Kontent qismiga oʻtish

Futbol boʻyicha 2026-yilgi jahon chempionati finalidagi tanaffus shousi

ZiyoSfera, erkin ensiklopediya
Futbol boʻyicha 2026-yilgi jahon chempionati finalidagi tanaffus shousi
Sana 2026-yil 19-iyul (2026-07-19)
Joylashuv East Rutherford, New Jersey
Joy nomi MetLife Stadium
Ijrochilar
Maxsus mehmonlar
Rejissyor Hamish Hamilton
Prodyuserlar

Futbol bo‘yicha 2026-yilgi jahon chempionati finalidagi tanaffus shousi 2026-yil 19-iyul kuni Amerika Qo‘shma Shtatlarining New Jersey shtati East Rutherford shahridagi MetLife stadionida bo‘lib o‘tdi. Bu Jahon chempionati tarixidagi ilk tanaffus shousi bo‘ldi. Hamish Hamilton rejissyorlik qilgan ushbu shouda Madonna, Shakira, BTS va Justin Bieber bosh ijrochi sifatida ishtirok etdi, shuningdek, unda bir qator mehmon san’atkorlar ham qatnashdi. Tadbir FIFA va Global Citizen tashkilotlari hamkorligida ishlab chiqildi. Uning asosiy maqsadi FIFA Global Citizen Education Fund jamg‘armasi uchun 100 million AQSh dollari yig‘ish bo‘lib, ushbu jamg‘arma qashshoqlikning keskin shakllariga barham berish hamda bolalarning sport bilan shug‘ullanish imkoniyatlarini kengaytirishga qaratilgan.

Shou sportning tijoratlashuvi va amerikachalashuvi bilan bog‘liq xavotirlar sabab jamoatchilik eʼtiboriga tushdi. Xususan, shou FIFA ning tanaffus 15 daqiqadan oshmasligi haqidagi qoidasini buzganligi yuzasidan tanqid qilindi.

Tarixi

Shou kuratori Chris Martin

2024-yil fevral oyida amerikalik musiqachi Usher bosh ijrochi sifatida ishtirok etgan Super Bowl LVIII tanaffus shousidan avval[1], The Athletic nashri jurnalisti Greg O'Keeffe FIFA Jahon chempionati yoki UEFA Chempionlar ligasi kabi futbol musobaqalarida ham shunga oʻxshash chiqishlar oʻtkazish maqsadga muvofiqmi, degan savolni oʻrtaga tashlagan maqola eʼlon qildi[2]. Marketing boʻyicha maslahatchi Tim Crow esa FIFA va UEFA homiylari boʻlgan bir qator brendlar bilan ishlashini aytib, ushbu tashkilotlar „ikkalasi ham tanaffus vaqtini uzaytirish gʻoyasini koʻzlab kelmoqda“, deya taʼkidladi[2]. 2024-yilda Global Citizen tashkilotining hammuassisi Hugh Evans FIFA prezidenti Gianni Infantinoga 2025-yilgi Klublar oʻrtasidagi jahon chempionati finalida tanaffus shousini oʻtkazish gʻoyasini taklif qildi. U buni „ushbu jarayon orqali nimalarni oʻrganishimiz mumkinligini koʻrish, shuningdek, FIFA Global Citizen Education Fund faoliyatini yoʻlga qoʻyish imkoniyati“ sifatida baholadi"[3]. Shou 2025-yil iyun oyida rasman eʼlon qilindi va FIFA Jahon chempionati tarixidagi ilk tanaffus shousiga aylandi. U Global Citizen hamda Global Citizen Festival kuratori, Coldplay guruhi aʼzosi Chris Martin bilan hamkorlikda ishlab chiqildi[4]. Bundan tashqari, Evans va Martin 2026-yilgi Jahon chempionatidagi tanaffus shousi gʻoyasini Hamish Hamilton va Ben Winston kabi bir qator prodyuserlar bilan ham muhokama qildi[3].

