Otashkada

Otashkada — zardushtiylik dini ibodatxonasi. Goʻshtaspning farmoni bilan qurila boshlangan. Otashkadalar turli tabiiy ofatlardan muhofaza qilish maqsadida balandlikka, tepa ustiga yoki harsang toshlardan yasalgan 3–4 metrlik tagkursilar ustiga qurilgan. Dastlab otashkada diniy marosim va ibodatlarni bajarish maskani boʻlgan. Asta-sekin otashkadaning vazifalari oʻzgara borib, sosoniylar davrida jamoa yigʻinlari va boshqa tadbirlar oʻtkaziladigan joyga aylangan. Barcha xarajatlar podsholik tomonidan otashkadaga vaqf qilingan yer, chorva, bogʻ-rogʻlardan olinadigan daromadlar hisobiga qoplangan; Otashkadalar bir necha hujra, tolor (zal)lardan iborat boʻlgan. Bino oldida doim olov yonib turadigan otashkada maydoni bunyod etilgan. Isfahon, Yazd, Koma (Hindiston) shaharlarida eng qadimgi otashkadalarning xarobalari mavjud. Otashkadalarda 7 xil musiqa asbobi joʻrligida Goxlarni yodlattiradigan maxsus goʻshalar boʻlgan. Otashkadalar diniy udum va marosimlarni oʻtkazadigan manzil boʻlish bilan birga maʼnaviy, maʼrifiy ishlar markazi hisoblangan.

Hamidjon Homidov.