Muxiddin Kalonov

Muxiddin Kalonov
	; Muxiddin Kalonov
Tavalludi	1977-yil 11-iyun (49 yosh); Nurota tumani, Samarqand viloyati, OʻzSSR
Fuqaroligi	Oʻzbekiston
Kasbi	Iqtisodchi
Partiyasi	Oʻzbekiston Ekologik partiyasi ; Navoiy shahar xalq deputatlari kengashi deputati
Unvoni	Iqtisodiyot fanlari doktori, professor

Kalonov Muxiddin Baxriddinovich (1977-yil 11-iyul Nurota tumani, Navoiy viloyati) — iqtisodiyot fanlari doktori, professor, Navoiy davlat universiteti rektori^[1]. Oʻzbekiston Yozuvchilar uyushmasi aʼzosi, Oʻzbekiston Respublikasi Oliy Majlisi Senati hamda Oʻzbekiston Respublikasi Korrupsiyaga qarshi kurashish agentligining doimiy maslahatchisi va eksperti. 2002–2018-yillarda „Avtodaryotrans-ilm“ Respublika Davlat ilmiy metodik markazida, avval ilmiy xodim, so‘ng iqtisodiy va moliyaviy masalalar boʻyicha bosh direktor oʻrinbosari, keyinchalik bosh direktor lavozimlarida faoliyat olib borgan. 2018–2020-yillarda Oʻzbekiston Respublikasi Transport vazirligi Avtomobil transporti kadrlari malakasini oshirish va qayta tayyorlash institutining bosh direktori, Toshkent davlat iqtisodiyot universiteti „Buxgalteriya hisobi“ kafedrasi professori, „Biznes boshqaruvi va logistika“ kafedrasi mudiri, „Oʻzbekiston iqtisodiyotini rivojlantirishning ilmiy asoslari va muammolari“ ilmiy-tadqiqot markazi direktori, 2020–2024-yillarda esa Toshkent davlat iqtisodiyot universiteti prorektori.

Umumiy maʼlumotlar

Muxiddin Kalonov 1977-yilda Samarqand viloyatining Nurota tumanida (hozirgi Navoiy viloyati) ziyolilar oilasida tugʻilgan. Millati oʻzbek. Umumiy ish staji 29 yil, ilmiy va pedagogik staji 22 yil, Oʻzbekiston Ekologik partiyasi aʼzosi. 2000-yilda Toshkent irrigatsiya va qishloq xoʻjaligini mexanizatsiyalash muhandislari institutini imtiyozli tugatib, oʻqish bilan bir qatorda „Iqtisod va hisobot“ ilmiy jurnali musahhihi (1996–1997), „PressTIJ“ jurnali texnik muharriri (1997–1998). „Alp-Farzin“ firmasi bosh buxgalteri (1998–1999), „Fidokor“ gazetasi tahririyati bosh buxgalteri (1999–2002), „Avtodaryotrans-ilm“ Davlat ilmiy metodik Markazida, avval ilmiy xodim, so‘ng iqtisodiy va moliyaviy masalalar boʻyicha bosh direktor oʻrinbosari, keyinchalik bosh direktor (2002–2018) lavozimlarida ishlagan. Kalonov 2006-yilda O‘zbekiston Respublikasi Prezidenti huzuridagi Davlat va jamiyat qurilishi akademiyasi, Oliy biznes maktabi, Korporativ boshqaruv markazini, 2012-yilda Toshkent davlat iqtisodiyot universitetining tashqi iqtisodiy faoliyat hisobi va tahlili boʻyicha magistraturani tamomlagan. 2021-yilda Biznes va tadbirkorlik oliy maktabida hamda 2023-yilda Oksford universiteti (post doctoral researcher) oliy kursida oʻqigan. Keyinchalik TDIU mustaqil tadqiqotchisi sifatida transport logistikasi sohasining buxgalteriya hisobi, iqtisodiy tahlil va auditi yoʻnalishida Respublikamizda hamda Xitoy Xalq Respublikasining Pekin universitetida (QS TOP-12), Rossiya Federatsiyasining Sankt-Peterburg iqtisodiyot universitetida (BR TOP-150) ilmiy amaliy malaka oshirgan. 2017-yilda iqtisodiyot fanlari boʻyicha falsafa doktorlik, 2019-yilda esa fan doktorlik ilmiy ishlarini himoya qilgan^[2]. Professor ilmiy unvoniga ega.

