Jean-Claude Pascal

Jean-Claude Pascal
Jean-Claude Pascal
	; Pascal 1945-yilda
Umumiy maʼlumot
Tavalludi	Jean-Claude Villeminot; 24-oktyabr 1927-yil; Parij, Fransiya
Vafoti	5-may 1992-yil ; (64 yoshda); Clichy, Fransiya

Jean-Claude Villeminot (1927-yil 24-oktyabr — 1992-yil 5-may) fransuz komigi, aktyori, xonandasi va yozuvchisidir. Jean-Claude Pascal taxallusi bilan tanilgan.

Yoshligi

Pascal Parij shahrida, badavlat toʻqimachilik sanoatchilari oilasida dunyoga kelgan. Uning onasi Arlette Lemoine ingliz modelyeri Charles Frederick Worthning chevarasi boʻlgan. Otasi Roger Villeminot esa u tugʻilgan yili vafot etgan^[1].

U oʻrta taʼlimni 1938-yilda Compiègne shahridagi Kollej Annelda boshlagan hamda Parijdagi Janson-de-Sailly litseyida yakunlagan. 1944-yilda 17 yoshida Pascal general Philippe Leclerc de Hauteclocque boshchiligidagi 2-zirhli diviziyaga koʻngilli boʻlib xizmatga kirgan. 1944-yil noyabr oyida Vermaxt shaharni evakuatsiya qilayotgan bir paytda, u Strasbourg shahriga birinchilardan boʻlib kirgan fransuz askari boʻlgan. Ushbu jasorati uchun u 1945-yilda Harbiy xoch (Croix de Guerre) ordeni bilan mukofotlangan^[2].

Faoliyati

Strasbourgdagi ikkinchi jahon urushi voqealaridan omon chiqqan Pascal aktyorlikni boshlashdan oldin Sorbonna universitetida tahsil olgan, soʻngra Christian Dior modalar uyi uchun kiyim-kechak dizayneri boʻlib ishlagan. „Don Juan“ pyesasining teatr sahnalashtiruvi uchun kostyumlar ustida ishlayotgan paytda u aktyorlik sanʼatiga qiziqib qolgan. Uning kinodagi debyut roli „Le jugement de Dieu“ (1949-yilda suratga olingan, 1952-yilda namoyish etilgan) filmida boʻlgan. Shundan soʻng u 1951-yilda Anouk Aimée bilan birgalikda „Le rideau cramoisi“ filmida suratga tushgan. Keyinchalik u Romy Schneider bilan birgalikda „Die schöne Lügnerin“ („Goʻzal yolgʻonchi“, 1959-yil) hamda Michèle Mercier bilan „Anjelika va sulton“ (1968-yil) kabi bir qator filmlarda turli rollarni ijro etgan.

Pascal 1961-yilgi Eurovision qoʻshiq tanlovida Lyuksemburg sharafini himoya qilib, bastakor Jacques Datin va shoir Maurice Vidalin muallifligidagi „Nous les amoureux“ („Biz oshiqlar“) qoʻshigʻi bilan gʻoliblikni qoʻlga kiritgan. Ushbu tarona xonanda va uning sevgilisi oʻrtasidagi toʻsiqlarga uchragan sevgi qissasi haqida hikoya qiladi („ular bizni ayirmoqchi, baxtli boʻlishimizga xalaqit bermoqchi“). Qoʻshiq matni davomida bu munosabatlar boshqalar tomonidan rad etilishi, ammo baribir bir kun kelib bu sevgi gʻalaba qozonishi aytiladi („lekin oʻsha vaqt keladi… va men seni shaharda hech kim gap-soʻz qilmasdan seva olaman… Tangri bizga baxt va shodlik huquqini bergan“). Keyinchalik Pascal ushbu qo‘shiq o‘zining gey munosabatlari va bu munosabatlar tufayli duch kelgan qiyinchiliklari haqida ekanligini oshkor qilgan. 1960-yillarning boshlarida bu mavzu oʻta ziddiyatli hisoblangani sababli, qoʻshiq matni ramziy maʼnoda yozilgan boʻlib, oshiqlarning jinsiga toʻgʻridan-toʻgʻri ishora qilinmagan. Bu esa qoʻshiqning asl gʻoyasini yashirishga imkon bergan va oʻsha paytda keng jamoatchilik uning tub mohiyatini aynan shu maʼnoda tushunmagan^[3]. Garchi Pascal hayotlik chogʻida buni rasman ochiq tan olmagan boʻlsa-da, uning oʻzi ham gey boʻlgan^[4].

Keyinchalik u 1981-yilgi Eurovision tanlovida yana Lyuksemburg nomidan qatnashgan hamda Sophie Makhno va Jean-Claude Petit bilan birgalikda bastalagan „C'est peut-être pas l'Amérique“ („Bu balki Amerika emasdir“) qoʻshigʻi bilan 20 ta ishtirokchi orasida 11-oʻrinni egallagan. Pascal 1992-yilda Clichy shahrida 64 yoshida meʼda saratoni kasalligidan vafot etgan.

Diskografiyasi

„Lili Marleen“ (fransuz va nemis tillarida)
„Nous les amoureux“
„C’est peut-être pas l’Amérique“

Manbalar

↑ „Charles Frederick Worth, le "père de la haute couture"“ (fr). Jean-Claude Pascal, Portrait (2017-yil 25-dekabr). Qaraldi: 2021-yil 23-dekabr.
↑ Billaut, François „Charles Frederick Worth, le "père de la haute couture"“ (fr). Point de Vue (2020). 2015-yil 12-mayda asl nusxadan arxivlangan. Qaraldi: 2021-yil 23-dekabr.
↑ „" Nous les amoureux " de Jean-Claude Pascal, une chanson qui annonce la revolution du mouvement gay...“ (fr). La Premiere (2019-yil 16-may). Qaraldi: 2020-yil 3-may.
↑ Minsitru, Sebastien „"Nous les amoureux" de Jean-Claude Pascal, une chanson qui annonce la revolution du mouvement gay...“ (fr). RTBF (2019-yil 16-may). Qaraldi: 2021-yil 23-dekabr.

Havolalar

Jean-Claude Pascal Myspace web-sahifasi: https://www.myspace.com/jeanclaudepascal
Jean-Claude Pascal at IMDb

[1] „Charles Frederick Worth, le "père de la haute couture"“ (fr). Jean-Claude Pascal, Portrait (2017-yil 25-dekabr). Qaraldi: 2021-yil 23-dekabr.

[2] Billaut, François „Charles Frederick Worth, le "père de la haute couture"“ (fr). Point de Vue (2020). 2015-yil 12-mayda asl nusxadan arxivlangan. Qaraldi: 2021-yil 23-dekabr.

[3] „" Nous les amoureux " de Jean-Claude Pascal, une chanson qui annonce la revolution du mouvement gay...“ (fr). La Premiere (2019-yil 16-may). Qaraldi: 2020-yil 3-may.

[4] Minsitru, Sebastien „"Nous les amoureux" de Jean-Claude Pascal, une chanson qui annonce la revolution du mouvement gay...“ (fr). RTBF (2019-yil 16-may). Qaraldi: 2021-yil 23-dekabr.

[1]

[2]

[3]

[4]