2024-yil 28-sentyabrda FIFA va Global Citizen toʻrt yillik hamkorlik toʻgʻrisidagi kelishuvni eʼlon qildi. Hamkorlikning asosiy maqsadi dunyo boʻylab oʻta qashshoqlikka barham berishga koʻmaklashish hamda bolalarning sport va sifatli taʼlimdan foydalanish imkoniyatlarini kengaytirishdan iborat edi[5]. Shu bilan birga, tomonlar 2026-yilgi Jahon chempionati finali doirasida New Jersey shtatining East Rutherford shahridagi MetLife stadionida boʻlib oʻtadigan Jahon chempionati tarixidagi ilk tanaffus shousini hamkorlikda tashkil etishini ham maʼlum qildi[5]. 2025-yil 5-mart kuni FIFA Coldplay guruhi tanaffus shousida ishtirok etadigan ijrochilar roʻyxatini shakllantirishda yordam berishini eʼlon qildi[6]. FIFA prezidenti Gianni Infantino bu haqda shunday dedi: „Bu FIFA Jahon chempionati tarixidagi unutilmas lahza va dunyoning eng yirik sport tadbirlariga munosib shou boʻladi“[7]. Global Citizen hammuassisi Hugh Evans esa shouni „sport, musiqa va madaniyatni birlashtiradigan, futbolning barchamizni birlashtirishdagi betakror qudratini nishonlaydigan, tarixdagi ilk va yangi bosqichni boshlab beradigan voqea“ deya taʼrifladi[7].

Eʼlon qilinishi

Finaldagi tanaffus shousining bosh ijrochilari: Madonna, Shakira, Justin Bieber va BTS.

2026-yil 13-may kuni amerikalik xonanda Madonna, kolumbiyalik xonanda Shakira va Janubiy Koreyaning BTS guruhi tanaffus shousining bosh ijrochilari boʻlishi eʼlon qilindi. Shuningdek, shouda The Muppets hamda Sesame Street qahramonlari ham ishtirok etishi maʼlum qilindi[8][9]. Bu haqdagi eʼlon ijtimoiy tarmoqlarda eʼlon qilingan videorolik orqali berildi. Unda shou kuratori Chris Martin The Muppets va Sesame Street qahramonlari ishtirokida ijrochilarni tanishtirdi[10]. Shuningdek, Live Nation Entertainment va Done+Dusted kompaniyalari shouning hamkor prodyuserlari sifatida eʼlon qilindi[9]. Oʻsha kunning oʻzida ijrochilar tarkibi New York shahrida oʻtkazilgan Global Citizen NOW Summit sammitida rasman taqdim etildi. Tadbirda Gianni Infantino, Hugh Evans, sobiq futbolchi Kaká hamda Shakira ishtirok etdi[11].

FIFA va Global Citizen shoudan koʻzlangan maqsad FIFA Global Citizen Education Fund uchun 100 million AQSh dollari yigʻish ekanini maʼlum qildi[8]. Global Citizen vakillarining The Athletic nashriga tasdiqlashicha, Madonna, Shakira va BTS chiqishlari uchun gonorar olmagan, chunki ular „ijtimoiy adolat yoʻlida faoliyat yurituvchi tashkilot uchun oʻz vaqtini begʻaraz bagʻishlagan“[12]. Matbuot bayonotida Madonna FIFA Global Citizen Education Fundni qoʻllab-quvvatlash imkoniyatini „juda katta maʼno kasb etadigan ish“ deb atadi[9]. Shakira esa shunday dedi: „Butun umrim davomida ikki ish bilan shugʻullandim — qoʻshiqlar yaratish va maktablar qurish. FIFA Jahon chempionatida esa bu ikki yoʻl birlashadi“[9]. 2026-yil 8-iyul kuni FIFA kanadalik xonanda Justin Bieber ham shouning bosh ijrochilaridan biri sifatida ishtirok etishini eʼlon qildi. Shuningdek, Burna Boy, Gustavo Dudamel, PS22 Chorus va Coldplay mehmon ijrochilar sifatida sahnaga chiqishi maʼlum qilindi[13]. Done+Dusted kompaniyasi vakili Guy Carrington shou eʼlon qilingan dasturdan tashqari yana bir qator kutilmagan syurprizlarni ham oʻz ichiga olishini aytdi[14].

