Kontent qismiga oʻtish

STV teleradiokompaniyasi

ZiyoSfera, erkin ensiklopediya
STV
Mamlakat Oʻzbekiston
Til(lar)i Oʻzbek
Rus
Tasvir formati 16:9
Efirga chiqqan 21-mart, 1991-yil (35 yil avval) (1991-03-21)
Efirdan uzilgan 21-iyul, 2018-yil (8 yil avval) (2018-07-21)

STV teleradiokompaniyasi (ruscha: Телерадиокомпания СТВ) — Oʻzbekistondagi ilk mustaqil televideniye va radiokompaniya, Samarqand shahrida faoliyat yuritgan. 1987-yilda tashkil etilgan, 1991-yil avgust oyida rasman roʻyxatdan oʻtkazilgan. Oʻzbekiston Respublikasidagi birinchi mustaqil telekanal hamda umuman olganda ilk mustaqil ommaviy axborot vositasi[1][2].

Tarixi

1987-yilda Samarqanddagi 16-poligrafiya bilim yurtida oʻquv ishlari boʻyicha direktor oʻrinbosari boʻlib faoliyat yuritayotgan Firdavs Abduxoliqov avvalroq tashkil etilgan talabalar televideniye studiyasi tajribasiga tayangan holda mustaqil telekompaniya ochish gʻoyasini ilgari surgan. Viloyat komsomol qoʻmitasi huzurida yoshlarni muvofiqlashtirish markazi tashkil etilgan. Ushbu markazning asosiy vazifasi hududiy televideniye tashkil etish loyihasini amalga oshirishdan iborat edi. 1990-yil avgust oyida mahalliy hokimiyat organlari tomonidan studiya negizida „TKS“ (Samarqand televideniye kompaniyasi) jamoat telekompaniyasi uchun yoshlar markazini tashkil etish toʻgʻrisida qaror qabul qilingan. Yangi telekanalning ilk koʻrsatuvi 1991-yil 21-mart kuni efirga uzatilgan. 1991-yil 15-maydan boshlab esa Samarqand shahri hamda Samarqand viloyati boʻylab (taxminan 3 million aholini qamrab olgan holda) muntazam teleradioeshittirish yoʻlga qoʻyilgan. 1992-yil may oyida „TKS“ boshqa bir raqobatchisi bilan birlashib, „STV“ telekanali tashkil etilgan. Mazkur telekanal, shuningdek, Oʻzbekistonda keyinchalik paydo boʻlgan boshqa nodavlat telekanallar singari sovet hokimiyati davrida cheklovlarga uchragan milliy va madaniy anʼanalarni qayta tiklashda muhim oʻrin tutgan[3].

Telekanal umumiy yoʻnalishdagi (generalistik) efir siyosatiga ega boʻlgan. Asosiy kontentni viloyatda ishlab chiqarilgan materiallar: hududiy yangiliklar, reportajlar, tahliliy va axborot dasturlari tashkil etgan. Shuningdek, oʻzbek va rus tillarida badiiy filmlar ham namoyish qilingan[4]. 1992-yilda telekompaniya „Samarqand-STV“ deb qayta nomlangan. 1996-yilda STV tahririyati ostida „Darakchi“ axborot va koʻngilochar gazetasi nashr etila boshlagan[5].

1994-yilda telekanal Rossiyaning TV-6 kanalini retranslyatsiya qilish boʻyicha eksklyuziv huquqni qoʻlga kiritgan[6].

STV, shuningdek, NTT bilan hamkorlikda ham faoliyat yuritgan[7].

2000-yilda FM 104.5 chastotasida radioeshittirishlar yoʻlga qoʻyilgan va kompaniya „STV“ teleradiokompaniyasi deb qayta nomlangan. Internet rivojlanishi bilan STV.uz rasmiy axborot veb-sayti ishga tushirilgan, keyinchalik esa ijtimoiy tarmoqlarda sahifalar hamda YouTube kanali tashkil etilgan[8]. STV telekanalining efirga uzatilishi 2018-yil 27-iyulda toʻxtatilgan. Yopilish sababi sifatida „Men afsonaman“ filmidagi zoʻravonlik sahnalari hamda „Sausage Party“ filmidagi pornografik mazmundagi sahnalar efirga uzatilgani koʻrsatilgan boʻlib, mazkur filmlar soat 9:00 da bolalar auditoriyasiga moʻljallangan vaqtda namoyish etilgan[9][10].

