Kontent qismiga oʻtish

Xushnud Xudayberdiyev

ZiyoSfera, erkin ensiklopediya
Xudoyberdiyev Xushnud Gʻayratovich
Oʻzbekiston milliy axborot agentligi bosh direktorining birinchi o‘rinbosari
Mansab davri
2023-yil 7-avgustdan – hozirgi vaqtgacha
Oʻtmishdoshi Jumanazar Meliqulov
Milliy mass-mediani qoʻllab-quvvatlash va rivojlantirish jamoat fondi direktori
Mansab davri
2019-yil 10-oktyabrdan – 2020-yil 30-iyungacha
Oʻtmishdoshi lavozim taʼsis etilgan
Vorisi Aleksandra Kolesnichenko
Shaxsiy maʼlumotlari
Tavalludi 1989-yil 7-iyun (1989-06-07) (37 yosh)
Chiroqchi tumani, Qashqadaryo viloyati
Fuqaroligi Oʻzbekiston bayrogʻi Oʻzbekiston
Millati oʻzbek
Turmush oʻrtogʻi Mehrinoz Abbosova
Bolalari 1ta
Maʼlumoti Toshkent davlat yuridik universiteti
Mukofotlari
Unvoni 2-darajali yurist
Oʻzbekiston Respublikasi Prezidenti Shavkat Mirziyoyev hamda blogerlar selfisi. Registon maydoni. Samarqand. 26.08.2019 y.
Xushnud Xudoyberdiyev, Diyor Imomxoʻjayev va Muhrim Aʼzamxoʻjayev

Xushnud Gʻayratovich Xudoyberdiyev — oʻzbekistonlik huquqshunos, davlat va jamoat arbobi, bloger. Zakovat intellektual klubi bilimdonlaridan biri[1][2].

Biografiyasi

1989-yil 7-iyunda Qashqadaryo viloyatining Chiroqchi tumanida ziyoli oilada tugʻilgan. Millati — oʻzbek.

5 yoshligida Chiroqchi tumanidagi Habib Abdullayev nomidagi 3-oʻrta taʼlim maktabiga 1-sinfga oʻqishga borgan. 2003-yilda Chiroqchi tumanidagi 2-ixtisoslashgan litseyning 9-sinfini tamomlab, Toshkent davlat yuridik universiteti qoshidagi Akademik litseyda oʻqishni davom ettirgan. 2006-yilda Toshkent davlat yuridik universiteti bakalavr bosqichiga shartnoma asosida qabul qilingan.

2010-yilda yuridik institutni imtiyozli diplom bilan tamomlagan. 2010-yili Toshkent davlat yuridik universiteti magistratura boʻlimi „Jinoyat protsessi; kriminalistika va tezkor qidiruv huquqi; sud ekspertizasi“ yoʻnalishi magistranti boʻlgan. 2012-yilda magistratura boʻlimini muvaffaqiyatli tamomlagan.

2010—2013-yillarda Toshkent davlat yuridik universitetida oʻqituvchi boʻlgan.

2013—2017-yillarda Oʻzbekiston kasaba uyushmalari federatsiyasi kengashi yuridik boʻlimi yuristkonsulti boʻlgan. Bir vaqtning oʻzida Oʻzbekiston Respublikasi Bosh prokuraturasining matbuot xizmati bosh mutaxassisi lavozimida xizmat qilgan[1].

2020-yil 28-yanvardan 1-iyulgacha Milliy mass-mediani qoʻllab-quvvatlash va rivojlantirish jamoat fondi direktori sifatida faoliyat olib bordi[3].

2019-yil 26-dekabrda Respublika Oliy taʼlim kengashi aʼzosi etib tayinlangan[4].

2020-yil 1-iyulda Oʻzbekiston milliy axborot agentligi direktorining oʻrinbosari etib tayinlangan[5].

2023-yil 7-avgustda Oʻzbekiston milliy axborot agentligi bosh direktori Abdusaid Koʻchimovga birinchi oʻrinbosar etib tayinlandi[2].

Loyihalari va ijtimoiy faoliyati

2011-yilda Muhrim Aʼzamxoʻjayev, Diyor Imomxoʻjayev va Qahramon Aslanov bilan birgalikda kun.uz internet-nashriga asos solgan.

2012-yildan buyon „Xushnudbek.uz“ shaxsiy saytini yuritadi.

2018-yil may oyida Telegram messenjerida kanal ochgan, ayni paytda obunachilari soni 600 mingdan oshadi[6].

2004-yildan buyon Zakovat intellektual klubining aʼzosi va muntazam efir oʻyinlarida ishtirok etib keladi. Efir orqali ilk marta 2005-yil iyun oyida oʻyinlarda ishtirok etgan. Faoliyati davomida 9 marta Oliy liga finalida ishtirok etib, ulardan 4 tasida jamoasi bilan chempion boʻlgan.

