Jahon dinlari
Jahon dinlari — jahondagi juda koʻp xalqlar eʼtiqod qiladigan buddizm, xristianlik va islomga nisbatan ishlatiladigan termin. Jahon dinlari jamiyat taraqqiyotining turli bosqichlarida buyuk tarixiy burilishlar, bir ijtimoiy-iqtisodiy tuzumdan ikkinchisiga oʻtish davrlarida vujudga kelgan. Jahon dinlari tarixiy jarayonda jahon imperiyalari, davlatlar tarkib topayotgan paytlarda paydo boʻlgan. Jahon dinlariga prozelitizm, faol targʻibotchilik xosdir, ularning targʻibotlari xalqlar va millatlararo diniy bagʻrikenglikka asoslangan. Bu dinlarning Jahon dinlariga aylanishida barcha odamlarning tengligi toʻgʻrisidagi gʻoya asosiy omillardan biri boʻlgan. Muayyan tarixiy sharoitlarda Jahon dinlarining har xil yoʻnalishlari, oqimlari vaqt oʻtishi bilan maʼlum millatlar yoki davlatlar diniga aylangan. Hozirgi globallashuv sharoitida Jahon dinlarining taʼlimotlari, qadriyatlarini jahon xalqlari tomonidan oʻrganishga qiziqish ortib bormoqda[1].
Manbalar
- ↑ Najmiddinov, Karimov, Turdiyeva 2017, s. 204.
Adabiyotlar
- Najmiddinov J., Karimov J., Turdiyeva D.. Dinshunoslik. Qomusiy lugʻat. Imom Buxoriy xalqaro markazi nashriyoti, 2017 — 480-bet. ISBN 978-9943-5105-3-1.