Madonna futbol ishqibozi ekanini aytib, tanaffus shousida ishtirok etishni oʻzi istaganini maʼlum qildi. U bu haqda: „Bir yildan ortiq vaqt davomida menejerimni bu masalada tinmay bezovta qilib keldim“, dedi[15]. Shakira va Burna Boy turnirning rasmiy qoʻshigʻi boʻlgan „Dai Dai“ni yozib, 2026-yil 14-may kuni taqdim etdi[16]. U 2026-yil 5-iyunda chop etilgan turnirning rasmiy musiqiy toʻplami — Official FIFA World Cup 2026 Album tarkibiga ham kiritildi[17]. 2026-yil 11-iyun kuni Shakira va Burna Boy ushbu qoʻshiqni Mexiko shahrida boʻlib oʻtgan 2026-yilgi Jahon chempionatining ochilish marosimida ijro etdi[18]. Shakira keyinchalik mazkur qoʻshiqni finaldagi tanaffus shousida ham kuylashini maʼlum qildi[9]. 2026-yil 25-iyun kuni FIFA Official FIFA World Cup 2026 Album albomining Bonus Edition talqinini chiqardi. Unga Madonna va Feid tomonidan Madonnaning oʻn beshinchi studiyaviy albomi Confessions II uchun yozilgan „Read My Lips“ qoʻshigʻining FIFA version nomli maxsus talqini ham kiritildi[19].

Tayyorlanishi

Tanaffus shousi vaqtidagi MetLife stadioni.

Shouga Hamish Hamilton rejissyorlik qildi. U avvalroq 2010-yildan buyon har bir Super Bowl tanaffus shousiga rejissyorlik qilgan. Shou barcha ijrochilar bilan hamkorlikda bir necha oy davomida tayyorlandi. Done+Dusted vakili Guy Carrington uni „ixcham, yuqori darajada muvofiqlashtirilgan mega-miks“ deya taʼrifladi. Shouning dunyo miqyosidagi vakillik ruhini aks ettirishi hamda „hamkorlik va birdamlikning chinakam lahzasi“ni yaratish maqsadida Chris Martin turli mamlakatlardan ijrochilarni jalb qildi. Maysaga zarar yetkazmaslik va uchrashuvning oʻziga salbiy taʼsir koʻrsatmaslik uchun prodyuserlar maydon yuzasiga katta himoya qoplamasini toʻshashni rejalashtirdi hamda barcha ishtirokchilarga yengil poyabzal kiyishni buyurdi[14]. Sahna konstruksiyalari va kamera aravachalarini oʻz ichiga olgan chiqish maydoni imkon qadar tez yigʻilib va demontaj qilinadigan tarzda loyihalashtirildi. Bu ishlab chiqarish guruhiga uni 3–4 daqiqa ichida oʻrnatish va olib tashlash imkonini berdi[20].

2026-yil 14-may kuni BBC Sport nashri tanaffus shousi 11 daqiqa davom etishi rejalashtirilganini xabar qildi[8]. The Atlantic nashrining yozishicha, FIFA 2025-yilgi Klublar oʻrtasidagi jahon chempionati finalidagi tanaffus shousidan farqli ravishda, bu safar shou uchun MetLife stadionining oʻyin maydonidan foydalanishni rejalashtirgan. Avvalgi shou oʻyin maydoniga taʼsir koʻrsatmaslik maqsadida tribunalar yuqori qismida qurilgan sahnada oʻtkazilgan edi[21]. Shuningdek, tanaffus futbol oʻyinlari uchun Xalqaro futbol assotsiatsiyalari kengashi tomonidan belgilangan 15 daqiqalik meʼyordan sezilarli darajada uzoq davom etishi kutilayotganini ham maʼlum qildi[21]. 2026-yil 14-iyul kuni BBC Sport tanaffus 20–25 daqiqa davom etishi, 11 daqiqalik shou esa odatiy 15 daqiqalik tanaffus yakunlanganidan keyin boshlanishi rejalashtirilganini xabar berdi[22]. Biroq The Atlantic FIFA tanaffus umumiy davomiyligi 20 daqiqadan oshmasligini maqsad qilganini yozdi[23]. 2026-yil 17-iyul kuni FIFA teletranslyatorlarga tanaffus jami 18 daqiqa davom etishini maʼlum qildi. Shundan 7 daqiqasi sahnani oʻrnatishga, qolgan 11 daqiqasi esa shouning oʻziga ajratilgan edi[24].

Shou bir necha qismga boʻlingan boʻlib, har bir ijrochiga oʻz chiqishi uchun taxminan 1 daqiqa 45 soniya vaqt ajratildi[20]. Shuningdek, shou davomida Ted Lasso teleserialidagi qahramonlari — |Ted Lasso va Willis Beard obrazlarida Jason Sudeikis hamda Brendan Hunt kutilmagan tarzda sahnaga chiqib, Justin Bieberni chiqishi oldidan „ruhlantirdi“[25].

