Katta Toʻsiq rifi

Katta toʻsiq rifi — Avstraliyaning shimoli-sharqiy sohili boʻylab joylashgan qator marjon riflari va marjon orollari. Materik sayozligining chegarasi boʻylab Yangi Gvineyaning janubiy qirgʻogʻidan Sandi-Keyp burnigacha 2300 km ga choʻzilgan. Rifning kengligi shimolda 2 km, janubda 150 km. Riflarning koʻpi suv ostida, suv satqi pasaygan vaqtlarda suv yuziga chiqadi. Baʼzi riflar orolga aylanib, shakli, odatda, taqaga oʻxshaydi va qavariq tomoni janubi-sharqdan esuvchi passat shamollariga qaragan. Katta toʻsiq rifi bilan materik qirgʻogʻi orasida Katta laguna yoki „Ichki kanal“ suv yoʻli (eng chuqur joyi 50 m) bor. Bu suv yoʻli okean toʻlqinlaridan toʻsilgan; kemachilikda foydalaniladi. Dengiz milliy parki bor.