Biznes va tadbirkorlik oliy maktabi
 | |
| Turi | Davlat tashkiloti |
|---|---|
| Maqomi | Oliygoh |
| Ishga tushgan sanasi | 2001-yil |
| Joylashuvi | Toshkent shahri, Mirobod ko‘chasi |
| Hududiy xizmati |
 Oʻzbekiston |
| Bosh mahkamasi | Oʻzbekiston Respublkasi Vazirlar Mahakamasi |
| Hamkor tashkilotlari | Oʻzbekiston Respublikasi Oliy taʼlim, fan va innovatsiyalar vazirligi |
| Til(lar)i | Oʻzbek, Rus, Ingliz |
| Vebsayti | gsbe.uz |
Biznes va tadbirkorlik oliy maktabi – zamonaviy bilimlar, innovatsion yondashuvlar va xalqaro tajriba asosida malakali kadrlar tayyorlaydigan yetakchi ta’lim muassasasi hisoblanadi. Oliy biznes maktabi dastlab 2001-yilda tashkil etilgan bo‘lib, O‘zbekiston Respublikasi Prezidentining 2023-yil 4-aprel PQ-108-son qaroriga asosan Oliy biznes maktabi O‘zbekiston Respublikasi Vazirlar Mahkamasi huzurida qayta tashkil etilgan.
O‘zbekiston Respublikasi Vazirlar Mahkamasining 2024-yil 30-dekabr 904-son qarorida Oliy biznes maktabining asosiy faoliyat yo‘nalishlari, maqsadi va vazifalari belgilab berilgan.
Oliy biznes maktabi iqtisodiy islohotlar va zamonaviy boshqaruv mexanizmini yo‘lga qo‘yishda ilmiy yondashuvlar hamda yangi fikrlashni joriy etishga yo‘naltirilgan.
Tarixi
2001-yil Davlat va jamiyat qurilish akademiyasi qoshida Oliy biznes maktabi tashkil etildi.
2015-yil O‘zbekiston Respublikasi Prezidenti qaroriga muvofiq, Oliy biznes maktabi Iqtisodiyot vazirligi qoshidagi Korporativ boshqaruv ilmiy va ta’lim markaziga aylantirildi.
2018-yil O‘zbekiston Respublikasi Prezidenti qaroriga muvofiq, Korporativ boshqaruv ilmiy-ta’lim markazi O'zbekiston Respublikasi Prezidenti huzuridagi Loyiha boshqaruv milliy agentligi qoshiga o’tkazildi.
2018-yil O‘zbekiston Respublikasi Prezidenti qaroriga muvofiq, Korporativ boshqaruv ilmiy-ta’lim markazi Biznes va boshqaruv respublika oliy maktabi deb nomlandi.
2020-yil O‘zbekiston Respublikasi Prezidentining 2020-yil 26-martdagi “Iqtisodiyotni rivojlantirish va kambag‘allikni qisqartirishga oid davlat siyosatini tubdan yangilash chora-tadbirlari to‘g‘risida”gi PF–5975-son Farmoni va “O‘zbekiston Respublikasi Iqtisodiy taraqqiyot va kambag‘allikni qisqartirish vazirligi va uning tizim tashkilotlari faoliyatini tashkil etish to‘g‘risida”gi PQ–4653-son qarori hamda O‘zbekiston Respublikasi Vazirlar Mahkamasining 2020-yildagi 30-iyuldagi “Biznes va tadbirkorlik oliy maktabi samarali faoliyatini ta’minlashga doir tashkiliy chora-tadbirlar to‘g‘risida”gi 460–son qarorlari bilan Biznes va tadbirkorlik oliy maktabi deb qayta tashkil qilindi.
2023-yil O‘zbekiston Respublikasi Prezidentining 2022-yil 21-dekabrdagi “Yangi O‘zbekiston ma’muriy islohotlarini amalga oshirish chora-tadbirlari to‘g‘risida”gi PF-269-son Farmon va 2023-yil 4-apreldagi “Iqtisodiy islohotlarni amalga oshirishda ilmiy yondashuvlarni kеngaytirish va boshqaruv kadrlarini tayyorlash tizimini yanada takomillashtirish chora-tadbirlari to‘g‘risida”gi PQ-108-son qaroriga asosan Biznes va tadbirkorlik oliy maktabi qayta tashkil qilindi.
2024-yil O‘zbekiston Respublikasi Vazirlar Mahkamasining 2024-yil 30-dekabrdagi 904-sonli qarorida Oliy biznes maktabining asosiy faoliyat yo‘nalishlari, maqsadi va vazifalari belgilab berilgan. Oliy biznes maktabi iqtisodiy islohotlar va zamonaviy boshqaruv mexanizmini yo‘lga qo‘yishda ilmiy yondashuvlar hamda yangi fikrlashni joriy etishga yo‘naltirilgan.