Qabul qilinishi

Eʼlon atrofidagi bahslar

Shouning eʼlon qilinishi ommaviy axborot vositalari hamda futbol jamoatchiligi orasida bahs-munozaralarga sabab boʻldi. Koʻpchilik buni futbolning tijoratlashuvi sifatida baholadi[26][27][28][29]. CNN jurnalisti Ben Churchning taʼkidlashicha, futbolning „anʼanaviy tarafdorlari“ buni „sportning asl mohiyatidan shu qadar uzoqlashgan hodisa ediki, u deyarli aql bovar qilmas va muqaddaslikka ziddek tuyuladi“, deb qabul qilgan[26]. Shuningdek, uchrashuv tanaffusi Xalqaro futbol assotsiatsiyalari kengashi tomonidan belgilangan 15 daqiqalik meʼyorni buzishi mumkinligi yuzasidan ham xavotirlar bildirildi. IFAB qoidalariga koʻra, tanaffus 15 daqiqadan oshmasligi, faqat hakamning ruxsati bilan oʻzgartirilishi mumkin. Chunki tanaffusning choʻzilishi futbolchilarning odatiy tayyorgarlik jarayoni va tiklanishiga salbiy taʼsir koʻrsatishi mumkin. Taqqoslash uchun, 2024-yilgi Copa América finali hamda 2025-yilgi Klublar oʻrtasidagi jahon chempionati finalidagi tanaffuslar 24 daqiqagacha davom etgan[28][27].

Tim Crow bu borada shunday dedi: „Futbol NFLdan farq qiladi, chunki unda oʻyin tez-tez toʻxtatilmaydi va hujum hamda himoya uchun alohida jamoalar yoʻq. Futbolda futbolchilarni 30 daqiqa davomida qanday qilib qizigan va oʻyinga tayyor holatda saqlab turish masalasi tugʻiladi“[2]. U, shuningdek, Qoʻshma Shtatlardagi sport musobaqalari, jumladan Super Bowl, „televideniye reklamalarini sotish vositasi sifatidagi tijorat modeliga asoslangan“, Yevropada esa „Super Bowl tanaffus shousidagi reklama hajmiga nisbatan tomoshabinlarning qiziqishi va toqati pastroq boʻlishi mumkin“, deya taʼkidladi[2]. Sport jurnalisti Gabriele Marcotti esa shunday fikr bildirdi: „Professional futbolchilar 15 daqiqalik tanaffusga moslashgan. Ular sportchilar. Ularning odatiy tartibini oʻzgartirsangiz, sovib qolishi, qizib ketishi, mushaklari qotishi yoki boshqa muammolar yuzaga kelishi mumkin. Bunday tavakkal qilishga arzimaydi“[27].

Aksincha, Tim Crow bu holatni „aynan shunday madaniy toʻqnashuvlarga toʻla turnirdagi navbatdagi madaniy toʻqnashuv“, deya baholadi[26]. Uning fikricha, amerikaliklar uchun „koʻngilochar dasturlar va sport doimo yonma-yon kelgan“, shu bois u: „Nega mezbon mamlakat oʻz hududida oʻtkazilayotgan uchrashuvlarga oʻziga xosligini singdirmasligi kerak?“ deya savol qoʻydi[26]. Shuningdek, u FIFA va Shakiraning yillar davomida amalga oshirgan koʻplab hamkorliklarini eslatib, shunday dedi: „Keyin esa butun bir harakatni safarbar qilgan K-pop superguruhi BTS va, albatta, Madonna bor — axir Madonna shunchaki Madonna-ku. „Like a Prayer“ qoʻshigʻini kim yoqtirmaydi?“[26] Gabriele Marcotti esa „futbol rivojlanishi kerak va ehtimol bu zarur qadamlardan biridir“, degan fikrni bildirdi[27]. Uning taʼkidlashicha, FIFA tijorat tamoyillari asosida faoliyat yurituvchi tashkilot boʻlib, milliy futbol assotsiatsiyalari „Gianni Infantinoni asosan daromadlarni oshirish va ularni dunyo boʻylab qayta taqsimlashni davom ettirishi uchun prezident etib saylaydi“[27].

