Yodgora Ziyomuhamedova
- Ziyosferada ismi Yodgora va familiyasi Ziyomuhamedova boʻlgan boshqa kishilar haqida ham maqolalar mavjud.
| Yodgora Ziyomuhamedova | |
|---|---|
| Tavalludi |
23-aprel 1952-yil |
| Vafoti | sentabr 2026-yil (74 yoshda) |
| Fuqaroligi |
 Oʻzbekiston |
| Kasbi | Teatr, kino va dublyaj aktrisasi, teleboshlovchi |
| Faoliyat yillari | 1974–2026 |
| Mukofotlari | Oʻzbekistonda xizmat koʻrsatgan artist |
Yodgora Ziyomuhamedova (boshqa yozilishlari: Ziyomuhammedova, Ziyamuhamedova; 23-aprel 1952-yil, Toshkent — sentabr 2026-yil) – oʻzbek teatr, kino va dublyaj aktrisasi, teleboshlovchi, Oʻzbekistonda xizmat koʻrsatgan artist[1]. U 34 yildan ortiq Oʻzbekiston davlat yosh tomoshabinlar teatrida ishlab, sahnada 100 ga yaqin obraz yaratgan. Bolalar uchun moʻljallangan „Oqshom ertaklari“ koʻrsatuvini 25 yil davomida olib borgan[2].
Hayoti
Yodgora Ziyomuhamedova 1952-yil 23-aprelda Toshkentda tugʻilgan. U oiladagi uch qizning eng kenjasi boʻlgan[3]. Bolaligida qoʻshnisi, taniqli dublyaj aktrisasi Mukambar Rahimova undagi isteʼdodni payqab, uni dublyajga olib borgan. Shu tariqa uning sanʼatdagi faoliyati dublyajdan boshlangan[3]. Maktabni tugatgach, Toshkent teatr va rassomlik sanʼati institutida tahsil olgan[3].
Aktrisa hamkasbi, Yosh tomoshabinlar teatri aktyori Shuhrat Ziyomuhammedov bilan oila qurgan. Turmush oʻrtogʻi undan oldin vafot etgan[3]. Ularning ikki qiz va bir oʻgʻil farzandi bor. Egizak qizlari Fotima va Zuhra 1977-yil may oyida tugʻilgan. Ular „Tantana“ bolalar ashula va raqs ansamblida rahbarlik lavozimida ishlaydi[4]. Oʻgʻli Tohir Ziyomuhammedov Yoshlar telekanalida rejissyor boʻlib ishlagan[3].
Ijodiy faoliyati
Teatr
Oliygohni tamomlagach, 1974-yildan Oʻzbekiston davlat yosh tomoshabinlar teatrida ish boshlagan[3]. Teatrda 34 yildan ortiq ijod qilib, sahnada 100 ga yaqin turli obrazlarni yaratgan[1]. U teatrdagi „travesti“ ampluasida, yaʼni yosh bola rollarini ijro etishga ixtisoslashgan yoʻnalishda ishlagan va matbuotda Oʻzbekistondagi bu ampluaning yagona aktrisasi sifatida tilga olingan[5].
| Spektakl | Rol |
|---|---|
| Qizil shapkacha | Qizil shapka |
| Zumrad va Qimmat | Qimmat |
| Farzandim jigarbandim | Sanobar |
| Sening taqdiring | Nazira |
| Yarash-yarash | Pokiza |
| Burgut | Gulnur |
| Birinchi muallim | Oltinoy |
Televideniye va dublyaj
Aktrisa keng tomoshabinlarga, avvalo, bolalar uchun „Oqshom ertaklari“ koʻrsatuvining boshlovchisi sifatida tanilgan va uni 25 yil davomida olib borgan[2]. Shuningdek, u oʻnlab film va seriallarda suratga tushgan, dublyajda yuzlab kino va multfilm qahramonlariga ovoz bergan[3]. Uning dublyajdagi ovozi va bolalar uchun yaratgan obrazlari yosh tomoshabinlar orasida katta mehr qozongan[5].
Uzoq yillik ijodiy faoliyati uchun „Oʻzbekistonda xizmat koʻrsatgan artist“ faxriy unvoni bilan taqdirlangan[1].
Vafoti
Yodgora Ziyomuhamedova 2026-yil sentabrda 74 yoshida vafot etdi. Bu haqda 18-sentabrga oʻtar kechasi Madaniyat vazirligi va Kinoarboblar ijodiy uyushmasi axborot xizmatlari xabar berdi[1]. Madaniyat vazirligi aktrisaning milliy sanʼat rivojiga qoʻshgan hissasi va ijodiy merosi xalq xotirasida saqlanib qolishini taʼkidladi[2].
Manbalar
- ↑ 1,0 1,1 1,2 1,3 1,4 „Aktrisa Yodgora Ziyamuhamedova 74 yoshida vafot etdi“ (Uzbek). Gazeta.uz (18-sentabr 2026-yil). Qaraldi: 18-sentabr 2026-yil.
- ↑ 2,0 2,1 2,2 2,3 „Yodgora Ziyomuhamedova 74 yoshida vafot etdi“ (Uzbek). Anhor.uz (18-sentabr 2026-yil). Qaraldi: 18-sentabr 2026-yil.
- ↑ 3,0 3,1 3,2 3,3 3,4 3,5 3,6 „Yodgora Ziyomuhammedova biografiyasi“ (Uzbek). Nozim-Studio.com (9-avgust 2020-yil). Qaraldi: 18-sentabr 2026-yil.
- ↑ „Egizak farzandlarni tarbiyalayotgan oʻzbek shou-biznesi vakillari“ (Uzbek). Daryo (8-noyabr 2023-yil). Qaraldi: 18-sentabr 2026-yil.
- ↑ 5,0 5,1 „Yodgora Ziyomuhammedova: bolaning qalbida bolalik yashasin!“ (Uzbek). Yangi Oʻzbekiston (1-iyun 2021-yil). Qaraldi: 18-sentabr 2026-yil.
Havolalar
- Yodgora Ziyomuhammedova bilan intervyu — Yashin TV, 2021-yil