Dasturlar

Televideniye

  • Bolalar soati — multfilmlar dasturi;
  • Davlat va jamiyat — ijtimoiy muammolarga bagʻishlangan dastur;
  • Mohiyat — „Zarafshon“ („Samarqand xabarnomasi“) gazetasi bosh muharriri Farmon Toshev tomonidan olib borilgan dastur;
  • 100% yoshlar uchun — yoshlar va vatanparvarlikka oid dastur;
  • Shomi Samarqand — madaniy-maʼrifiy dastur. Kanalning ilk dasturlaridan biri boʻlib, 1991-yildan efirga uzatilgan[11];
  • Xabarlar — yangiliklar dasturi;
  • Teleinform va telemarket — tijoriy dasturlar.

Radio

Xabarlar — yangiliklar dasturi.

Havolalar

Manbalar

  1. ↑ Ермамат Рустамов. „Телерадиокомпании Самарканда: век минувший и нынешний“ (ru). "Самаркандский Вестник" (2021-yil 22-noyabr). 2023-yil 2-noyabrda asl nusxadan arxivlangan. Qaraldi: 2023-yil 13-noyabr.
  2. ↑ „СТВ сегодня исполнилось 32“ (ru-RU). 2023-yil 13-noyabrda asl nusxadan arxivlangan. Qaraldi: 2023-yil 13-noyabr.
  3. ↑ Jabborov, Sanginjon. Television as an Element in the Democratization of a Society in Transition - Uzbekistan: Experience, Problems and Perspectives (2015-yil 22-sentyabrda asl nusxadan arxivlangan). 
  4. ↑ Юсупалиева Д.К. „"Некоторые страницы деятельности региональных телевещательных компаний в Узбекистане"“. Культура. Духовность. Общество. 2023-yil 13-noyabrda asl nusxadan arxivlangan.
  5. ↑ „"ДАРАКЧИ ПЛЮС": ИНТЕРЕСНЫЕ ФАКТЫ, ЦИФРЫ И ПОЗДРАВЛЕНИЯ“ (ru). Darakchi. 2023-yil 13-noyabrda asl nusxadan arxivlangan. Qaraldi: 2023-yil 13-noyabr.
  6. ↑ „Fariddin Sharapov: I Was at the Origins of Independent Broadcasting in Uzbekistan“. TKT1957. — „In the distant 1994-95, [...] granted us exclusive rights to retransmit the TV-6 channel across Uzbekistan.“. Qaraldi: 2024-yil 17-oktyabr.
  7. ↑ „В Узбекистане создается новая молодёжная телестудия "Творческая молодёжь".“. Intranews. Qaraldi: 2024-yil 23-sentyabr.
  8. ↑ „История СТВ“. СТВ. 2022-yil 18-mayda asl nusxadan arxivlangan. Qaraldi: 2023-yil 13-noyabr.
  9. ↑ „Behayo sahnalarni efirga uzatgan "STV" telekanali faoliyati toʻxtatildi, "Sevimli" jiddiy ogohlantirildi“. Xalq soʻzi (2018-yil 28-iyul). 2021-yil 17-noyabrda asl nusxadan arxivlangan. Qaraldi: 2021-yil 17-noyabr.
  10. ↑ „"STV" telekanali faoliyati toʻxtatildi, "Sevimli" telekanali qat’iy ogohlantirildi“. Xabar.uz. Qaraldi: 2018-yil 28-iyul.
  11. ↑ „Шоми Самарқанд. Қаринаҳо. 1991 сол.“ (ru-RU). 2023-yil 13-noyabrda asl nusxadan arxivlangan. Qaraldi: 2023-yil 13-noyabr. 
"https://ziyosfera.uz/index.php?title=STV_teleradiokompaniyasi&oldid=743717" dan olindi