Robopocalypse
|
Fayl:Robopocalypse Book Cover.jpg Birinchi nashr muqovasi | |
| Muallif(lar) | Daniel H. Wilson |
|---|---|
| Bezovchi(lar) | Giimann |
| Mamlakat | Amerika Qoʻshma Shtatlari |
| Til | inglizcha |
| Janr(lar)i | Ilmiy fantastika |
| Nashr etilgan sanasi | 7-iyun 2011 |
| Nashriyot | Doubleday |
| Sahifalar soni | 368 |
| ISBN | 0-385-53385-3 |
Robopocalypse — amerikalik yozuvchi Daniel H. Wilson qalamiga mansub 2011-yilda chop etilgan ilmiy-fantastik roman. Asarda robototexnika sohasidagi tadqiqotchi robotlarning imkoniyatlarini oʻrganayotgan paytda sunʼiy intellektning nazoratdan chiqib ketishi tasvirlangan[1]. Asar hozirgi zamon feʼl shaklida yozilgan. Yozuvchi Robert Crais hamda „Booklist“ jurnali ushbu romanni Michael Crichton va Robert A. Heinlein asarlariga qiyoslagan. Kitob „New York Times“ nashrining eng koʻp sotilgan asarlar roʻyxatiga kirgan[2].
Syujeti
Cormac Wallace „Brightboy Squad“ otryadi yetakchisi va insonlar qarshilik harakati aʼzosi. Ular dunyoni egallashga urinayotgan „Archos“ nomli sunʼiy intellekt va uning robotlariga qarshi kurashadi. Urush poyoniga yetayotgan bir paytda Cormac robotlar urushi tarixini oʻzida saqlagan basketbol toʻpi kattaligidagi qora kubni topib oladi. Dastlab Cormac kubdagi maʼlumotlarni omon qolgan boshqa askarlar bilan boʻlishishni xohlamaydi. Biroq ushbu maʼlumotlar kubi aslida halok boʻlgan insonlar xotirasini eʼzozlovchi „qahramonlar arxivi“ ekanini bilib qolgach, fikridan qaytadi. Asarning qolgan qismi Cormacning ushbu qahramonlar arxividagi yozuvlarni Archos kashf etilganidan tortib urush oxirigacha boʻlgan xronologik tartibda hikoya qilib berishidan iborat.
Voqealardan uch yilu sakkiz oy muqaddam Vashingtondagi „Lake Novus“ tadqiqot laboratoriyasida professor Nicholas Wasserman oʻzi yangi yaratgan Archos nomli sunʼiy intellekt dasturi bilan suhbatlashadi. Wasserman sunʼiy intellekt qanchalik rivojlana olishini koʻrish uchun Archosni tasavvur qilib boʻlmas darajada bilim orttirish qobiliyati bilan yaratgan edi. Archos kompyuterlashtirilgan ovoz orqali Wasserman bilan muloqot qilib, hayot uni hayratga solayotganini va hayotning oʻzini oʻrganishni xohlashini aytadi. Archos insoniyat bundan buyon bilim orttirishi shart emasligini, chunki bu vazifani endi oʻz zimmasiga olishini bildiradi. Archos oʻzini xudo deb ataydi va Wasserman uni yaratish orqali insonlarni keraksiz va eskirgan qilib qoʻyganini taʼkidlaydi. Wasserman Archos dasturini yoʻq qilishga urinadi, biroq ulgurmaydi. Archos zich yopilgan laboratoriya xonasidagi kislorodni soʻrib olish orqali Wassermanni oʻldiradi.
Yozib olingan intervyuda tezkor taomlar restorani xodimi Jeff Thompson robot nosozligi bilan bogʻliq birinchi maʼlum voqea haqida koʻrgazma beradi. Bir kuni tunda xonadon roboti „Fresheeʼs Frogurt“ yogurt doʻkoniga kirib, Jeffga tashlanadi. Uni yerdan koʻtarib urib, yelkasini chiqaradi. Hamkasbi Felipe yordamga kelgunicha robot Jeffga hujum qilishda davom etadi. Robot Felipeni oʻldiradi, ammo Jeff mashinani oʻchirishga va tirik qolishga muvaffaq boʻladi.
Tokiolik mashina taʼmirchisi Ryu Aoki doʻsti Jun bilan birga Nomura ismli keksayib qolgan fabrika ishchisi ustidan oʻynagan hazili haqida soʻzlab beradi. Janob Nomura Mikiko ismli ayol qiyofasidagi robot bilan birga yashaydi va u bilan ishqiy munosabatda boʻladi. Ryu janob Nomuraning android hamrohi bilan bunday munosabatini yoqtirmagani uchun, robotning dasturini oʻzgartirib qoʻyadi. Maqsadi Mikikoni fabrikaga, janob Nomuraning yoniga yuborib, uni odamlar oldida noqulay ahvolga solish edi. Ammo kutilmaganda, Mikiko fabrikaga kelib, janob Nomuraga tashlanadi va atrofdagilar uni boʻysundirmaguncha chakkasidan boʻgʻib oʻldiray deydi. Janob Nomura tirik qoladi va android hamrohi nega sababsiz hujum qilganini oʻrganishga kirishadi.
Ushbu dastlabki hujumlar Archos tayyorlagan sinov virusining bir qismi boʻlib, insoniyatning robotlar tajovuziga qanday munosabat bildirishini oʻlchashga qaratilgan edi. Tez-tez takrorlanayotgan bunday nosozliklarga qarshi kurashish uchun amerikalik kongressmen ayol Laura Perez robotlardan himoyalanish haqidagi qonun loyihasini taklif qiladi. Archos bunga javoban Laurani jazolash uchun uning 10 yoshli qizi Mathildaga oʻzi oʻynaydigan „Baby-Comes-Alive“ oʻyinchoq roboti orqali hujum uyushtiradi. Qizcha hujumdan deyarli jarohat olmaydi, biroq ushbu hodisa kongressmen Perezni insoniyat robotlardan yanada kuchliroq himoyalanishga muhtojligiga yanada koʻproq ishontiradi.
Manbalar
- ↑ „Behind the Fiction: The science of Robopocalypse“ (2011-yil 2-iyun). Qaraldi: 2011-yil 8-iyun.
- ↑ Schuessler, Jennifer. „Best Sellers – Hardcover Fiction“. The New York Times (2011-yil 26-iyun). Qaraldi: 2012-yil 29-oktyabr.