Ilmiy va pedagogik faoliyati

2019-yil yangilangan Toshkent avtovokzalini raqamlashtirish va ilmiy texnik loyihasi doirasida hukumat miqyosida taqdimot oʻtkazgan. U „Logistika va Iqtisodiyot“ ilmiy elektron, innovasion, iqtisodiy, texnik jurnali tahrir kengashi raisi hamda taʼsischisi, Oliy attestatsiya komissiyasi (OAK) tarkibiga kiruvchi bir nechta ilmiy jurnallarning tahrir kengashi aʼzosi. Oʻzbekistonda avtomobil transporti kadrlari malakasini oshirish va ularni qayta tayyorlash instituti rahbari sifatida faoliyat yuritgan va 2018-yilda Oʻzbekistonda birinchilardan boʻlib masofaviy malaka oshirish platformasini yaratib, aprobatsiyadan oʻtkazgan. „Avtomobil transporti korxonalarida buxgalteriya hisobini tashkil etish“ kitobining muallifi. TDIU huzuridagi Markazda faoliyat yuritib kelayotgan „Think Tank“ tahliliy ilmiy strategiya, iqtisodiy texnologiya, ekonometrik modellashtirish, hududlarni iqtisodiy tahlili kabi mavzular boʻyicha tadqiqot va targʻibot ishlarini olib boruvchi klubi asoschisi. Oxirgi 3 yilda „Ready4Trade Central Asia“ xalqaro loyihasiga, shuningdek, 1 ta fundamental (Oʻzbekistonda moliyaviy hisobotning xalqaro standartlari metodologiyasi), 2 ta amaliy va 1 ta innovatsion loyihalarga rahbarlik qilgan. 2023-yilda Xorazm viloyati Urganch davlat universiteti huzurida „Mintaqaviy laboratoriya“ tashkil qilgan.

Ilmiy ishlari va maqolalari

Kalonov Muxiddin Baxriddinovich transport logistikasi sohasi, buxgalteriya hisobi, iqtisodiy tahlil va auditiga doir 200 dan ortiq ilmiy ishlar muallifi hisoblanadi. 2 ta monografiya, 30 dan ortiq oʻquv qoʻllanma va darsliklari bir qancha xalqaro nashriyotlarda nashr qilingan boʻlib, „Introduction to Taxation and Accounting“, „Accounting“, „Accounting and Auditing“, „Financial Accounting“ hamda „Management Accounting“ nomli darslik va oʻquv qoʻllanmalari chop etilgan.

2025-yilda O‘zbekiston milliy axborot agentligi (Uza) saytida „Sunʼiy intellekt – taraqqiyotning strategik drayveri“ nomli maqolasi chop etilgan^[3].

Manbalar

↑ „Navoiy davlat pedagogika institutiga yangi rektor tayinlandi“. Daryo.uz (2024-yil 24-iyun). Qaraldi: 13-aprel 2025-yil.
↑ „Калонов Мухиддин Бахритдиновичнинг фан доктори (DSc) диссертацияси ҳимояси ҳақида эълон“. OAK. O‘zbekiston Respublikasi Oliy ta’lim, fan va innovatsiyalar vazirligi huzuridagi Oliy attestatsiya komissiyasi. Qaraldi: 13-aprel 2025-yil.
↑ „Sun'iy intellekt – taraqqiyotning strategik drayveri“. ЎзА (2025-yil 18-dekabr). Qaraldi: 2025-yil 22-dekabr.

Havolalar

[1] „Navoiy davlat pedagogika institutiga yangi rektor tayinlandi“. Daryo.uz (2024-yil 24-iyun). Qaraldi: 13-aprel 2025-yil.

[oak-2] „Калонов Мухиддин Бахритдиновичнинг фан доктори (DSc) диссертацияси ҳимояси ҳақида эълон“. OAK. O‘zbekiston Respublikasi Oliy ta’lim, fan va innovatsiyalar vazirligi huzuridagi Oliy attestatsiya komissiyasi. Qaraldi: 13-aprel 2025-yil.

[3] „Sun'iy intellekt – taraqqiyotning strategik drayveri“. ЎзА (2025-yil 18-dekabr). Qaraldi: 2025-yil 22-dekabr.

[1]

[2]

[3]