Umayr ibn al-Hubob as-Sulamiy
Umayr ibn al-Hubob as-Sulamiy (arabcha: عمير بن الحباب السلمي; 689-yilda vafot etgan) – Banu Sulaym qabilasining boshligʻi, Umaviylar xalifaligiga xizmat qilgan sobiq sarkarda. Qays qabilalarining asosiy yetakchilaridan biri sifatida Banu Kalb va Banu Tagʻlib qabilalari bilan boʻlgan ichki qabilaviy urushlarda faol ishtirok etgan.
Hayoti
Umayr al-Hubab oʻsha davrning yirik arab qabilalaridan biri Banu Sulaymning mashhur Dakvan boʻlimiga mansub boʻlgan[1]. Uning onasi qora tanli afrikalik ayol boʻlgan[2]. Oila Jazira (Yuqori Mesopotamiya) viloyatining Balx daryosi atrofida yashagan[3]. Umayr Umaviylar xalifasi Muoviya I (h. 661–680) qoʻshini tarkibida xizmat qilgan. U oʻz qabiladoshi, Banu Sulaym boʻlimidan boʻlgan Safvon ibn Mu’attal qoʻmondonligi ostida urushlarda ishtirok etgan. 678-yilda armanlarning „Hisn Kamx“ (hozirgi Kamah) nomli qal’asini bosib olishda faol qatnashgan va shu harbiy yurishi davomida katta shuhrat qozongan[3][4][4].
Merosi
Umayr al-Hubabning aka-ukalari va oʻgʻillari ham Umaviylar armiyasida sarkarda sifatida xizmat qilishgan. Jumladan, uning ukasi Tamim ibn al-Hubob xalifa Yazid II (h. 720–724) hukmronligi davrida Kufa hududidagi xorijiylariga qarshi yurishlarda qatnashgan. Umayrning oʻgʻillari Zufofa va Xolid esa Maslama ibn Abdulmalik (fl. 705–738) boshchiligidagi Konstantinopolga (hozirgi Istanbul) uyushtirilgan yurishlarda ishtirok etishgan[5]. Manbalarda Umayrning uchinchi avlodi haqida aniq maʼlumotlar yoʻq, biroq 800–909-yillar orasida Shimoliy Afrikada Agʻlabiylarga qarshi qoʻzgʻolon koʻtargan Sulaymiy qabilasining bir rahbari oʻzini Umayrning avlodi deb daʼvo qilgan[5].