Missiya va qadriyatlar
Oliy biznes maktabining missiyasi - zamonaviy bilimlar, innovatsion yondashuv va xalqaro tajribaga asoslangan holda, raqamli transformatsiya sharoitida samarali ishlay oladigan yetakchi mutaxassislarni tayyorlashdan iborat. Oliy biznes maktabi o‘z faoliyati davomida iqtisodiyotning rivojlanishiga hissa qo‘shadigan, yangicha fikrlaydigan, masʼuliyatli va tashabbuskor yetakchilarni shakllantirishga intiladi.
Oliy biznes maktabining qadriyatlari - o‘quv jarayonlarida taʼlim sifatini taʼminlash, innovatsiyalar va zamonaviy texnologiyalarni joriy etish, xalqaro hamkorlikni kengaytirish, tadbirkorlik tashabbuslarini qo‘llab-quvvatlash, ochiqlik va jamiyat bilan samarali muloqotni tashkil etishga eʼtibor qaratiladi.
Ta’lim dasturlari
| # | Shifr | Taʼlim yoʻnalishi nomi |
|---|---|---|
| 1 | 70410901 | MBA – Global menejment |
| 2 | 70410901 | MBA – Moliya |
| 3 | 70410901 | MBA – Kichik biznes va tadbirkorlik |
| 4 | 70410901 | MBA – Raqamli iqtisodiyot |
| 5 | 70410901 | MBA – Agrobiznes |
| 6 | 70410901 | MBA – Tashkiliy Liderlik |
| 7 | 70410802 | PM – Loyiha boshqaruvi |
| Ikki diplom (Dual degree) | ||
| 8 | 70410901 | MBA – IT Business |
| 9 | 70410901 | MBA – Korporativ boshqaruv va strategik rivojlanish |
“Ikki diplom” (Dual degree)
Oliy biznes maktabda taʼlim jarayoniga xalqaro taʼlim standartlarini joriy etish maqsadida nufuzli xorijiy taʼlim muassasalari bilan «ikki diplom» (duale degree) taʼlim modeli bo‘yicha hamkorlik yo‘lga qo‘yilgan. Jumladan, Janubiy Koreyaning ADJU universiteti bilan hamkorligida “MBA in IT-Business” hamda Rossiya Federatsiyasi Prezidenti huzuridagi Xalq xo‘jaligi va davlat boshqaruvi akademiyasi (РАНХиГС) bilan hamkorlikda “MBA-Korporativ boshqaruv va biznesni strategik rivojlantirish” qo‘shma taʼlim dasturlari muvaffaqiyatli amalga oshirilmoqda.
Ilmiy-pedagogik kadrlar tayyorlash
Oliy biznes maktabi ilmiy tadqiqotchilar uchun oliy taʼlimdan keyingi taʼlim tizimida tayanch doktorantura (PhD), doktorantura va mustaqil izlanuvchilik asosida ilmiy izlanish olib borish imkoniyatini taqdim etadi.
Ilmiy faoliyat quyidagi yo‘nalishlar bo‘yicha olib boriladi:
08.00.15 - Kichik biznes va tadbirkorlik iqtisodiyoti. Tadbirkorlikning zamonaviy tamoyillari, kichik biznesni rivojlantirish strategiyalari, iqtisodiy islohotlar va tadbirkorlik ekotizimining barqarorligi bo‘yicha ilmiy tadqiqotlarni qamrab oladi.
08.00.16 – Raqamli iqtisodiyot va xalqaro raqamli integratsiya. Raqamli transformatsiya jarayonlari, innovatsion texnologiyalar, xalqaro raqamli tizimlar va ularning iqtisodiyotga taʼsiri bo‘yicha ilmiy tadqiqotlar olib boriladi.
Ilmiy tadqiqot faoliyatining vazifalari
Tahlil va tadqiqotlar orqali davlat va biznes sektorlarini ilmiy jihatdan qo‘llab-quvvatlash.
Biznes va tadbirkorlik, korporativ boshqaruv, “yashil” va raqamli iqtisodiyot yo‘nalishlarini rivojlantirish yuzasidan Vazirlar Mahkamasi va boshqa davlat organlarini ilmiy va axborot-tahliliy jihatdan ta’minlash.
Tadbirkorlik va biznes jarayonlarini rivojlantirish bo‘yicha o‘quv-uslubiy materiallar tayyorlash.
Xalqaro iqtisodiy va moliyaviy institutlar, xorijiy ilmiy markazlar bilan hamkorlikni yo‘lga qo‘yish. Ilmiy anjumanlar, konferensiyalar va ekspert muhokamalarini tashkil etish.
