Kontent qismiga oʻtish

Jessica-Jane Applegate

ZiyoSfera, erkin ensiklopediya
Jessica-Jane Applegate

Jessica-Jane Applegate 2012-yilgi Yozgi Paralimpiada oʻyinlaridan so‘ng S14 toifasida 200 metrga erkin usulda suzish bo‘yicha qo‘lga kiritgan oltin medali bilan
Shaxsiy maʼlumotlari
Jinsi ayol
Tavallud sanasi 1996-yil 22-avgust
Great Yarmouth, Angliya
Sport
Qaysi sport para suzish
Klubi City of Norwich Swimming Club

Jessica-Jane Applegate MBE (1996-yil 22-avgustda tugʻilgan[1]) – britaniyalik para suzuvchi. S14 toifasida aqliy nuqsonga ega boʻlgan suzuvchilar bilan raqobatlashadi. Asosan, qisqa masofaga erkin va chalqancha uzlubda suzish yoʻnalishlarida ishtirok etadi. 2012-yilgi Yozgi Paralimpiya oʻyinlariga yoʻllanmani qoʻlga kiritib, 2-sentyabr kuni S14 toifasida 200 metrga erkin usulda suzish boʻyicha Paralimpiya rekordini oʻrnatgan holda oltin medalni qoʻlga kiritgan.

Applegate suzish boʻyicha koʻrsatgan natijalari uchun 2013-yilgi „Yangi yil faxriylari“ mukofoti doirasida Britaniya imperiyasi ordeni bilan taqdirlangan[2].

Yoshlik davri

Applegate 1996-yilda Angliyaning Norfolk grafligidagi Great Yarmouth shahrida tugʻilgan. Unga autizm spektr buzilishi tashxisi qoʻyilgan, shundan soʻng onasi uni Lowestoft va Oulton Broad suzish klubiga olib borgan va yoshligidan suzish bilan shugʻullanishni boshlagan[3][4]. Applegate Ormiston Venture Akademiyasida taʼlim olgan, 13 yoshida mintaqaviy rekordlarni oʻrnatgan va Buyuk Britaniyaning sport boʻyicha iqtidorli kishilari dasturiga tanlab olingan[5].

Suzish karerasi

2011-yil oxirlariga kelib, Applegate xalqaro darajadagi raqobatbardosh suzuvchi sifatida oʻz salohiyatini namyon etdi. U Wales qishki ochiq chempionatida 50 metrga erkin usulda suzish boʻyicha butun dunyo miqyosida 2-eng yaxshi natijani, 200 metrga erkin usulda suzish boʻyicha esa 3-eng tezkor natijani qayd etdi[3]. 2012-yilda u oʻzining ilk xalqaro musobaqasi Berlin Open turnirida qatnashib, 50 va 100 metrga erkin usulda suzish bahslarida 2 ta bronza medalini qoʻlga kiritdi[6]. Shundan soʻng, Applegate mart oyida boʻlib oʻtgan 2012-yilgi Britaniya suzish chempionatida 200 metrga erkin usulda suzish boʻyicha oltin medalga sazovor boʻlgan. Bu gʻalabasi orqali sportchi Buyuk Britaniya Paralimpiya saralash musobaqalari meʼyoriy koʻrsatkichlaridan 4 soniyaga tezroq natija koʻrsatdi, shuningdek, yangi Britaniya rekordini ham oʻrnatdi[7].

Paralimpiada oʻyinlaridan oldingi Applegatening soʻnggi yirik musobaqasi 2012-yilgi Britaniya Xalqaro Nogironlar Suzish chempionati boʻlib, unda sportchi jami 3 ta medalni qoʻlga kiritdi. Jumladan, S14 toifasida 50 va 100 metrga erkin usulda kumush medal, musobaqaning soʻnggi kunida irlandiyalik Bethany Firth bilan kechgan juda qizgʻin bellashuvda 2:15.23 koʻrsatkichi bilan oltin medalga ega chiqdi[6]. Oldingi musobaqalardagi natijalari tufayli Applegate 2012-yilgi Yozgi Paralimpiada oʻyinlarida S14 toifasida 200 metrga erkin usul va 100 metrga chalqancha usulda suzish boʻyicha ishtirok etish huquqiga ega boʻldi.

Paralimpiada oʻyinlarida Applegatening dastlabki chiqishi 31-avgust kuni boʻlib, sportchi 100 metrga chalqancha usulda suzish boʻyicha ishtirok etdi. U saralash bosqichida 3-oʻrinni egalladi va finalda 1:09.58 shaxsiy rekordini oʻrnatishga muvaffaq boʻldi, biroq yakunda 4-oʻrinni olib, musobaqa medalini qoʻlga kirita olmadi[8]. Oʻzining yoqtirgan yoʻnalishi boʻlgan 200 metrga erkin usulda suzish bahsida esa Applegate 2:14.31 natija bilan finalga birinchi boʻlib yoʻl oldi. Finalda esa natijasini yana ham yaxshilagan holda oxirgi metrlarda raqiblarini ortda qoldirib, 2:12.63 natija bilan oltin medalni qoʻlga kiritdi va Paralimpiada rekordini oʻrnatdi[4].

