Volga Zazulinskaya
Volha Zazulinskaya (Вольга Уладзіміраўна Зазулінская, shuningdek, Olga Zazulinskaya yoki Zazulinskaja) — belaruslik inson huquqlari faoli[1][2]. 2024-yil sentyabr oylari atrofida Belarus Birlashgan oʻtish davri kabineti aʼzosi boʻlib, ijtimoiy siyosat boʻyicha vakil sifatida ish boshlagan.
Bolaligi
Zazulinskaya Stoubtsi shahrida ulgʻaygan. Uni onasi hamda buvisi tarbiyalagan. Onasi 2018 yoki 2019-yilda saraton kasalligiga chalinib vafot etgan. Zazulinskaya taxminan 16 yoshida yarim stavkada ishlash uchun Minskka qatnab yurgan, 18 yoshida esa toʻliq stavkada ish olib borish uchun Minskka koʻchib oʻtgan.
Zazulinskaya onasini xursand qilish uchun buxgalteriya hisobini oʻrgangan, biroq bu soha unga zerikarli tuyulgan. U sotuvchi boʻlib ishlash uchun tayyorgarlikdan oʻtgan va 2018-yilgacha savdo sohasida ishlagan.
Faoliyati
2018 yoki 2019-yillar atrofida Zazulinskaya kasal bolalar uchun jamgʻarmada ishlay boshlagan.
Zazulinskaya 2020-yilgi Belarus prezidentlik saylovida kuzatuvchi boʻlgan. U 2020–2021-yillardagi Belarus norozilik namoyishlaridan keyin Okrestina qamoqxonasida militsiya tomonidan doʻpposlanganlar uchun tashkil etilgan tibbiy lagerda koʻngilli boʻlgan. Ushbu faoliyati davomida koʻrganlari haqida Zazulinskaya shunday degan: „Chiqqanlarning hammasi kaltaklangan, singan joylari bor, miya chayqalishi boʻlgan, juda ogʻir psixologik holatda edi“.
Belarus KGBsi tomonidan qoʻlga olinishi va oilasiga tahdidlar kelib tushishi ortidan Zazulinskaya 2020-yil noyabr oyida farzandlari bilan Belarusni tark etgan. U va turmush oʻrtogʻi 2021-yilda ajrashgan. Zazulinskaya buni mahalliy va kichik shaharlardagi faollarga yordam berish ishlaridagi juda faol ishtiroki borasidagi kelishmovchiliklar bilan izohlagan.
Zazulinskaya „Hayot uchun mamlakat“ jamgʻarmasida kopirayter sifatida ishlagan, siyosiy mahbuslarga yordam koʻrsatish boʻyicha koordinator boʻlgan va keyinchalik uning rahbariga aylangan.
Shaxsiy hayoti
Zazulinskayaning oʻgʻli va qizi bor. 2021-yilda u turmush oʻrtogʻi bilan ajrashgan. 42 yoshida Zazulinskaya ilk bor tatuirovka chizdurgan. Tatuirovkalardan biri Belarus Maʼmuriy kodeksining 23.34-moddasiga ishora qiladi. Yana biri Belarusning qizil chiziqli kontur tasviri, yana birida esa lotin tilida „Freedom is above all“ (Erkinlik hammasidan ustun) deb yozilgan.