Oliy biznes maktabining ilmiy-tadqiqot yo‘nalishi ilm-fan, innovatsiyalar va iqtisodiy islohotlar o‘rtasidagi bog‘liqlikni mustahkamlashga qaratilgan bo‘lib, ilmiy yondashuv orqali amaliy natijalarga erishish tamoyiliga asoslanadi.
Ilmiy faoliyatni qo‘llab-quvvatlash va xalqaro ilmiy hamkorlikni kengaytirish maqsadida Oliy biznes maktabida quyidagi muhim ilmiy markaz va ofislarni tashkil etgan:
Ilmiy faoliyatni muvofiqlashtirish markazi
Tadqiqot loyihalarini samarali boshqarish, ilmiy grantlarni jalb etish va xalqaro ilmiy hamkorlikni kengaytirish orqali ilmiy-tadqiqot jarayonlarini muvofiqlashtirish, innovatsion izlanishlarni qo‘llab-quvvatlash va ilg‘or ilmiy g‘oyalarni amaliyotga tatbiq etish orqali akademik rivojlanishga hissa qo‘shadi.
Ilmiy-tadqiqot va grantlar
Oliy biznes maktabining ilmiy-tadqiqot yo‘nalishi ilm-fan, innovatsiyalar va iqtisodiy islohotlar o‘rtasidagi bog‘liqlikni mustahkamlashga qaratilgan bo‘lib, ilmiy yondashuv orqali amaliy natijalarga erishish tamoyiliga asoslangan bo‘lib, korporativ boshqaruv, raqamli transformatsiya jarayonlari, yashil iqtisodiyot va tadbirkorlik rivojiga taʼsir ko‘rsatadigan innovatsion yechimlarni ishlab chiqishga yo‘naltirilgan.
Yashil iqtisodiyotni ilgari surish va joriy etish loyiha ofisi
“Yashil” texnologiyalarni joriy etishning institutsional asoslarini rivojlantirish, ilmiy va innovatsion tadqiqotlarni amalga oshirish hamda mazkur sohada kadrlar malakasini oshirishda yetakchi xorijiy taʼlim muassasalari va ilmiy-tadqiqot markazlari bilan hamkorlikni yo‘lga qo‘yish bo‘yicha faoliyat olib boradi. Shuningdek, “yashil” iqtisodiyot tamoyillarini joriy etish bo‘yicha ilmiy-tadqiqotlar, loyihalashtirish, axborot-tahliliy va startap loyihalar bo‘yicha tashabbuslarni qo‘llab-quvvatlash hamda ekspert va konsalting xizmatlarini ko‘rsatish, yetakchi xorijiy taʼlim muassasalari va ilmiy markazlar bilan trening, qisqa kurs, seminar, davra suhbatlari hamda anjumanlarni tashkil etish Loyiha ofisining asosiy vazifalari hisoblanadi.
Biznes-inkubator va startap loyihalar bilan ishlash markazi
Kichik innovatsion biznes va startap g‘oyalarni loyiha darajasiga yetkazishda konsalting xizmatlarini ko‘rsatish, shu jumladan biznes ekotizimini shakllantirish, menejment, marketing, buxgalteriya, huquqiy masalalar hamda boshqa professional mutaxassislarning mentorlik xizmatlarini taqdim etadi. Markaz tadbirkorlik tashabbuslari va startap loyihalarni qo‘llab-quvvatlash, xalqaro, davlat hamda xususiy korxonalar, tashkilotlar, birlashmalar bilan hamkorlik qilish, shuningdek, biznes tashabbuslari va startap loyihalarni qo‘llab-quvvatlash uchun tajribali tadbirkorlar hamda xorijiy ekspertlarni jalb etadi va ularni doimiy ravishda qo‘llab-quvvatlaydi.
Kadrlar malakasini oshirish
Oliy biznes maktabi zamonaviy iqtisodiy bilimlar bo‘yicha vazirlik va idoralar, mahalliy hokimiyat vakillari, hokim o‘rinbosarlari hamda iqtisodiyot tarmoqlaridagi kadrlarning malakasini oshirish va qayta tayyorlash bo‘yicha 20 yildan ortiq tajribaga ega taʼlim muassasasi hisoblanadi. Bugungi kunda Oliy biznes maktabi 30 dan ortiq malaka oshirish dasturlarini taklif etadi. Kurslar dolzarb tadqiqotlar, innovatsion metodologiyalar va zamonaviy biznes amaliyotlar asosida ishlab chiqilgan bo‘lib, ishtirokchilarga raqamli transformatsiya, yashil iqtisodiyot va tadbirkorlik ekotizimi kabi muhim yo‘nalishlarda chuqur bilim va ko‘nikmalarni egallash imkonini beradi.