Zakaspiy antropologik tipi

Zakaspiy antropologik tipi — asosiy vakillari turkmanlardan tashkil topgan antropologik tip. Qoraqalpoqlar (Xorazm voxasidagi), balujlar va eroniylarning tarkibida ham uchraydi. L. V. Oshanin O'rta Osiyoning janubiy viloyatlarida, yaʼni Amudaryoning janubi-gʻarbida yashaydigan antropologik tipni Zakaspiy antropologik tipi deb nomlagan. Zakaspiy antropologik tipi vakillari baland boʻyli, boshi uzun, mezokefal (qarang Bosh koʻrsatkichi), koʻzi, sochlari va badanidagi junlari qora, yuzi choʻzinchoq, tor va oʻrta kenglikda, burni toʻgʻri va oʻrta kenglikda. Zakaspiy antropologik tipiga mansub odam ajdodlarining suyaklari Janubiy Turkmanistonda neolit va jez davriga oid. Tojikiston, Oʻzbekiston, Orolning janubi tomonlari va Gʻarbiy Qozogʻistonning baʼzi joylarida jez davriga oid yodgorliklarda ham topilgan. Jan. Pomir saklari, Yettisuv usunlari ham Zakaspiy antropologik tipi ga mansub boʻlgan.

Adabiyot

• Oshanin L. V., Zezenkova V. Ya ., Voprosi etnogeneza narodov Sredney Azii v svete dannix antropologii, sb. statey, T., 1953; Oshanin L. V., Antropologicheskiy sostav naseleniya Sredney Azii i etnogenez yeyo narodov, v 3x ch., ch. 1—3, Yerevan, 196759.