Oʻzbekiston bolalar tashkiloti
 | |
| Turi | Jamoat tashkiloti |
|---|---|
| Maqomi | Amalda |
| Shiori | Vatan, doʻstlik va baxtli bolalik uchun |
| Maqsadi | Bolalarning boʻsh vaqtlarini mazmunli tashkil etish |
| Ishga tushgan sanasi | 2024-yil 16-aprel |
| Joylashuvi | Toshkent shahri |
| Hududiy xizmati |
 Oʻzbekiston |
| Rais | Xasanboy Nabiyev |
| Aʼzolari | 369 487 |
| Til(lar)i | oʻzbekcha |
Oʻzbekiston bolalar tashkiloti – Oʻzbekiston Respublikasidagi 18 yoshgacha boʻlgan bolalarni Vatanga muhabbat, intellektual, ijodiy, jismoniy va maʼnaviy jihatdan shakllanishiga koʻmaklashish maqsadida faoliyat yuritadigan jamoat tashkiloti[1]. Tashkilot Oʻzbekistondagi eng yirik maktab oʻquvchilari birlashmasi hisoblanib, ixtiyoriy ravishda koʻngillilar (sardorlar) turli ijtimoiy loyihalar tashkil etishi orqali faoliyatini olib boradi. Tashkilotning umumiy aʼzolari soni 369 ming 487 nafarni tashkil etadi[2]. Tashkilotning boshqaruv kengashi raisi – Xasanboy Nabiyev[3].
Tarixi
Tashkilot 2001—2024-yillarda „Kamalak“ bolalar tashkiloti sifatida faoliyat yuritgan[4]. 2023-yilning 15-dekabr kunida Oʻzbekiston Respublikasi Prezidenti Shavkat Mirziyoyevga Oʻzbekiston bolalar tashkiloti tuzish taklifi bildirilgan, davlat rahbari ushbu taklifni qoʻllab-quvvatlagan[5][6]. 2024-yilning 16-aprel kunida Oʻzbekiston Respublikasi Adliya vazirligi tomonidan bolalar tashkiloti davlat roʻyxatidan oʻtkazilgan[7].
Maqsadi
Tashkilotning ustaviga muvofiq, tashkilotning asosiy maqsadi bolalarni Vatanga muhabbat, intellektual, ijodiy, jismoniy hamda maʼnaviy jihatdan shakllanishi hamda rivojlanishi, ularning taʼlim olish va dam olishiga boʻlgan huquqlarini roʻyobga chiqarish uchun zarur shart-sharoitlarni yaratish, bolalarni sadoqat, milliy va umuminsoniy qadriyatlarga, ota-ona, oila va atrofdagilarga hurmat ruhida tarbiyalash, ularda daxldorlik, mehr-saxovat kabi fazilatlarni rivojlantirish, iqtidor va qobiliyatlarini yuzaga chiqarishga qaratilgan ishlarni tashkil etish hisoblanadi.
Aʼzolik
Tashkilotga 10 yoshdan 18 yoshgacha boʻlgan Oʻzbekiston Respublikasi fuqarolari, chet el fuqarolari hamda Oʻzbekiston Respublikasida istiqomat qiluvchi fuqaroligi boʻlmagan shaxslar aʼzo boʻlishlari mumkin.
Bolalar harakati
Tashkilotning eng yirik tuzilmasi bu faol maktab oʻquvchilaridan tarkib topgan „Bolalar harakati“ sardorlari hisoblanadi. Ushbu harakat 2024—2025-oʻquv yillaridan boshlab faoliyatini boshlagan. Mamlakatdagi barcha umumiy oʻrta taʼlim hamda ixtisoslashtirilgan maktablarda harakatning 14 ta yoʻnalishi boʻyicha sardorlar faoliyat olib boradi. Bosh sardor, „Qizlar akademiyasi“, „Ibrat farzandlari“, „Zakovat“, „Mutolaa“, „Ustoz AI“, „Fitrat Media“, „Yashil makon“, „UzChess“, „Vatan tayanchi“, „Sanʼat“, „Iqtidor“, „Imkon“, „Choʻlpon izdoshlari“ yoʻnalishlarida faol sardorlar turli ijtimoiy loyihalarni amalga oshiradilar. Har oʻquv yilining sentyabr-oktyabr oylarida taʼlim muassalarida harakatning maktab bosqichlari amalga oshiriladi. Teng ravishda, tuman(shahar), hududiy hamda Respublika miqyosida ham saylovlar amalga oshiriladi[8].
Loyihalari
Tashkilot tomonidan loyihalar Boshqaruv kengashi hamda uning hududiy boʻlimlari tomonidan sardorlar ishtirokida tashkil qilinadi.
Anʼanaviy anjuman
Bolalar tashkilotining „Vatan, doʻstlik va baxtli bolalik uchun“ shiori ostidagi anʼanaviy anjumanlari har oʻquv yilining soʻngida faol tashkilot aʼzolari ishtirokida amalga oshiriladi. Hozirgi kungacha 24 marotaba anjumanlar tashkil etilgan hamda bir qancha madaniy-maʼnaviy loyihalar tashkil etilgan[9]. Anjuman doirasida „Eng namunali „Bolalar harakati“ sardorlari“ tanlovi, „Xalqlar doʻstligi kuni“ festivali, „Zakovat“ intellektual oʻyini hamda „Quvnoqlar va zukkolar“ kabi musobaqalari tashkil qilinadi.