2013-yilda Applegate Buyuk Britaniya terma jamoasi safida Monrealga yoʻl olib, IPC jahon chempionatida ishtirok etdi. U yerda 3 ta medalni qoʻlga kiritdi, bular 200 metrga erkin usulda suzish boʻyicha oltin, 200 metrga kompleks suzish bahsida kumush va 100 metrga erkin usulda suzish yoʻnalishida bronza medallari edi[6].

Applegate 2016-yilda Rio-de-Janeyroda oʻtkazilgan Paralimpiada oʻyinlarida Buyuk Britaniya sharafini himoya qilib, ayollar oʻrtasida S14 toifasida 200 metrga erkin usul va SM14 toifasida 200 metrga kompleks suzish bahslarida kumush, S14 toifasida 100 metrga chalqancha usulda suzish yoʻnalishida esa bronza medalini qoʻlga kiritdi[9][10].

Applegate oʻzining uchinchi Paralimpiada musobaqalari uchun ham tanlab olinib, 2021-yil iyul oyida kechiktirilgan 2020-yilgi Tokio Paralimpiadasida ishtirok etdi. Tokioda sportchi aralash jamoaviy bahslarning 4×100 metrga erkin usulda estafetasi (S14) yoʻnalishida oltin medal, shuningdek, ayollar oʻrtasida 200 metrga erkin usul (S14) hamda 100 metrga chalqancha usul (S14) yoʻnalishida bronza medallariga ega chiqdi[11][12][13][14].

Manbalar

  1. ↑ „APPLEGATE Jessica-Jane“. Paralympic.org.
  2. ↑ „2013 New Year's Honours“. Qaraldi: 2012-yil 29-dekabr.
  3. ↑ 3,0 3,1 „Meet The Team – Jessica-Jane Applegate“. swimming.org. Qaraldi: 2012-yil 2-sentyabr.
  4. ↑ 4,0 4,1 Pearce. „Jessica-Jane Applegate become first intellectually disabled Brit to win gold at 2012 Paralympic Games“. The Daily Telegraph (2012-yil 2-sentyabr). Qaraldi: 2012-yil 2-sentyabr.
  5. ↑ „Disabled athlete's funding boost“. greatyarmouthmercury.co.uk (2010-yil 30-yanvar). 2016-yil 14-avgustda asl nusxadan arxivlangan. Qaraldi: 2012-yil 8-sentyabr.
  6. ↑ 6,0 6,1 6,2 „Jessica-Jane Applegate“. paralympics.org.uk. 2012-yil 2-sentyabrda asl nusxadan arxivlangan. Qaraldi: 2012-yil 2-sentyabr.. paralympics.org.uk. Archived from the original (Wayback Machine saytida 2012-09-02 sanasida arxivlangan) on 2 September 2012. Retrieved 2 September 2012.
  7. ↑ Pinniger. „British Gas Swimming Championships 2012“. cityofnorwichsc.co.uk. 2014-yil 2-fevralda asl nusxadan arxivlangan. Qaraldi: 2012-yil 2-sentyabr.
  8. ↑ „Hynd brothers reach podium on day two“. swimming.org (2012-yil 31-avgust). Qaraldi: 2012-yil 2-sentyabr.
  9. ↑ „Relive a magical day for ParalympicsGB“. BBC Sport (2016-yil 11-sentyabr). Qaraldi: 2022-yil 10-avgust.
  10. ↑ „Paralympics 2016: Day 10“. BBC Sport (2016-yil 17-sentyabr). Qaraldi: 2022-yil 10-avgust.
  11. ↑ Armstrong. „Yarmouth swimmer Jessica-Jane Applegate named in Paralympic team“ (en-UK). Eastern Daily Press (2021-yil 1-iyul). Qaraldi: 2021-yil 4-iyul.
  12. ↑ „Tokyo Paralympics: Maisie Summers-Newton and mixed relay team add swimming golds“. BBC Sport (2021-yil 28-avgust). Qaraldi: 2022-yil 10-avgust.
  13. ↑ „Tokyo Paralympics: Bethany Firth takes silver in S14 200m freestyle final“. BBC Sport (2021-yil 27-avgust). Qaraldi: 2022-yil 10-avgust.
  14. ↑ „Tokyo Paralympics: Dan Pembroke, Bethany Firth and Ben Watson win golds for Great Britain“. BBC Sport (2021-yil 2-sentyabr). Qaraldi: 2022-yil 10-avgust. 
"https://ziyosfera.uz/index.php?title=Jessica-Jane_Applegate&oldid=521031" dan olindi