Yakan

Yakan — yakandoshlar oilasiga mansub koʻp yillik, baʼzan bir yillik oʻt oʻsimliklar turkumi. 250 turi maʼlum. Asosan, moʻtadil va sovuq mintaqalarda, tropik va subtropik zonaning baland togʻliklarida tarqalgan. Oʻzbekistonda yakanning choʻlbaqa yakan yoki qizgʻish yakan, duragay yakan, egilgan yakan, yirik changdonli yakan, boʻgʻimli yoki yaltiroq yakan va jerar yakani yoki qizil yakan kabi 16 turi mavjud. Boʻyi 10—90 sm gacha, barglari qinli, gullari qoʻngʻiroq yoki sargʻish-yashil, ikki jinsli soyabonsimon toʻpgullarga yigʻilgan. May — avgust oylarida gullab, sentyabr — oktyabrda urugʻlaydi. Mevasi uch urugʻli koʻsakcha. Oʻzbekistonning barcha tumanlaridagi zax, sersoya yerlarda hamda begona oʻt sifatida sholizorlarda oʻsadi. Koʻpgina turlari chorva mollari uchun yaxshi ozuqa.