Iqtidorli bolalar shou
„Iqtidorli bolalar shou“ loyihasi bolalar tashkilotining yubiley sanalari munosabati bilan tashkil qilinadi. 2025-yilning aprel oyida tashkilotning 1 yilligi munosabati bilan, Yoshlar ishlari agentligi bilan hamkorlikda loyihaning 1-mavsumi tashkil etilgan. Loyihada Oʻzbekistonning barcha hududlardan ishtirokchilar rassomchilik, taʼlim, sanʼat va madaniyat, xorijiy tillar hamda texnologiya yoʻnalishlaridagi yutuqlari, erishgan muvaffaqiyatlari bilan ishtirok etgan[10].
Rahbar va bolalar
„Rahbar va bolalar“ loyihasi tashkilot aʼzolarining davlat boshqaruvi sohasidagi rahbarlar bilan muloqot shaklida tashkil etiladi. Hozirgi paytgacha bir necha bor poytaxtda hamda hududlarda tashkil qilingan. 2024-yilning 23-may kuni tashkilotning 1-bolalar forumi doirasida Oliy taʼlim, fan va innovatsiyalar vaziri Kongratbay Sharipov, Raqamli texnologiyalar vaziri Sherzod Shermatov, Oliy Majlis Qonunchilik palatasining Bola huquqlari boʻyicha vakili, Bolalar ombudsmani Surayyo Rahmonova ishtirokida amalga oshirilgan[11]. 2024-yilning dekabr oyida „Bolalar harakati“ sardorlar saylovining Respublika bosqichi doirasida „Senator va bolalar“ loyihasi oʻtkazilgan. Uchrashuvda Senatning Yoshlar, xotin-qizlar, madaniyat va sport masalalari qoʻmitasi raisi Orzigul Kozixonova, senator Malika Qodirxonovalar bolalar bilan muloqot qilgan[12][13].
Iqtidorli avlod
„Iqtidorli avlod“ loyihasi maktab oʻquvchilarining yozgi taʼtil mobaynida boʻsh vaqtlarini mazmunli tashkil etishga qaratilgan loyiha boʻlib, taʼlim muassasalarida, mahalla markazlarida, istirohat bogʻlarida hamda yozgi bolalarni sogʻlomlashtirish oromgohlarida tashkil etiladi. 2025-yilgi loyihalar „Dolzarb 90 kun“ loyihasi doirasida tashkil etilgan.
Faoliyati
Tashkilot oʻz faoliyatini Oʻzbekiston Respublikasi Konstitutsiyasi, Oʻzbekiston Respublikasining „Nodavlat notijorat tashkilotlari toʻgʻrisida“gi qonuni, „Bola huquqlari toʻgʻrisida“gi Konvensiya, „Bola huquqlari kafolatlari toʻgʻrisida“gi qonuni hamda nodavlat notijorat tashkiloti faoliyatini tartibga soladigan boshqa normativ-huquqiy hujjatlar asosida hamda tashkilotning ustaviga muvofiq faoliyatini yuritadi.
Hamkorlari
Tashkilot oʻz faoliyati davomida Oʻzbekiston mahallalari uyushmasi, Yoshlar ishlari agentligi, O‘zbekiston Respublikasi Maktabgacha va maktab ta’limi vazirligi hamda Oʻzbekiston Maʼnaviyat va maʼrifat markazi bilan hamkorlikni amalga oshiradi.
Yana qarang
Manbalar
- ↑ „Adliya vazirligi tomonidan O‘zbekiston bolalar tashkiloti nodavlat notijorat tashkiloti davlat ro‘yxatidan o‘tkazildi.“. adliya.uz. Qaraldi: 1-avgust 2025-yil.
- ↑ „“Bolalar harakati” sardorlar saylovi final bosqichi yakunlandi“. gov.uz. Qaraldi: 1-avgust 2025-yil.
- ↑ „“Senator va bolalar” uchrashuvi“. gov.uz. Qaraldi: 1-avgust 2025-yil.
- ↑ „Bolalar tashkiloti tuziladi“. platina.uz. Qaraldi: 1-avgust 2025-yil.
- ↑ „Ёшлар билан ишлаш тизими бўйича ахборот берилди“. President.uz. Qaraldi: 1-avgust 2025-yil.
- ↑ „O‘zbekistonda bolalar tashkilotini tuzish taklif etilmoqda“. gazeta.uz. Qaraldi: 1-avgust 2025-yil.
- ↑ „Adliya vazirligi tomonidan O‘zbekiston bolalar tashkiloti nodavlat notijorat tashkiloti davlat ro‘yxatidan o‘tkazildi.“. adliya.uz. Qaraldi: 1-avgust 2025-yil.
- ↑ „“Bolalar harakati” sardorlar saylovi final bosqichi yakunlandi“. gov.uz. Qaraldi: 1-avgust 2025-yil.
- ↑ „Oʻzbekiston bolalar tashkilotining 24-anʼanaviy anjumani: Bolalarning tashabbuskorligi va yetakchilik salohiyatining yorqin namoyoni“. Yangi O'zbekiston. yuz.uz. Qaraldi: 1-avgust 2025-yil.
- ↑ „“Iqtidorli bolalar shou” loyihasi“. O'zbekiston Respublikasi Hukumati portali. gov.uz. Qaraldi: 1-avgust 2025-yil.
- ↑ „Vazir Bolalar forumi doirasida tashkil etilgan “Rahbar va bolalar” uchrashuvida qatnashdi“. O'zbekiston Respublikasi Hukumati portali. gov.uz. Qaraldi: 1-avgust 2025-yil.
- ↑ „Senatda “Bolalar harakati” sardorlari bilan uchrashuv bo‘lib o‘tdi“. O'zbekiston Respublikasi Oliy Majlisi Senati. senat.uz. Qaraldi: 1-avgust 2025-yil.
- ↑ „“Senator va bolalar” uchrashuvi“. gov.uz. Qaraldi: 1-avgust 2025-yil.