Oʻzbekiston zamonaviy beshkurash federatsiyasi
| Qisqartma | Beshkurash federatsiyasi |
|---|---|
| Turi | nodavlat notijorat tashkilot |
| Maqomi | amalda |
| Hududiy xizmati |
 Oʻzbekiston |
| Prezidenti | Bahromjon Gaziyev |
| Til(lar)i | oʻzbek tili |
Oʻzbekiston zamonaviy beshkurash federatsiyasi – Oʻzbekistondagi nodavlat notijorat tashkilot boʻlib, oʻz atrofida zamonaviy beshkurash bilan shugʻullanadigan professional va havaskorlarni birlashtiradi. Zamonaviy beshkurash sport turi oʻz ichiga, ot sporti, qilichbozlik, oʻq otish, yugurish va suzish sport turlarini qamrab oladi. Federatsiya Oʻzbekiston Respublikasi Adliya vazirligidan 2017-yil fevral oyida, nodavlat notijorat tashkilot sifatida roʻyxatdan oʻtkazilgan[1]. Federatsiyaning amaldagi rahbari Bahromjon Gaziyev[2].
Davlat dasturi
Oʻzbekiston Respublikasi Prezidentining 2021-yil 5-avgustdagi „Oʻzbekistonda yilqichilik, ot sporti, zamonaviy beshkurash va poloni 2025-yilgacha rivojlantirish davlat dasturi toʻgʻrisida“gi PQ-5211 sonli qaroriga muvofiq, federatsiyaga zamonaviy beshkurash boʻyicha Toshkent shahrida „Oʻzbekiston Respublikasi Prezidenti kubogi uchun“, Tashkent Open", „Central Asian Cup“ hamda zamonaviy beshkurashning lazer-ran yoʻnalishi boʻyicha „Central Asian Championship“ turnirlarini oʻtkazish vazifasi yuklangan[3].
Federatsiya tarkibi
Federatsiyaning Oʻzbekiston Respublikasidagi barcha viloyatlarida, Qoraqalpogʻiston Respublikasida hamda Toshkent shahrida oʻz hududiy boʻlinmalari mavjud. Federatsiya prezidenti Bahromjon Gaziyev. 2023-yil fevral oyidagi Oʻzbekiston zamonaviy beshkurash federatsiyasining navbatdan tashqari hisobot-saylov konferensiyasi yigʻini qaroriga muvofiq, federatsiya bosh kotibi etib Sanjar Qurbonov saylangan. 2023-yil fevral oyigacha federatsiya bosh kotibi sifatida faoliyatini olib borgan Kseniya Gulyamova xalqaro beshkurash ittifoqi rahbari Klaus Shormanning taqdimiga binoan, Xalqaro zamonaviy beshkurash ittifoqi komissiyasi aʼzosi etib saylangan[4].
Hamkorlik
Federatsiya va Qatar zamonaviy beshkurash federatsiyasi
2018-yil dekabr oyida federatsiya rahbari Bahromjon Gaziyev hamda Qatar zamonaviy beshkurash federatsiyasi bosh kotibi Badr Darvesh oʻrtasida hamkorlik uchrashuvi oʻtkazilgan. Qoʻshma oʻquv-mashgʻulotlar oʻtkazish, tajriba almashish va tajribali mutaxassislarni sport mashgʻulotlariga jalb qilish masalalari muhokoma qilingan[5].
Federatsiya va Oʻzbekiston qilichbozlik, suv sporti, yilqichilik va ot sporti, oʻq otish va yengil atletika federatsiyalari
2018-yil 26-dekabr kuni federatsiya Oʻzbekiston Milliy olimpiya qoʻmitasi binosida zamonaviy beshkurash sport turining tarkibiga kiruvchi sport turlarining federatsiyalari bilan yaqin aloqalarni yoʻlga qoʻyish maqsadida Oʻzbekiston qilichbozlik, suv sporti, yilqichilik va ot sporti, oʻq otish va yengil atletika federatsiyalari bilan memorandum imzoladi. Memorandumga koʻra, federatsiyalar oʻrtasida 60 kunlik dastur ishlab chiqilgan[6].
Federatsiya va Xalqaro beshkurash ittifoqi
2019-yil 19-yanvar kuni Germaniya Federativ respublikasining Frankfurt shahrida federatsiya rahbariyati, Xalqaro beshkurash ittifoqi prezidenti Klaus Shorman bilan uchrashuv oʻtkazgan. Oʻzbekistonda zamonaviy beshkurash bilan shugʻullanadigan sportchilarni qoʻllab-quvvatlash, ularni sport mashgʻulotlarini oʻtkazadigan joylarini xalqaro standartlar bilan raqobatbardoshligini taʼminlash boʻyicha muzokaralar olib borilgan. Ittifoq prezidenti Oʻzbekiston nomidan Tokio-2020 xalqaro yozgi olimpiya oʻyinlarida qatnashish istagini bildirgan sportchilarga bu borada yordam berishini bildirgan[7].
