Mosul

Mosul, al-Mavsil (arabcha: الموصل‎‎) – Iroqning shimoliy qismidagi shahar. Dajla daryosi boʻyida. Naynova muhofazasining maʼmuriy markazi. Aholisi 670 ming kishi (1990-yillar oʻrtalari). Gʻalla, meva, chorva mollari bilan savdo qilinadigan muhim markaz. Transport yoʻllari tuguni. Toʻqimachilik (muslin gazlamasi ishlab chiqarish), oziq-ovqat, koʻn-poyabzal, metallsozlik, sement sanoati korxonalari mavjud. Universitet, tarix va boshqa muzeylar bor. Mosul yaqinidan oltingugurt va neft qazib olinadi.

Mosul VI asrda vujudga kelgan. 641-yil uni arablar egallagan. Umaviylar va Abbosiylar davrida Sharqning savdo hamda hunarmandchilik markazi boʻlgan. X—XII asrlarda turli davlatlar poytaxti. 1095—96-yillar Mosulni Saljuqiylar egallagan. 1261-yilda moʻgʻullar hujumiga uchragan. XIV asrning 2-yarmidan Temuriylar, 1514—1918-yillar Usmonli turk saltanati tarkibida boʻlgan. 1920-yildan Iroq tarkibida.

Mosulda al-Jomiʼ al-kabir madrasasi (minorasi bilan) (1170—72), al-Izziya madrasasi (XII asr), Qorasaroy qalʼasi harobalari (XIII asr) va boshqa, shahar yaqinida Nabi Yunus maqbara-masjidi (X asr) bor.