Gümüshtekin

Gümüshtekin (1177-yil sentyabrda vafot etgan) Zangiylar imperiyasida yuqori lavozimlarni egallagan xojasaroy boʻlgan. Halab atabegi Nuriddin Gümüshtekinni Iroqning Mosul shahriga oʻz noibi etib tayinlagan. Nuriddin 1174-yilda vafot etgach, Gümüshtekin uning voyaga yetmagan oʻgʻli as-Solih Ismoil al-Malikning vasiyligini oʻz zimmasiga olgan va uni Damashqdan Halabga olib ketgan. As-Solihning amakivachchasi, Mosul hukmdori Sayfiddin Gʻoziy II bilan Damashqni egallab olgan Ibn al-Muqaddamga qarshi ittifoq tuzgan. Ibn al-Muqaddam esa Ayyubiylar sulolasidan boʻlgan Misr hukmdori Salohuddin al-Ayyubiydan yordam soʻrab, shaharni unga topshirgan. As-Solih Gümüshtekinga Haram shahrini iqto qilib bergan.

Halab va unga tutash hududlar hokimi boʻlgan Gümüshtekin 1176-yilda Bohemond III bilan kelishuv tuzib, Raynald de Shatilonni, shuningdek Joselin III va boshqa barcha nasroniy asirlarni ozod etishga rozi boʻlgan. Biroq, Gümüshtekin as-Solih ustidan taʼsirini kuchaytirish maqsadida uning vazirini suiqasd yoʻli bilan oʻldirtirgach, franklar yoki salibchilar bilan yashirin muzokaralar olib borganlikda ayblanib, qiynoqqa solingan va 1177-yil sentyabrda Haram devorlari oldida qatl etilgan.

Adabiyotlar

• Barber, Malcolm. The Crusader States. Yale University Press, 2012. ISBN 978-0-300-11312-9. 
• Holt, Peter Malcolm. The Age Of The Crusades-The Near East from the eleventh century to 1517. Pearson Longman, 1986. ISBN 978-0-58249-302-5. 
• Köhler, Michael A.. Alliances and Treaties between Frankish and Muslim Rulers in the Middle East: Cross-Cultural Diplomacy in the Period of the Crusades. Brill Publishers, 2013. ISBN 978-90-04-24857-1. 
• Lyons, M. C.; Jackson, D. E. P.. Saladin: the Politics of the Holy War. Cambridge University Press, 1982. ISBN 978-0-521-31739-9. 
• Runciman, Steven. A History of the Crusades, Volume II: The Kingdom of Jerusalem and the Frankish East. Cambridge: Cambridge University Press, 1952.