Federatsiya va Rossiya zamonaviy beshkurash federatsiyasi
2019-yil fevral oyida Rossiya Federatsiyasining Moskva shahridagi olimpiya qoʻmitasi binosida federatsiya rahbari va Rossiya zamonaviy beshkurash federatsiyasi prezidenti Vyacheslav Aminov oʻrtasida muzokaralar oʻtkazilgan. Doppingga qarshi kurashish, ikki mamlakat sportchilarini tajriba almashish hamda ularni qoʻllab-quvvatlashga doir masalalar muhokama qilingan[8].
Federatsiya va Qozogʻiston zamonaviy beshkurash federatsiyasi
2018-yil dekabr oyida federatsiya rahbari, Qozogʻiston zamonaviy beshkurash federatsiyasi vitse-prezidenti Anvar Malik oʻrtasida uchrashuv oʻtkazildi. Murabbiylar va sportchilarning almashinuvini yoʻlga qoʻyish, 2020-yilgi yozgi olimpiya oʻyinlariga birgalikda tayyorgarlik koʻrishga doir masalalar muhokama qilingan[9].
Federatsiya va Xidaka shahri meriyasi
Federatsiya rahbariyati va Yaponiyaning Xidaka shahri meriyasi rahbariyatlari oʻrtasida onlayn tarzda muzokaralar oʻtkazildi. Muzokaralarga koʻra, Oʻzbekiston zamonaviy beshkurash federatsiyasining delegatsiyasi Yaponiya tomonining homiyligi hisobiga, 3 kun mobaynida almashinuv dasturi tashkil etilgan. Dasturda Tokio-2020 almashinuv dasturi toʻgʻrisidagi bitim imzolangan[10].
Federatsiya va Oʻzbekiston Respublikasi Milliy gvardiyasi
2021-yil iyun oyida federatsiya rahbariyati hamda Oʻzbekiston Respublikasi Milliy gvardiyasi rahbariyati ishtirokida hamkorlik memorandumi imzolangan. Gvardiyaning hududiy boʻlinmalarida zamonaviy beshkurash toʻgaraklarini yoʻlga qoʻyish hamda toʻgaraklarga sohadagi harbiy xizmatchilarning farzandlarini jalb etishga kelishilgan[11].
Manbalar
- ↑ „Zamonaviy beshkurash federatsiyasi tashkil etildi“. Gazeta.uz.
- ↑ „O‘zbekiston zamonaviy beshkurash federatsiyasiga yangi rais saylandi“. Daryo.uz.
- ↑ „O‘zbekistonda yilqichilik, ot sporti, zamonaviy beshkurash va poloni 2025-yilgacha rivojlantirish davlat dasturi to‘g‘risida“. lex.uz.
- ↑ „O'zbekistonlik ayol tarixda ilk bor xalqaro beshkurash ittifoqiga komissiya a'zosi etib saylandi“. Xabardor.uz.
- ↑ „O‘zbekiston va Qatar zamonaviy beshkurash bo‘yicha hamkorlik qiladi“. Gazeta.uz.
- ↑ „O‘zbekiston zamonaviy beshkurash federatsiyasi qator sport federatsiyalari bilan hamkorlikka erishdi“. kun.uz.
- ↑ „O‘zbekiston zamonaviy beshkurash federatsiyasi Frankfurtda muzokara olib bordi“. Kun.uz.
- ↑ „O‘zbekiston va Rossiya zamonaviy beshkurash federatsiyalari o‘rtasida memorandum imzolandi“. Xabar.uz.
- ↑ „Ўзбекистон ва Қозоғистон замонавий бешкураш федерациялари ўртасида меморандум имзоланди“. Xabar.uz.
- ↑ „Oʻzbekiston Zamonaviy beshkurash federatsiyasi Xidaka shahri meriyasi bilan hamkorlik qiladi“. Yangi O'zbekiston nashri.
- ↑ „O‘zbekiston Respublikasi Milliy gvardiyasi va O‘zbekiston zamonaviy beshkurash federatsiyasi hamda O‘zbekiston polo federatsiyasi o‘rtasida memorandum imzolandi“. Milliy Gvardiya.