Toʻrt karra Zakovat oʻyinlari chempioni (2007, 2009, 2011, 2016-yillar); 2008, 2010, 2012, 2015 va 2018-yillarda Oliy liga oʻyinlari finalchisi; 2008 hamda 2012-yilgi Oliy liga final oʻyinidagi „Zakovat terma jamoasi“ aʼzosi; 2008-yilda „Yilning eng yaxshi yosh bilimdoni“ nominatsiyasi sohibi; 2011-yilda „Yilning eng faol bilimdoni“ nominatsiyasi sohibi; 2013-yilda „Tomoshabinlar mehrini qozongan bilimdon“ nominatsiyasi sohibi boʻlgan[7].

2023-yildan buyon Qobil Xidirov, Otabek Bakirov, Laziz Hamidov va Muhrim Aʼzamxoʻjayev bilan birgalikda „Lolazor“ podkastini yuritadi.

Mukofotlari

2014-yili „Oltin qalam“ Milliy mukofotining „Jurnalistikada ijtimoiy masalalarni yoritishda innovatsion yechim va yondashuvlar“ nominatsiyasi sovrindori[8], „MIT.UZ — Milliy internet festivali“da „Eng yaxshi tahliliy sayt“ nominatsiyasida[9] va „Uz domenlari Internet festivali“da „Eng yaxshi shaxsiy sahifa“ nominatsiyasida sovrindor boʻlgan[10].

2015-yilda „Jamiyat va men“ tanlovining „Eng yaxshi yoritilgan huquqiy mavzular“ nominatsiyasida gʻolib boʻlgan[11].

2016-yilda „Oʻzbekiston belgisi“ koʻkrak nishoni bilan taqdirlangan[12].

2018-yilda Oʻzbekiston blogerlari chempionatida 2-oʻrinni olgan[13], Oʻzbekiston Respublikasi Adliya vazirligi tomonidan oʻtkazilgan „Eng yaxshi huquq targʻibotchisi“ tanlovida „Huquqiy madaniyatni targʻib qiluvchi eng yaxshi mutaxassis“ nominatsiyasida gʻolibi boʻlgan[14].

2019-yilda „Huquqiy targʻibot ishlari aʼlochisi“ koʻkrak nishoni va Kelajak bunyodkori medali bilan taqdirlangan[15][16].

Oilasi

Turmush oʻrtogʻi — Mehrinoz Nosirjon qizi Abbosova, Oʻzbekiston Respublikasi Markaziy banki raisining maslahatchisi, Zulfiya nomidagi davlat mukofoti sohibasi.

Manbalar

  1. ↑ 1,0 1,1 YouTube logotipi Zakovatchi sifatida tanilgan, abituriyent va talabalar ko'makdoshi, huquqshunos, bloger bilan suhbat YouTubeda
  2. ↑ 2,0 2,1 „Bosh vazir matbuot kotibi | Bekzod Hidoyatov“. Telegram. Qaraldi: 2023-yil 7-avgust.
  3. ↑ „Bloger Xushnud Xudoyberdiev lavozimga tayinlandi“. 2020-yil 5-fevralda asl nusxadan arxivlangan. Qaraldi: 2020-yil 10-mart.
  4. ↑ Respublika oliy taʼlim kengashini tashkil etish chora-tadbirlari toʻgʻrisida
  5. ↑ TAYINLOV: OʻzA rahbariyatida oʻzgarish boʻldi
  6. ↑ Huquqshunos Xushnudbek Xudoyberdievning Telegram kanali
  7. ↑ „Huquqshunos Xushnudbek Xudoyberdiyev “Har bir inson hayoti davomida oʻqishi shart boʻlgan 10 kitob” tavsiya qiladi“.
  8. ↑ „„Turkiston“ saroyida MIT.uz — milliy internet tanlovi gʻoliblari taqdirlandi“. 2021-yil 18-yanvarda asl nusxadan arxivlangan. Qaraldi: 2020-yil 10-mart.
  9. ↑ „MIT.UZ“. 2021-yil 30-aprelda asl nusxadan arxivlangan. Qaraldi: 2020-yil 10-mart.
  10. ↑ Itogi Internet-festivalya natsionalnogo domena UZ 2014, 2020-03-25da asl nusxadan arxivlandi, qaraldi: 2020-03-10
  11. ↑ Fidoyi mehnat eʼtirofi
  12. ↑ Bir guruh yoshlar „Oʻzbekiston belgisi“ koʻkrak nishoni bilan taqdirlandilar
  13. ↑ Blogerlar chempionati
  14. ↑ „ENG YaXShI HUQUQ TARGʻIBOTChISI“ TANLOVI GʻOLIBLARI ANIQLANDI
  15. ↑ Matbuot va ommaviy axborot vositalari xodimlari kuni munosabati bilan soha xodimlaridan bir guruhini mukofotlash toʻgʻrisida
  16. ↑ „Huquqiy targʻibot ishlari aʼlochisi“ koʻkrak nishonining ilk sohiblari maʼlum boʻldi

Havolalar

Vikiiqtibosda Xushnud Xudayberdiyevga tegishli iqtiboslar mavjud. 
"https://ziyosfera.uz/index.php?title=Xushnud_Xudayberdiyev&oldid=870607" dan olindi