Zafar gaz kondensati koni

Zafar gaz kondensati koni - Qashqadaryo viloyatining Gʻuzor tumanida, Qarshi shahridan 45 km janubiy sharqda joylashgan. Zafar strukturasi 1974-yilda seysmik razvedka natijasida aniklangan. 1978-yilda birinchi parametrik quduq kavlangan (3805 m). 1978—87-yillarda konda 8 ta burgʻi qudugʻi qazilgan,. Quduqlarning 3 tasida gaz uyumi borligi aniqlangan. Zafar gaz kondensati konining geologik tuzilishida yura, boʻr, paleogen, neogen va antropogen yotkiziklari ishtirok etgan. Tektonik jihatdan Zafar strukturasi Beshkent bukilmasida joylashgan va yura yotqizikdari boʻylab shimoliy-sharq tomonga yoʻnalgan. Strukturaning uzunligi 6 km, kengligi 5 km. Zafar konida kavlangan quduqlarda 39 ta obyekti sinovdan oʻtdi. Ularning 12 tasida gaz va bittasida gaz bilan neft borligi maʼlum boʻldi. Gazning debiti 67 ming m3/sut dan 575 ming m3/sut gacha. Gazning havoga nisbatan zichligi 0,643, kondensatniki 0,756 g/sm3, undagi metanning miqdori 90—92%, oltingugurt vodorodi 0,05%, azot 1,2%, karbonat angidridi 3—5%. Konda razvedka ishlari nihoyasiga yetgan. 3 ta gaz quduqlari ayni paytda oʻzlashtirishga tayyorlangan.