Umirzakov Baltoxodja Yermatovich
| Baltoxodja Yermatovich Umirzakov | |
|---|---|
| Fayl:Baltoxodja Yermatovich Umirzakov.jpg | |
| Tavalludi |
25-oktyabr 1948-yil Toshkent viloyati |
| Fuqaroligi |
 Oʻzbekiston |
| Kasbi | fizik olim |
| Sohasi | nanotexnologiya, yarimoʻtkazgichlar va dielektriklar fizikasi |
| Taʼlimi | Toshkent davlat universiteti |
| Ilmiy darajasi | fizika-matematika fanlari doktori |
| Ilmiy unvoni | professor |
Baltoxodja Yermatovich Umirzakov (1948-yil 25-oktyabr, Toshkent viloyati) — oʻzbekistonlik fizik olim, fizika-matematika fanlari doktori (1993), professor.
Biografiyasi
Umirzakov Baltoxodja Yermatovich 25 oktyabr 1948 yilda Toshkent viloyati Oʻrta — Chirchiq tumanida tavallud topgan. 1966 yilda 38 — oʻrta maktabni medal bilan tugatgan. [1]. 1966 — 1973 yillarda Toshkent politexnika institutining „Irjenerlik fizika“ fakultetida tahsil olib, elektron texnika muhandisi ixtisosligini olgan. 1971 — 1973 yillarda Oʻrta Osiyo neftni qayta ishlash ilmiy tekshirish institutida katta injener lavozimida ishlagan. 1973 — 1977 yillarda „Amaliy va nazariy fizika“ kafedrasida muhandis, 1978 — 4980 yillarda aspirant, 1981 — 1993 yillarda assistent, dotsent lavozimlarida ishlagan. 1993 — 2005 yillarda „Elektron texnika materiallari fizikasi va texnologiyasi“ kafedrasining mudiri, 2004 — 2005 yillarda „Elektronika va avtomatika“ fakultetining dekani, 2006 — 2013 yillarda „Nanotexnologiya“ kafedrasi mudiri, 2013 yil sentyabrdan hozirgi paytgacha „Umumiy fizika“ kafedrasida professor lavozimida ishlab kelmoqda. 1982 yilda fizika — matematika fanlari boʻyicha nomzodlik, 1993 yilda doktorlik dissertatsiyasini muvaffaqiyatli himoya qilgan.
Oilasi
Baltoxodja Yermatovich Umirzakovning ikki oʻgʻil va ikki qizi bor[1].
Ilmiy faoliyati
B. E. Umirzakov fizik-elektronika va nanotexnologiya sohalarida dunyo miqyosidagi taniqli olim. Uning rahbarligida Respublikada birinchi boʻlib nanotexnologiya va nanoelektronika sohasida ilmiy maktab (2000 yil) va ToshDTUda yangi taʼlim yoʻnalishi (2006 yil) tashkil qilingan. Shu yoʻnalishda u 7 ta fan doktori, 11 ta fan nomzodi (shundan, 4 ta falsafa doktori) va 50 dan ortiq magistrlar tayyorlagan. 800 ga yaqin ilmiy va ilmiy-uslubiy ishlar muallifi, shu jumladan 12 ta monografiya (uchtasi xorijda), 2 ta darslik va 20 ta oʻquv qoʻllanmalar chop etgan. 120 dan ortiq maqolalari chet elning nufuzli xalqaro indeksatsiyaga ega jurnallarida eʼlon qilingan, 100 ga yaqin xalqaro konferentsiyalarda maʼruzalar qilingan, 10 ta patent olingan. B. E. Umirzakov 2 ta chet el jurnallarining tahririyat aʼzosi hamda 4 ta xalqaro konferentsiya tashkiliy qoʻmitasining doimiy aʼzosi hisoblanadi. U 2002-2003 yillarda Amerika xalqaro biografiya instituti tanlovida gʻolib boʻlib, „Yilning yaxshi olimi“ unvoniga ega boʻlgan va oltin medalga tavsiya qilingan. Uning qisqacha ilmiy biografiyasi „Xalqaro biografik katalog“ning 11-nashriga kiritildi. 2018 yilda esa xalqaro bibliografik va referativ maʼlumotlar bazasi- SCOPUSning diplomini oldi. 2019 yilda „Mexnat shuhrati“ ordeni bilan taqdirlangan. U koʻp yillar davomida doktorlik dissertatsiyasi boʻyicha ixtisoslashgan kengash va OʻzR OAK ning ekspert kengashi aʼzosi sifatida faoliyat koʻrsatib kelmoqda. U va uning shogirdlari bir necha marta Deutsche Forschungs — gemeinschaft (DFG, Germaniya), International Atomic Energy grant (IAEA), Oʻzbekiston — Belorussiya, Oʻzbekiston — Hindiston xalqaro grantlar gʻolibi boʻlishgan. Ilmiy tadqiqot ishlarining natijalari Germaniya, Rossiya, Fransiya, Finlandiya, Belorussiya, Janubiy Koreya, Yaponiya, Xitoy, Hindiston kabi dunyoning rivojlangan davlatlarida ilmiy maʼruzalar qilingan. B. E. Umirzakov rahbarligida 22 ta davlat byudjeti asosidagi ilmiy loyihalar va xoʻjalik shartnomalari bajarilgan va bajarilib kelinmoqda, 2 ta xorijiy loyihalarda ishtirok etmoqda. Oʻzbekiston elektronika sanoati uchun opto- va nanoelektronika qurilmalarining elementlar bazasini yaratishda, ultra katta integral sxemalar, jumladan quyosh energetikasi uchun ilmiy asoslangan tavsiyalar ishlab chiqilgan. Olingan ilmiy natijalar qisman „Foton“ AJ, „Proton“ IIB, Koson DMKK, „Gujumsoy“ JKBDK hamda Respuplika ITI ilmiy tadqiqotlar olib borishda, ilmiy kadrlar tayyorlash oʻquv kurslarida qoʻllanilib kelinmoqda.
Unvon va mukofotlari
Manbalar
- ↑ 1,0 1,1 Oʻzbekistonning taniqli olimlari ensiklopediyasi, 2-tom (oʻzbekcha), Toshkent: Science and Innovation, 2023 — 383-bet.
- ↑ „Ўзбекистон Республикаси давлат мустақиллигининг йигирма саккиз йиллиги муносабати билан фан, таълим, соғлиқни сақлаш, адабиёт, маданият ва санъат соҳалари ходимларидан бир гуруҳини мукофотлаш тўғрисида“ (2019-yil 29-avgust).
- ↑ „Ўзбекистон Республикаси мустақиллигининг ўттиз икки йиллиги муносабати билан фан, таълим, соғлиқни сақлаш, адабиёт, маданият, санъат соҳалари ва оммавий ахборот воситалари ходимларидан бир гуруҳини мукофотлаш тўғрисида“ (2023-yil 26-avgust).