The Guardian nashrining xabar berishicha, Jahon chempionatining bir qator teletranslyatorlari tanaffus shousining davomiyligi yuzasidan aniqlik kiritish maqsadida FIFAga murojaat qilgan, biroq javob olmagan[28]. Shou, ayniqsa, tijorat telekanallari uchun muammolarni keltirib chiqardi, chunki ularning reklama boʻlimlari efir vaqtini sotish boʻyicha oldindan rejalashtirilgan majburiyatlarga ega edi[28]. 2026-yil may oyida ommaviy axborot vositalari BBC tanaffus shousini asosiy teleefir orqali namoyish etmaslikka qaror qilgani, buning oʻrniga tanaffus vaqtida mutaxassislar ishtirokida birinchi boʻlim tahlilini efirga uzatishi hamda shouni faqat raqamli platformalarida koʻrsatishni rejalashtirayotgani haqida xabar berdi[30]. Shuningdek, ITV ham xuddi shunday qaror qabul qilgani maʼlum boʻldi[31]. Biroq 2026-yil 15-iyul kuni har ikkala telekanal oʻz qarorini oʻzgartirib, tanaffus shousini efirga uzatishga qaror qilgani haqida xabar qilindi[32]. Turkiyaning TRT telekanali esa tanaffus shousini namoyish etmaslikni tanladi va tanaffus vaqtida reklama roliklari hamda studiya mutaxassislari ishtirokidagi birinchi boʻlim tahlilini efirga uzatdi[33].

Tanqidiy baholar

The Daily Telegraph nashri sharhlovchisi Neil McCormickning fikricha, FIFA Jahon chempionati Super Bowl kabi Amerika futboli musobaqalarida odatda uchraydigan ulkan va tomoshabop sahna koʻrinishlari oʻrniga, kutilmaganda samimiy, doʻstona va ixcham uslubni tanlagan. U Madonnaning oldindan yozib olingan kirish murojaatini tanqid qilgan boʻlsa-da, boshqa bosh ijrochilarning chiqishlariga ijobiy baho berdi[34]. The New York Times nashri sharhlovchisi Lindsay Zoladz esa shouni „mukammal darajada xoreografiya qilingan“, biroq ayni paytda „mavzu jihatidan tartibsiz“ deb taʼrifladi. U, xususan, shouning qismlar asosida tuzilgan formatiga hamda bahs-munozara uygʻotmaydigan umumiy gʻoyalariga eʼtibor qaratdi[35].

Consequence nashri sharhlovchilari Paolo Ragusa va Alex Youngning fikricha, shou „tartibsiz, ayrim paytlarda chalkash va, ayniqsa, BTS hamda Justin Bieber chiqishlari orasidagi keskin uslubiy oʻtishlar sabab biroz ogʻir taassurot qoldirdi. Shunga qaramay, unda chinakam qiziqarli lahzalar ham boʻldi [...] U, ayniqsa, NFLning Super Bowl tanaffus shousi bilan taqqoslaganda, unchalik yaxlit boʻlmagan boʻlsa-da, dunyodagi eng yirik sport tadbirining tanaffus shousi sifatidagi maqomiga munosib boʻldi“[36]. The National nashri sharhlovchisi Saeed Saeed ham bu fikrga qoʻshilib, shou „turnirga munosib darajadagi professionallik va puxta tashkil etilganlikni namoyish etdi“, deya baholadi[37].

Time jurnali sharhlovchisi Judy Berman shouda ijrochilar soni haddan tashqari koʻpligi, davomiyligi juda qisqaligi hamda yodda qoladigan yorqin lahzalarning yetishmasligini tanqid qildi. U shouni „ruhiy koʻtarinkilikni targʻib qiluvchi, aniq mazmunga ega boʻlmagan va ataylab siyosatdan chetda turgan dastur“ deya taʼriflab, uni Super Bowl LX tanaffus shousidagi Bad Bunny chiqishi bilan taqqoslagan holda pastroq baholadi[38]. Shuningdek, USA Today nashridan Melissa Ruggieri hamda Variety nashridan Chris Willman ham shou davomiyligining unda ishtirok etgan koʻplab ijrochilar soniga nisbatan juda qisqa boʻlganiga eʼtibor qaratdi[39][40].

ESPN sharhlovchilari Matt Morlidge va Tom Masters shoudagi har bir ijrochining chiqishini alohida baholadi[41]. Madonna 10 balldan 9 ball olib, eng yuqori bahoga sazovor boʻldi. Uning chiqishi „gʻalati tushni eslatsa-da, tomosha qilish juda maroqli boʻldi“, deya taʼriflandi. BTS 10 balldan 8 ball oldi. Sharhlovchilar guruh haqida „ularga koʻproq vaqt ajratilishi kerak edi“, degan fikrni bildirdi. Shakira, Burna Boy, PS22 Chorus va Coldplay esa 10 balldan 7 balldan baholanib, ularning vokal ijrosi ijobiy eʼtirof etildi. Justin Bieber esa 10 balldan 6 ball bilan eng past bahoni oldi. Norvegiyaning NRK hamda Verdens Gang nashrlari shouga tanqidiy munosabat bildirgan boʻlsa-da, Simon Bolivar simfonik orkestri ijro etgan Viking Row kompozitsiyasi hamda BTS chiqishi oldidan The Muppets qahramonlari ishtirokidagi kirish qismini alohida eʼtirof etdi[42][43].

