Zinaida Kovalevskaya

Zinaida Mixaylovna Kovalevskaya (1902, Saratov viloyati – 1979-yil, 11-may, Samarqand) – Oʻzbekiston SSR xalq rassomi (1964). Qozon rassomlik bilim yurtida taʼlim olgan (1922—1927), 1943-yilda I. Repin nomidagi rassomlik, haykaltaroshlik va meʼmorlik institutida sirtdan diplom yoqlagan. 1930-yildan Oʻzbekistonda. 1932—1949-yillarda Samarqand rassomlik bilim yurtida pedagog. Kovalevskaya asarlarida oʻzbek diyori va uning kishilari yorqin boʻyoqlarda nafis aks ettirilgan. Portretlar („Ota portreti“, 1939; „Ona portreti“, 1945; rus rassomlari P. Benkov, 1945; B. M. Teplov, 1952; S. Rakova, 1961 va boshqalar), manzaralar („Eski shahar koʻchasi“, 1945; „Hovuz boʻyidagi choyxona“, 1945; „Urgutda“, 1956 va boshqalar), oʻzbek ayollari tasvirlangan lavhalar („Teatr lojasida“, 1937; „Velosiped musobaqasining gʻolibasi“, 1939; „Xalq ijodi ustalari“, 1947 va boshqalar), natyurmortlar („Natyurmort“, 1955; „Qovoq“, 1961) yaratgan.