Kontent qismiga oʻtish

Umidsizlik (avtoportret)

ZiyoSfera, erkin ensiklopediya
Umidsizlik
: '
Rassom Gyustav Kurbe
Yil 1843-1845
Material Moyli bo'yoq
Oʻlchami 45 sm × 54 sm (77 m × 92 m)

„Umidsizlik“ – fransuz rassomi Gyustav Kurbe tomonidan 1843–1845-yillarda Parijda yaratilgan. Moyli boʻyoqda ishlangan bo'lib, avtoportret hisoblandi. Asarda yosh Kurbe keng ochilgan koʻzlari bilan old tomonga tikilgan va sochlarini umidsizlik bilan changallab olgan holda tasvirlangan. Hozirda ushbu asar Conseil Investissement Art BNP Paribas xususiy toʻplamida saqlanadi, biroq 2007-yilda Orsay muzeyida oʻtkazilgan Kurbe koʻrgazmasida namoyish etilgan[1].

Tavsifi

Asar – Gyustav Kurbening avtoportreti boʻlib, unda rassom old tomondan, yaqin planda tasvirlangan. Uning ogʻzi yarim ochiq, nigohi tomoshabinning koʻzlariga chuqur singib boradi. Koʻzlari katta ochilgan, ikkala qoʻli esa sochini yulishga tayyordek koʻrinadi. Boʻyniga toʻq koʻk rangli sharfni boʻsh qilib oʻrab olgan. Yuzining rangparligi soch va soqolining qoramtirligiga qarama-qarshi boʻlib, bu holat koʻylagining oqligi bilan kuchaytirilgan. Yorugʻlik manbai chap tomondan, yuqoridan tushib, bu kontrastlarni ravshan ko‘rsatadi.

Tarixi

The Man Made Mad with Fear, Kurbening 1843–1844-yillarda chizilgan, hozir Norvegiya Milliy galereyasida saqlanayotgan, tugallanmagan guash-qog‘ozdagi eskizi.

1840-yillarda Gyustav Kurbe oʻz doʻstlari va mijozlarining portretlarini, shuningdek, avtoportretlarini ham yaratgan. Ular orasida 1842-yilda chizilgan “Self-Portrait with a Black Dog” ham bor. Kurbe Luvr muzeyida Jusepe de Ribera, Francisco de Zurbarán, Diego Velázquez va Rembrandt asarlarini ko'chirib, ularning ijodidan ilhom olgan[2]. „Umidsizlik“ asarida u anʼanaviy vertikal formatdan voz kechgan.

Tadqiqotchilar bu asar (45 × 54 sm o‘lchamdagi, tuvalga ishlangan moybo‘yoq) 1843–1845-yillar oralig‘ida, Kurbe Parijdagi faoliyatini boshlagan davrda yaratilganini taxmin qiladilar[3].

Kurbe “Umidsizlik” asariga alohida bog‘langan bo‘lib, uni 1873-yilda Shveysariyaga surgun qilinganda ham o‘zi bilan olib ketgan. Oradan bir necha yil o‘tgach, shifokor Pol Kollinning Kurbe ustaxonasi haqidagi tasvirida “umidsiz ifodali Kurbe tasvirlangan, shu sababli ‘Umidsizlik’ deb atalgan asar” tilga olingan[4][5].

Ushbu asar xususiy koelleksiyasiga tegishli bo‘lsada, 2007-yilda Orsay muzeyida namoyish etilgan[6].

Tahlil

Kurbe bunday mavzular uchun odatdagi portret formatidan farqli ravishda manzara formatini tanlagan.

Portretda romantik yondashuv asosan tuygʻularni ifodalashga yoʻnaltirildi. Ushbu portret ham shu yoʻnalishga mos keladi. Kurbe oʻzini romantik rassom sifatida taʼriflamagan boʻlsa-da, oʻzining birinchi rasmlarini shu taʼsir ostida chizgan[7]. „Umidsizlik“ kartinasi David Jak Luining stereotipik ifodalari hamda Kurbe Luvrda oʻrgangan XVII asr ispaniyalik rassomlari Jusepe de Ribera va Francisco de Zurbaránning uslubiga mos keladi[8].

Mazkur kartina nomi rassomning shaxsiy umidsizligini aks ettiradimi yoki bu shunchaki nazariymi – bu nomaʼlum. Asar, ehtimol, Kurbening yashirin, qorongʻi tomonini ifodalaydi. U buni doʻsti va homiysi boʻlgan Alfred Bruyasga yozgan maktubida quyidagicha bayon etgan: „Siz bilgan bu kuluvchi niqob ortida men yurakni ichidan vampirdek ezib yuboradigan gʻam, achchiqlik va qaygʻuni yashiraman.“[5]

Ommaviy madaniyatga taʼsiri

2012-yilda ushbu asarga "Jinoyatga qarshi hamkorlar" filmida (bosh rollarda Catherine Frot va André Dussollier) ishora qilingan. Shuningdek, asar Jean-Christophe Grangéning "Yoʻlovchi" asarining uchinchi bobi („Nacsuna“)da ham tilga olingan.

Manbalar

  1. ↑ (fransuzcha) dossier du Musée Fabre Montpellier réalisé par des élèves de terminale L, " Gustave Courbet, un artiste engagé " (Wayback Machine saytida 2022-01-23 sanasida arxivlangan), 30 September 2013, p. 22
  2. ↑ „Musée Fabre“ (fr). 2011-yil 12-mayda asl nusxadan arxivlangan. Qaraldi: 2018-yil 16-iyul.
  3. ↑ Linn, Lavalle „Fifty Two Pieces: Gustave Courbet ~ Self-Portraits of a Handsome Man“. Fifty Two Pieces (2009-yil 23-avgust). 2015-yil 4-oktyabrda asl nusxadan arxivlangan. Qaraldi: 2024-yil 31-oktyabr.
  4. ↑ (fransuzcha) Sylvain Amic, Catalogue de l’exposition Courbet au Grand Palais 2007
  5. ↑ 5,0 5,1 Catalogue de l'exposition Courbet au Grand Palais 2007 (fr). 
  6. ↑ „"Gustave Courbet, a committed artist"“. Fabre Montpellier Museum. 2017-yil 26-fevralda asl nusxadan arxivlangan. Qaraldi: 2013-yil 30-sentyabr.
  7. ↑ „Courbet, the desperate man“ (en). Qaraldi: 2014-yil 9-noyabr.
  8. ↑ " Courbet (Gustave) 1819-1877 " par Pierre Georgel, In: Encyclopaedia Universalis, Paris, 2008, tome VI, s. 982. 
"https://ziyosfera.uz/index.php?title=Umidsizlik_(avtoportret)&oldid=837177" dan olindi