Ijro etilgan qoʻshiqlar roʻyxati

Maʼlumotlar The Hollywood Reporter nashri asosida keltirilgan[25].

  1. „Music“ (Madonna)
  2. „Seven Nation Army“ (Gustavo Dudamel, New York Philharmonic, Simón Bolívar Symphony Orchestra, Bijan Mortazavi va the Electric Mayhem)
  3. „Dynamite“ (BTS)
  4. „Everything Hallelujah“ (Justin Bieber)
  5. „Dai Dai“ (Shakira, Burna Boy va Ghetto Kids)
  6. „We Dance“ (Coldplay, The Muppets, Sezam koʻchasi qahramonlari, Emmanuel Kelly va PS22 Chorus)

Izohlar

Shuningdek qarang

Manbalar

  1. ↑ Thomas, Carly (February 11, 2024). „Usher takes fans through his classic hits during Super Bowl LVIII halftime show“. The Hollywood Reporter. September 11, 2025da asl nusxadan arxivlandi. Qaraldi: May 15, 2026.
  2. ↑ 2,0 2,1 2,2 2,3 O'Keeffe, Greg. „Would a half-time show work for the World Cup or Champions League final?“. The Athletic (2024-yil 10-fevral). 2024-yil 15-mayda asl nusxadan arxivlangan. Qaraldi: 2026-yil 28-iyun.
  3. ↑ 3,0 3,1 Aversa, Ralphie. „Inside the FIFA World Cup halftime show and the call that made it happen“. USA Today (2026-yil 21-may). 2026-yil 22-mayda asl nusxadan arxivlangan. Qaraldi: 2026-yil 28-iyun.
  4. ↑ Saponara, Michael „Doja Cat, Tems, J Balvin & Coldplay Join Forces for Unifying FIFA Club World Cup Final Halftime Show Performance“. Billboard (2025-yil 14-iyun). 2026-yil 16-yanvarda asl nusxadan arxivlangan. Qaraldi: 2026-yil 26-iyun.
  5. ↑ 5,0 5,1 Willman, Chris. „Global Citizen to Produce Halftime Show for FIFA World Cup Final, Starting in 2026“. Variety (2024-yil 28-sentyabr). 2024-yil 28-sentyabrda asl nusxadan arxivlangan. Qaraldi: 2026-yil 28-iyun.
  6. ↑ Willman, Chris. „Coldplay to pick 2026 World Cup final half-time acts“. BBC Sport (2025-yil 5-mart). 2025-yil 5-martda asl nusxadan arxivlangan. Qaraldi: 2026-yil 28-iyun.
  7. ↑ 7,0 7,1 „First ever FIFA World Cup™ half-time show "an unmissable event", says FIFA President Gianni Infantino“. FIFA (2025-yil 6-mart). 2026-yil 19-mayda asl nusxadan arxivlangan. Qaraldi: 2026-yil 28-iyun.
  8. ↑ 8,0 8,1 8,2 McKenna, Lorraine. „Madonna, Shakira & BTS to headline World Cup show“. BBC Sport (2026-yil 14-may). 2026-yil 14-mayda asl nusxadan arxivlangan. Qaraldi: 2026-yil 14-may.
  9. ↑ 9,0 9,1 9,2 9,3 9,4 Business Wire (2026-yil 14-may). „Madonna, Shakira, and BTS to Co-Headline the First-Ever FIFA World Cup™ Final Halftime Show“. Press-reliz.
  10. ↑ Dunworth, Liberty. „Watch Chris Martin and The Muppets confirm Madonna, Shakira and BTS as World Cup Final Halftime Show headliners“. NME (2026-yil 14-may). 2026-yil 14-mayda asl nusxadan arxivlangan. Qaraldi: 2026-yil 14-may.
  11. ↑ „FIFA World Cup 2026™ Final Halftime Show will "touch hearts", Gianni Infantino says“. FIFA (2026-yil 16-may). 2026-yil 16-mayda asl nusxadan arxivlangan. Qaraldi: 2026-yil 28-iyun.
  12. ↑ Sheldon, Dan; Crafton, Adam. „Shakira, Madonna and BTS will not be paid for World Cup final half-time show“. The Athletic (2024-yil 10-fevral). 2026-yil 28-iyunda asl nusxadan arxivlangan. Qaraldi: 2026-yil 28-iyun.
