Stefania (qoʻshiq)
| „Stefania“ | |
|---|---|
| Kalush Orchestra singli | |
| Chiqarilgan sanasi | 7-fevral 2022-yil |
| Janr | |
| Davomiyligi | 2:59 |
| Leybl | Sony Music Entertainment |
| Qoʻshiq muallif(lar)i | |
| Bastakor(lar) |
|
„Stefania“ (ukraincha: Stefanіya; talaffuzi: Stefaniya) — ukrain folk-rep guruhi Kalush Orchestra tomonidan ijro etilgan qoʻshiq. U guruhning barcha aʼzolari hamda Ivan Klymenko tomonidan yozilgan va Sony Music Entertainment leybli orqali chiqarilgan. Ushbu tarona Italiyaning Turin shahrida boʻlib oʻtgan Eurovision qoʻshiq tanlovi 2022da Ukraina sharafini himoya qilgan hamda gʻoliblikni qoʻlga kiritgan.
„Stefania“ muqobil hip hop va folk yoʻnalishidagi qoʻshiq deb taʼriflanadi. Bu Ukrainani Eurovisionda toʻliq ukrain tilida ifodalagan uchinchi qoʻshiq boʻldi. Tarona tanlovda 631 ball toʻplab, gʻoliblikni qoʻlga kiritdi. Bu Eurovision tarixida gʻalaba qozongan birinchi rep yoʻnalishidagi hamda toʻliq ukrain tilida kuylangan birinchi qoʻshiqdir. „Stefania“ 22 ta mamlakat musiqa chartlariga kirdi, Ukraina va Litva chartlarida birinchi oʻrinni, Finlandiya, Xorvatiya, Islandiya, Vengriya va Shvetsiyada esa kuchli oʻnlikni egalladi.
Yaralish tarixi
Konsepsiyasi
„Stefania“ Kalush Orchestra guruhining barcha aʼzolari hamda Ivan Klymenko tomonidan hamkorlikda yozilgan. Qoʻshiq onaga bagʻishlangan qasidaga oʻxshaydi, unda lirik qahramon oʻz onasi haqidagi shirin xotiralarini soʻzlab beradi. Qoʻshiq onaning yoshi oʻtgani haqidagi gaplar bilan boshlanadi va lirik qahramonning oʻz onasi u uchun qilgan barcha ishlari uchun minnatdorchiligi bilan davom etadi. Har bir rep kupletining oxiridagi „alla“ qismlari qahramonni onasi unga gʻamxoʻrlik qilgan bolalik yillariga qaytaradi[1]. Qoʻshiq guruh frontmeni Oleh Psiukning onasiga bagʻishlangan boʻlib, uning ismi ham Stefaniyadir. Qoʻshiqda ikkita anʼanaviy ukrain damli cholgʻu asboblari hisoblangan sopilka va telenkadan foydalanilgan.
Vidbir 2022
„Stefania“ Ukrainaning Eurovision 2022 uchun vakilini aniqlash maqsadida tashkil etilgan „Vidbir 2022“ milliy saralash tanlovida ishtirok etdi. Tanlovning final bosqichi 2022-yil 12-fevralda boʻlib oʻtdi. „Stefania“ hakamlar hayʼati tomonidan 7 ball (uchinchi oʻrin) va tomoshabinlar tomonidan 8 ball (birinchi oʻrin) toʻplab, umumiy hisobda ikkinchi oʻrinni egalladi. Tanlovda Alina Pash gʻolib chiqdi, biroq keyinchalik uning Qrimga kirish qoidalari bilan bogʻliq muammolar tufayli gʻoliblik bekor qilindi. Natijada, 2022-yil 22-fevralda Kalush Orchestra va „Stefania“ qoʻshigʻi Ukraina vakili sifatida tasdiqlandi.
Guruh ushbu qarorni qabul qilganidan ikki kun oʻtgach, Rossiya Ukrainaga keng koʻlamli bosqinni boshladi. Shundan soʻng „Stefania“ ijtimoiy tarmoqlarda urush davrining eng mashhur qoʻshiqlaridan biriga aylandi[2].
