Halykberdy Ataýew
| Halykberdy Ataýew | |
|---|---|
| Tavalludi |
1942-yil |
| Fuqaroligi |
 Turkmaniston |
| Taʼlimi | Turkmaniston universiteti |
| Kasbi | yurist |
Halykberdy Ataýew (talaffuzi: Xoliqberdi Atayev; 1942-yil, Qipchoq qishlogʻi, Ashxobod etrapi, Ashxobod viloyati, Turkmaniston SSR, SSSR) — turkman davlat arbobi. Turkmaniston tashqi ishlar vaziri (1992—1995). Turkmaniston Konstitutsiyasini ishlab chiqqan shaxslardan biri. Sudning mamlakat Adliya vazirligidan mustaqil boʻlish tarafdori[1].
Tarjimayi holi
Halykberdy Ataýew 1942-yilda Ashxobod etrapidagi Qipchoq qishlogʻida tugʻilgan. 1963-yilda Turkmaniston davlat universitetining huquqshunoslik fakultetini tamomlab, yurist mutaxassisligini olgan. Universitetni tamomlagach, 1963—1968-yillarda Turkmaniston SSR Oliy sudi sud organlari boshqarmasining taftishchisi, soʻngra shikoyatlar boʻlimining katta maslahatchisi lavozimida ishlagan. 1968—1970-yillarda Nebitdogʻ shahar xalq sudyasi, 1970—1972-yillarda Tejen etrapi xalq sudining katta xalq sudyasi boʻlgan. 1972—1974-yillarda Turkmaniston SSR Oliy sudi aʼzosi. Undan keyin esa oʻn besh yil davomida (1974—1988) Krasnovodsk viloyati sudining raisi boʻlgan. 1988—1989-yillarda Turkmaniston SSR Adliya vazirining oʻrinbosari, 1989—1991-yillarda Turkmaniston SSR adliya vaziri lavozimida faoliyat yuritgan. 1991-yildan 1992-yil 4-avgustgacha Turkmaniston Oliy sudi raisi boʻlgan. 1992-yil 4avgustdan 1995-yil 6-yanvargacha Turkmaniston tashqi ishlar vaziri, 1995-yil 6-yanvardan 1997-yil 4-fevralgacha Turkmaniston ijtimoiy taʼminot vaziri lavozimida ishlagan[2][3]. 1997-yil 4-fevralda faoliyatida yoʻl qoʻygan jiddiy kamchiliklari uchun ishdan boʻshatilgan. Yetti farzandning otasi[1]. Tashqi ishlar vaziri lavozimida Ataýewdan oldin ishlagan Awdy Kulyýewning soʻzlariga koʻra, Ataýew prezident Saparmurod Niyozovning uzoq qarindoshi boʻlgan[4].
Mukofotlari
Halykberdy Ataýew „Vatanga muhabbat uchun“ medali (1996) bilan taqdirlangan.
Manbalar
- ↑ 1,0 1,1 „Х. Атаев: «У Туркменистана должны быть особые отношения с Россией»“. Интерфакс-Религия (1992-yil 10-avgust). 2025-yil 3-mayda asl nusxadan arxivlangan. Qaraldi: 2026-yil 12-aprel.
- ↑ The Statesman’s Year-Book.. London: Palgrave Macmillan, 1996 — 1272-bet. ISBN 978-1-349-39717-4.
- ↑ The Statesman’s Year-Book.. London: Palgrave Macmillan, 1997 — 1269-bet. ISBN 978-1-349-39858-4.
- ↑ Авды Кулиев. „Туркменская элита — взгляд изнутри“. Информационно-аналитический центр «Евразия» (2001-yil 20-mart). 2026-yil 12-aprelda asl nusxadan arxivlangan. Qaraldi: 2026-yil 12-aprel.