  13. ↑ Saad, Nardine „Justin Bieber joins Madonna, Shakira and BTS for Fifa World Cup final half-time show“. BBC (2026-yil 8-iyul). 2026-yil 9-iyulda asl nusxadan arxivlangan. Qaraldi: 2026-yil 9-iyul.
  14. ↑ 14,0 14,1 Millman, Ethan (July 17, 2026). „First-Ever World Cup Halftime Show Is an "Action-Packed 11 Minutes," Says FIFA Producer“. The Hollywood Reporter. July 17, 2026da asl nusxadan arxivlandi. Qaraldi: July 18, 2026.
  15. ↑ Kitchener, Shaun „9 revelations from Madonna and Graham Norton's BBC special - from ex's Kylie "crush" to late brother tribute“. Digital Spy (2026-yil 27-iyun). 2026-yil 27-iyunda asl nusxadan arxivlangan. Qaraldi: 2026-yil 27-iyun.
  16. ↑ Roiz, Jessica „Watch Shakira Tease 'Dai Dai,' the Official 2026 FIFA World Cup Song With Burna Boy“. Billboard (2026-yil 7-may). 2026-yil 18-iyunda asl nusxadan arxivlangan. Qaraldi: 2026-yil 27-iyun.
  17. ↑ Balzano, Cata „These Are the Artists Who Will Be on the Official Album for the FIFA World Cup 2026“. Billboard (2026-yil 3-iyun). 2026-yil 19-iyunda asl nusxadan arxivlangan. Qaraldi: 2026-yil 27-iyun.
  18. ↑ Cano, Natalia „Shakira, Burna Boy, J Balvin & More Kick Off 2026 World Cup Opening Ceremony in Mexico: Best Moments“. Billboard (2026-yil 11-iyun). 2026-yil 19-iyunda asl nusxadan arxivlangan. Qaraldi: 2026-yil 27-iyun.
  19. ↑ Brandle, Lars „Goal! Madonna and Feid Score FIFA World Cup Release With 'Read My Lips'“. Billboard (2026-yil 25-iyun). 2026-yil 26-iyunda asl nusxadan arxivlangan. Qaraldi: 2026-yil 26-iyun.
  20. ↑ 20,0 20,1 Watercutter, Angela (July 19, 2026). „FIFA's World Cup Halftime Show Puts American-Style Spectacle on the World Stage“. Wired. July 19, 2026da asl nusxadan arxivlandi. Qaraldi: July 19, 2026.
  21. ↑ 21,0 21,1 Crafton, Adam. „FIFA make plans to use MetLife playing field for 2026 World Cup final half-time show“. The Athletic (2026-yil 13-may). 2026-yil 28-iyunda asl nusxadan arxivlangan. Qaraldi: 2026-yil 28-iyun.
  22. ↑ Collins, Ben. „World Cup final half-time to last up to 25 minutes“. BBC Sport (2026-yil 14-iyul). 2026-yil 14-iyulda asl nusxadan arxivlangan. Qaraldi: 2026-yil 14-iyul.
  23. ↑ Sheldon, Dan; Crafton, Adam. „FIFA targeting 20-minute break for World Cup half-time“. The Athletic (2026-yil 14-iyul). 2026-yil 14-iyulda asl nusxadan arxivlangan. Qaraldi: 2026-yil 15-iyul.
  24. ↑ Reuters (2026-yil 17-iyul). „World Cup final halftime to last more than 15 minutes, broadcasting sources say“. Press-reliz.
  25. ↑ 25,0 25,1 Hustin, Caitlin. „Madonna, Justin Bieber, BTS, Shakira Headline Jam-Packed First-Ever FIFA World Cup Final Halftime Show“ (2026-yil 19-iyul). 2026-yil 19-iyulda asl nusxadan arxivlangan. Qaraldi: 2026-yil 19-iyul.
  26. ↑ 26,0 26,1 26,2 26,3 26,4 Church, Ben „Why some purists can't stand the idea of a World Cup halftime show“. CNN (2026-yil 15-may). 2026-yil 16-mayda asl nusxadan arxivlangan. Qaraldi: 2026-yil 26-iyun.
