Imom Termiziy xalqaro ilmiy-tadqiqot markazi
 | |
| Ishga tushgan sanasi | 2017-yil 14-fevral |
|---|---|
| Joylashuvi | Surxondaryo viloyati, Termiz shahri, Shimoliy darvoza koʻchasi 3-uy |
| Hududiy xizmati |
 Oʻzbekiston |
| Hamkor tashkilotlari |
Imom Buxoriy xalqaro ilmiy-tadqiqot markazi Imom Moturidiy xalqaro ilmiy-tadqiqot markazi Oʻzbekiston islom sivilizatsiyasi markazi |
| Til(lar)i | Oʻzbek |
| Vebsayti | termiziy.uz |
Imom Termiziy xalqaro ilmiy-tadqiqot markazi – Oʻzbekiston Respublikasi Prezidentining 2017-yil 14-fevraldagi „Imom Termiziy xalqaro ilmiy-tadqiqot markazini tashkil etish chora-tadbirlari toʻgʻrisida“gi PQ-2774-sonli qarori asosida tashkil etilgan.[1] Markazda taxminan 40 nafar xodim faoliyat yuritadi.
Maqsad va vazifalari
Markazning asosiy maqsadi Abu Iso Termiziy (Imom Termiziy) va Termiziy allomalarning ilmiy merosini oʻrganish va targʻib qilish, milliy va diniy qadriyatlarni saqlash va rivojlantirish hamda yosh avlodni tarbiyalashdir.
Markazning asosiy vazifalari:
- Islom dini, Qur’on va hadis ilmining ilmiy tadqiqotlarini olib borish, Imom Termiziy va boshqa mutafakkirlarning merosini oʻrganish va nashr qilish;
- Maʼnaviy-axloqiy tarbiya va diniy taʼlim uchun zarur darsliklar, qoʻllanmalar va ilmiy tavsiyalar tayyorlash;
- Xorijiy ilmiy markazlar va tashkilotlar bilan hamkorlik, xalqaro konferensiya, simpozium, koʻrgazma, seminar-trening va tanlovlar tashkil etish;
- Qoʻlyozmalar va toshbosma asarlarni toʻplash, kataloglash va ilmiy tadqiqotlarini amalga oshirish;
- Zamonaviy axborot-kommunikatsiya texnologiyalaridan foydalanib, maʼnaviy merosni oʻrganish va targʻib qilish.
Boʻlimlari
Ilmiy tadqiqotlar boʻlimi
Ilmiy tadqiqotlar boʻlimi islom dini, Qur’on va hadis ilmi, hadisshunoslik maktablari hamda Termiziy allomalarning merosini tadqiq qiladi. Boʻlimda 6 nafar ilmiy xodim faoliyat yuritadi.
Boʻlim tomonidan xalqaro va mahalliy ilmiy jurnallar, konferensiyalar va nashrlarda 200 dan ortiq maqola, shuningdek 2017–2022 yillarda 58 ta kitob, risola va darsliklar nashr qilingan.
Maʼnaviy-maʼrifiy targʻibot boʻlimi
Bu boʻlim Oʻzbekiston milliy teleradiokompaniyasi bilan hamkorlikda koʻrsatuvlar va radioeshittirishlar tayyorlaydi, shuningdek OTM va yoshlar orasida maʼnaviy-maʼrifiy tadbirlar oʻtkazadi.
Xalqaro aloqalar va ziyorat turizmini rivojlantirish boʻlimi
Boʻlim markazning xalqaro aloqalarini muvofiqlashtiradi, xorijiy ilmiy markazlar bilan hamkorlik qiladi va xalqaro konferensiyalar, koʻrgazmalar hamda seminarlar tashkil etadi.
Boʻlim tomonidan 30 ga yaqin xalqaro va mahalliy konferensiyalar tashkil etilgan, 10 dan ortiq memorandumlar imzolangan va xodimlar 100 ga yaqin xalqaro ilmiy tadbirda ishtirok etgan.
Axborot-resurs markazi
Axborot-resurs markazi Termiziy allomalar va boshqa mutafakkirlar qoʻlyozma va toshbosma asarlarini toʻplab, elektron bazalarni shakllantiradi. Boʻlimda 2 nafar xodim faoliyat yuritadi. Markaz fondida 100 ga yaqin toshbosma va 500 ga yaqin qoʻlyozma asarlar elektron shaklda mavjud.
Axborot-texnologiyalar va multimedia boʻlimi
Bu boʻlim zamonaviy axborot-kommunikatsiya texnologiyalaridan foydalanib, markazning ilmiy faoliyatini onlayn va ijtimoiy tarmoqlarda targʻib qiladi. Boʻlimda 4 nafar xodim ishlaydi va 1500 dan ortiq maʼlumotlar, videolar, infografiklar va rasmlar joylashtirilgan.
Havolalar
- YouTube
- YouTube
- Web archive (Wayback Machine saytida 2023-02-09 sanasida arxivlangan)
- President.uz
- Lex.uz
- YouTube