Zubeida Rahimtoola
| Zubeida Rahimtoola | |
|---|---|
| Tavalludi |
Zubeida Sulton Chinoy 12-avgust 1917-yil Mumbay, Mumbay prezidentligi, Britaniya Hindistoni |
| Vafoti |
5-iyul 2015-yil (97 yoshda) Karachi, Pokiston |
| Kasbi | siyosiy faol |
| Turmush oʻrtogʻi | Habib Rahimtoola |
Zubeida Habib Rahimtoola (1917-yil 12-avgustda tugʻilgan — 2015-yil 5-iyulda vafot etgan)[1], tavallud paytidagi ismi Zubeida Sulton Chinoy, faol, ijtimoiy xodim[2], asosan, Karachi shahrida faoliyat yuritgan. Birlashgan Qirollikdagi Butun Hindiston Musulmonlar Ligasi prezidenti hamda Butun Pokiston Ayollar Assotsiatsiyasining taʼsischi aʼzosi boʻlib xizmat qilgan[3]. Pokiston Prezidenti Ayub Xon tomonidan qilgan xizmatlari uchun „Sitara-e-Xidmat“ (Xizmat yulduzi) bilan taqdirlangan[1].
Shaxsiy hayoti
Zubeida Sulton Chinoy 1917-yil 12-avgustda Mumbay shahrida dunyoga kelgan.
1935-yilda Zubeida Habib Rahimtoolaga[4] turmushga chiqqan[1]. Shundan soʻng u Britaniya Hindistonidagi musulmon ayollarni qoʻllab-quvvatlash uchun ijtimoiy farovonlik yoʻnalishida faol ish boshlagan. Pokiston tashkil topganidan keyin esa, asosan, taʼlim atrofida jamlangan bir qator ayollarni rivojlantirish loyihalarida ishtirok etgan[3].
Zubaida Rahimtoolaning otasi Sulton Chinoy tadbirkor boʻlib, Bombey meri (1938–1939) lavozimida ham faoliyat yuritgan. Habib Ibrohim Rahimtoola va Zebeidaning ikki oʻgʻil va bir qiz farzandi bor[2].
Yoshligi va faoliyati
Rahimtoola boshlangʻich taʼlimni Mumbaydagi Iso va Maryam monastir maktabida olgan, soʻngra Queen Mary’s maktabida oʻrta taʼlimni yakunlagan. Shundan keyin Elphinstone kollejida oʻqib, bakalavr darajasini olgan.
Zubeida Rahimtoola Butun Pokiston Ayollar Assotsiatsiyasining (APWA) taʼsischi aʼzolaridan biri boʻlgan. U 1947-yilgi boʻlinish paytida Birlashgan Qirollikda boʻlgani sababli APWAning Birlashgan Qirollikdagi birinchi prezidentiga aylangan[3].
Rahimtoola 1953-yilda Pokistonga qaytib, APWA bilan faoliyatini davom ettirgan. U Afro-Osiyo konferensiyalari va Xitoyga tashkilotning turli delegatsiyalariga boshchilik qilib olib borgan. Zubeida Rahimtoola faoliyati davomida Sind APWA prezidenti (1953–1954), soʻngra APWAning milliy miqyosdagi vitse-prezident (1955–1958) boʻlgan. Shuningdek, APWAning uy sanoati boʻlimi raisi (1956–74) lavozimini ham egallagan. Yakunda Rahimtoola Karachidagi APWA raisiga (1991–1997) aylangan. Shuningdek, u Karachidagi Pokiston–Amerika madaniyat markazida kotib lavozimida ham xizmat qilgan[5][6].
Mukofotlari
Zubeida Rahimtoola 1960-yilda Pokistondagi ayollar tashkilotlariga qoʻshgan hissasi hamda ayollar huquqlarini oʻz ichiga olgan „Gʻarbiy Pokistonning oila qonunlari“ boʻyicha olib borgan ishlari uchun Pokiston Prezidenti Ayub Xon tomonidan „Sitara-e-Xidmat“ (Xizmat yulduzi) bilan taqdirlangan[1][2].
Vafoti
Zubeida Habib Rahimtoola 2015-yil 5-iyul kuni 97 yoshida Pokistonning Karachi shahrida vafot etgan[2].
Manbalar
- ↑ 1,0 1,1 1,2 1,3 „The Queen of Hearts: Zubeida Habib Rahimtoola“ (2015-yil 19-iyul). Qaraldi: 2020-yil 19-yanvar.
- ↑ 2,0 2,1 2,2 2,3 „Begum Zubeida Habib passes away“ (2015-yil 8-iyul). Qaraldi: 2020-yil 19-yanvar.
- ↑ 3,0 3,1 3,2 „Begum Zubeida Habib Rahimtoola profile and portrait“. National Portrait Gallery, London. Bassano Ltd. Qaraldi: 2020-yil 20-yanvar.
- ↑ „Zubeida Rahimtoola - From The Herald archives“. Herald Scotland (2001-yil 14-dekabr). Qaraldi: 2020-yil 20-yanvar.
- ↑ „Pakistan American Cultural Center (PACC) founding members“. Pakistan American Cultural Center (PACC) website. Qaraldi: 2020-yil 19-yanvar.
- ↑ Zarina Patel.. „The unsung heroes of Pakistan Movement“ (2019-yil 14-avgust). Qaraldi: 2020-yil 19-yanvar.