↑ „IRISH NATIONAL FINAL 1979“ (2009-yil 26-oktyabr). 2009-yil 26-oktyabrda asl nusxadan arxivlangan. Qaraldi: 2012-yil 2-fevral.
  12. ↑ „IRISH NATIONAL FINAL 1980“ (2009-yil 26-oktyabr). 2009-yil 26-oktyabrda asl nusxadan arxivlangan. Qaraldi: 2012-yil 2-fevral.
  13. ↑ „Eurovision Song Contest 1980“. Eurovision Song Contest — Belgrade 2008.
  14. ↑ „Johnny Logan – What's Another Year?“. Official Charts Company (1980-yil 21-iyun). 2015-yil 4-aprelda asl nusxadan arxivlangan. Qaraldi: 2012-yil 2-fevral.
  15. ↑ Why Me? (1992 documentary), RTÉ Television
  16. ↑ „Eurovision Song Contest 1987“. Eurovision Song Contest: Belgrade 2008.
  17. ↑ „Johnny Logan – Hold Me Now“. Official Charts Company (1987-yil 23-may). 2015-yil 20-martda asl nusxadan arxivlangan. Qaraldi: 2012-yil 2-fevral.
  18. ↑ Jaclyn Ward. „The Irish Charts – All there is to know“. Irishcharts.ie. 2009-yil 2-iyunda asl nusxadan arxivlangan. Qaraldi: 2012-yil 2-fevral. 
"https://ziyosfera.uz/index.php?title=Johnny_Logan&oldid=524726" dan olindi