  27. ↑ 27,0 27,1 27,2 27,3 27,4 Marcotti, Gabriele „FIFA can have a World Cup halftime show... within 15 minutes“. ESPN (2025-yil 8-mart). 2026-yil 14-mayda asl nusxadan arxivlangan. Qaraldi: 2026-yil 26-iyun.
  28. ↑ 28,0 28,1 28,2 28,3 Hughes, Matt „TV rights holders frustrated over World Cup final half-time show delay“. The Guardian (2026-yil 10-iyun). 2026-yil 10-iyunda asl nusxadan arxivlangan. Qaraldi: 2026-yil 26-iyun.
  29. ↑ Smith, Brian T. „'Nobody wants this' – FIFA angers fans with major 2026 World Cup announcement that could turn Final into NFL Super Bowl show“. Talksport (2025-yil 5-mart). 2026-yil 19-mayda asl nusxadan arxivlangan. Qaraldi: 2026-yil 26-iyun.
  30. ↑ Henderson, Lewis „BBC and ITV reject showing World Cup half-time performance on TV“. GB News (2026-yil 23-may). 2026-yil 24-mayda asl nusxadan arxivlangan. Qaraldi: 2026-yil 26-iyun.
  31. ↑ Guedes, Filipe „ITV to follow BBC and 'not show' unprecedented World Cup 2026 moment based on US tradition“. HITC (2026-yil 26-may). 2026-yil 27-mayda asl nusxadan arxivlangan. Qaraldi: 2026-yil 26-iyun.
  32. ↑ Hughes, Matt. „ITV and BBC to screen full World Cup final half-time show despite time concerns“. The Guardian (2026-yil 15-iyul). 2026-yil 15-iyulda asl nusxadan arxivlangan. Qaraldi: 2026-yil 15-iyul.
  33. ↑ „TRT'den tepki çeken Dünya Kupası kararı... Devre arası şovu yerine reklam!“ (tr). Cumhuriyet (2026-yil 19-iyul). Qaraldi: 2026-yil 20-iyul.
  34. ↑ McCormick, Neil. „Madonna Is Upstaged by a Frog at the World Cup Half-Time Show“ (2026-yil 19-iyul). Qaraldi: 2026-yil 20-iyul.
  35. ↑ Zoladz, Lindsay. „First World Cup Halftime Show: Lots of Stars, Little Purpose“ (2026-yil 19-iyul). Qaraldi: 2026-yil 19-iyul.
  36. ↑ „The 2026 FIFA Halftime Show Was a Spectacular, Chaotic Mess“. Consequence (2026-yil 19-iyul). Qaraldi: 2026-yil 20-iyul.
  37. ↑ Saeed, Saeed. „World Cup 2026 Half-Time Show Review: Madonna, Shakira and BTS Deliver a Worthy Finale“ (2026-yil 19-iyul). Qaraldi: 2026-yil 20-iyul.
  38. ↑ Berman, Judy (July 19, 2026). „The World Cup's First Halftime Show Did Too Much and Meant Too Little“. Time. Qaraldi: July 19, 2026.
  39. ↑ Ruggieri, Melissa. „FIFA's World Cup halftime show was a game changer. But was it good?“ (2026-yil 19-iyul). Qaraldi: 2026-yil 19-iyul.
  40. ↑ Willman, Chris (July 19, 2026). „Madonna, BTS, Justin Bieber and Shakira Join Forces for Blink-and-You'll-Miss-'Em Moments in a Cluster-FIFA of a Halftime Show“. Variety. Qaraldi: July 19, 2026.
  41. ↑ „World Cup Final Halftime Show: Rating Every Performer as Madonna, BTS, Justin Bieber and Shakira Headline“. ESPN (2026-yil 20-iyul). Qaraldi: 2026-yil 20-iyul.
  42. ↑ „Alt om fotball-VM – Siste nytt, høydepunkter og resultater“ (nb). Qaraldi: 2026-yil 20-iyul.
  43. ↑ Fredagsvik, Jarle „VM-finalen: Kritikken haglet mot Fifas showpregete finale“ (nb-NO). NRK (2026-yil 19-iyul). Qaraldi: 2026-yil 20-iyul. 
"https://ziyosfera.uz/index.php?title=Futbol_boʻyicha_2026-yilgi_jahon_chempionati_finalidagi_tanaffus_shousi&oldid=1228451" dan olindi