Xalq maslaxatchilari

Xalq maslahatchilari (Oʻzbekiston Respublikasida) — 1-instansiyada jinoyat va fuqarolik ishlarini koʻrishda qatnashish uchun saylangan fuqarolar. Ish boʻyicha qaror chiqarishda sudya bilan teng huquqga ega. Odatda, ishni koʻrayotgan sud tarkibiga 2 nafar xalq maslahatchisi kiradi. Odil sudlovni amalga oshirishda fukarolar Xalq maslahatchilari sifatida qatnashishi ularning fuqarolik burchi hisoblanadi. Sud tarkibida odil sudlovni amalga oshirishda Xalq maslahatchilari mustaqiddirlar va faqat konunga boʻysunadilar. Xalq maslahatchilarining suddagi faoliyatiga hech qanday aralashuvga yoʻl qoʻyilmaydi, bunday aralashuv qonun boʻyicha javobgarlikka olib keladi. Sud tarkibida faoliyat koʻrsatayotgan davrda xalq maslahatchisi uning roziligisiz boʻshatilishi yoki boshqa ish joyiga oʻtkazilishi mumkin emas. Xalq maslahatchilarining shaxsi daxlsizdir. Xalq maslahatchilariga nisbatan jinoyat ishi faqat Oʻzbekiston Respublikasi Bosh prokurori yoki uning vazifasini bajaruvchi shaxs tomonidan qoʻzgʻatilishi mumkin. Xalq maslahatchilari 25 yoshdan kichik boʻlmagan Oʻzbekiston Respublikasi fuqarosi orasidan turar joy yoki ish joyi boʻyicha fuqarolar yigʻinida ochiq ovoz berish orqali 2,5-yil muddatga saylanadi. Xalq maslahatchilarining huquqiy maqomi Oʻzbekiston Respublikasining „Sudlar toʻgʻrisida“gi (yangi tahriri) qonunida (2000-yil 14-dekabr) koʻrsatib berilgan (62-modda).