Al-Alo Hadramiy
Al-Alo al-Hadramiy (arabcha: العلاء الحضرمي; 635–636 yoki 641–642-yillarda vafot etgan) – ilk musulmon sarkardasi. Islom paygʻambari Muhammad davrida tax. 631–632-yillarda Bahraynda (sharqiy Arabiston) soliq yigʻuvchi, 632–636 va 637–638-yillarda xalifalar Abu Bakr (h. 632–634) va Umar (h. 634–636) hukmronligi davrida Bahrayn hokimi boʻlib xizmat qilgan. Abu Bakr davrida al-Alo Ridda urushlari doirasida Sosoniylar tarafdori Laxmiylar sulolasi tomonidan uyushtirilgan isyonni bostirgan. Xalifa Umar davrida Sosoniylarga qarshi bir nechta dengiz yurishlariga boshchilik qilgan, biroq ular ning eng soʻnggisi arablar uchun falokatli yakunlangan va al-Aloning lavozimidan boʻshatilishiga sabab boʻlgan. Soʻngra u Basraga noib etib tayinlangan, biroq ushbu lavozimni qabul qilish uchun yoʻlga chiqqanida vafot etgan.
Kelib chiqishi
Al-Alo Janubiy Arabistonning Sadif qabilasiga mansub edi[1]. U Makkadagi Quraysh qabilasining badavlat Banu Umayya urugʻiga homiylik yoki ittifoqchilik aloqalari bilan bogʻliq edi[2]. Paygʻambar Muhammadning Makkani zabt etishi va 630-yilda Quraysh qabilasining ommaviy ravishda musulmonlikni qabul qilishidan oldin[3] islomni birinchilardan boʻlib qabul qilganlardan boʻlgan.