Eurovision qoʻshiq tanlovi
Turinda
2022-yil 10-mayda Turin shahridagi „PalaOlimpico“ arenasida Eurovisionning birinchi yarim finali boʻlib oʻtdi. Kalush Orchestra oʻn yetti ishtirokchi ichida oltinchi boʻlib chiqish qildi va 337 ball bilan birinchi oʻrinni egallab, finalga yoʻllanma oldi.
14-may kuni boʻlib oʻtgan finalda guruh 12-boʻlib sahnaga chiqdi. Hakamlar ovoz berish natijalariga koʻra, qoʻshiq 192 ball bilan toʻrtinchi oʻrinni egalladi. Biroq, tomoshabinlar ovoz berish jarayonida „Stefania“ 439 ball toʻpladi — bu tanlov tarixidagi rekord natija hisoblanadi. Umumiy 631 ball bilan Kalush Orchestra tanlov gʻolibiga aylandi[3].
Tanlovdan soʻng
Eurovisiondagi gʻalabadan soʻng, Kalush Orchestra xayriya konsertlari va auksionlar orqali Ukraina armiyasini qoʻllab-quvvatlash uchun 54 million grivna yigʻdi. Guruh butun Yevropa va Shimoliy Amerika boʻylab gastrol safarlarida boʻlib, toʻplangan mablagʻlarni urushdan jabr koʻrganlarga yordam berishga yoʻnaltirdi.
2023-yilgi Eurovision tanlovi Ukrainadagi urush tufayli Buyuk Britaniyaning Liverpul shahrida oʻtkazildi. Tanlovning finalini Kalush Orchestra „Stefania“ va oʻzining yangi „Changes“ taronasi bilan ochib berdi.
Musiqiy video
Qoʻshiq uchun ishlangan rasmiy musiqiy video 2022-yil 15-mayda, guruh tanlovda gʻolib chiqqanidan soʻng koʻp oʻtmay eʼlon qilindi. Video rejissyor Maks Ksyonda tomonidan Bucha, Irpen, Borodyanka va Gostomel kabi urushdan qattiq shikastlangan shaharlarda suratga olingan. Videoda harbiy kiyimdagi ayollar yongʻin ichida qolgan va bombardimon qilingan binolardan bolalarni olib chiqib, onalariga qaytarayotgani tasvirlangan[4].
Tijoriy muvaffaqiyati
„Stefania“ koʻplab musiqa bozorlarida muvaffaqiyat qozondi. Qoʻshiq Ukraina va Litva chartlarida birinchi oʻrinni egalladi. Shuningdek, u Avstriya, Belgiya, Germaniya, Irlandiya, Italiya, Norvegiya, Portugaliya, Shvetsiya va Shveysariya chartlarida yuqori oʻrinlarni band etdi.
Chartlar
Haftalik chartlar
| Chart (2022) | Eng yuqori oʻrin |
|---|---|
| Ukraina (Tophit) | 1 |
| Litva (AGATA) | 1 |
| Finlandiya (Suomen virallinen lista) | 2 |
| Vengriya (Mahasz) | 5 |
| Xorvatiya (Billboard) | 6 |
| Islandiya (Plötutíðindi) | 7 |
| Shvetsiya (Sverigetopplistan) | 7 |
| Shveysariya (Schweizer Hitparade) | 11 |
| Germaniya (Official German Charts) | 22 |
| Birlashgan Qirollik (UK Singles Chart) | 38 |
Manbalar
- ↑ Ten Veen, Renske „"She rocked me; gave me rhythm" – Kalush Orchestra bring an ode to mothers in "Stefania" lyrics“ (en-US). wiwibloggs (2022-yil 10-fevral). Qaraldi: 2022-yil 26-fevral.
- ↑ „Eurovision winners release powerful official film clip shot in war-torn Ukraine“. ABC News (2022-yil 17-may). Qaraldi: 2022-yil 27-oktyabr.
- ↑ „Ukraine wins Eurovision Song Contest 2022“. Eurovisionworld (2022-yil 15-may).
- ↑ Richards, Will „Ukraine's Kalush Orchestra share powerful video for Eurovision-winning song 'Stefania'“ (en-GB). NME (2022-yil 15-may). Qaraldi: 2022-yil 6-avgust.