Turob Maqsud
| Turob Maqsud | |
|---|---|
| Tavalludi |
11-sentyabr, 1947-yil yoki 1957-yil |
| Vafoti |
2016-yil Oʻzbekiston |
| Fuqaroligi |
 SSSR→ Oʻzbekiston |
| Kasbi | yozuvchi |
Turob Maqsud (1947-yil[sharh 1] 11-sentyabr, Jizzax, OʻzSSR, SSSR—2016-yil, Oʻzbekiston) – oʻzbek yozuvchisi[1][2]. Bir qancha asarlar muallifi. „Devor“ videofilmining ssenariy muallifi. Jizzax adabiy muhitining yirik vakillaridan biri[3].
Hayoti
Turob Maqsud 1947-yil Oʻzbekiston SSR tarkibidagi Jizzax viloyatining, Jizzax shahrida tugʻilgan. Oʻrta taʼlimni tamomlagach, 1967-yil Fargʻona davlat pedagogika institutining tabiatshunoslik fakultetiga oʻqishga qabul qilinadi. Oliygohni 1972-yilda muvaffaqiyatli tamomlaydi.
Mehnat faoliyati
Talablik yillaridan boshlab turli yillarda „Guliston“, „Paxtakor“, „Oʻzbekiston ovozi“ gazetalarida muharrir boʻlib faoliyatini boshladi. Soʻng, Oʻzbekiston Respublikasi Xalq taʼlimi vazirligida, Jizzax viloyati hokimligi va Oʻzbekiston yozuvchilar uyushmasining Jizzax viloyati boʻlimida turli mas’ul lavozimlarda faoliyat yuritdi.
Ijodi
Turob Maqsud oʻzining ilk ijodiy ishlarini gazetalarda nashr ettirgan. „Sharq yulduzi“ jurnalining 1973-yilning 1-sonida „Qaytmas toʻlqinlar“ hikoyasi nashr etilgan. Yil yakunida uning ushbu hikoyasi yil hikoyasi sifatida eʼtirof etilgan. Bundan keyin, hikoyalarini jamlagan holda bir necha kitoblari nashrdan chiqarildi. Jumladan, 1980-yilda „Qaytmas toʻlqinlar“, 1983-yilda „Kattalar va men“, 1985-yilda „Beshik“, 1990-yilda „Pariga oshiq oʻsmir“ kitoblari chop etilgan[4]. Turob Maqsudning bir qancha asarlari, teatr jamoalari tomonidan davlat teatrlarida sahnalashtirilgan. Shular bir nechtasi, respublika miqyosidagi tanlovlarda sovrindorlar qatoridan joy egallagan. Jumladan, 1997-yilda „Izgʻirin abadiy emasdi“ dramasi 1-oʻrinni, 1999-yilda „Boyqush“ dramasi 2-oʻrinni egallagan. Jizzax davlat teatrida yozuvchining „It qopgan odam“ asari asosida komediya bir necha bor sahnalashtirilgan. Yozuvchining 2000-yilda „Yurakka qasida“, 2002-yilda „Muallim ishqi“ romani, 2003-yilda „Umr bahori“, 2008-yilda „Ilinj“ hamda 2014-yili „Qaytmas toʻlqinlar“ roman-kitoblari nashrdan chiqqan.
Turob Maqsud oʻzbek kino ijodkorlari tomonidan suratga olingan „Devor“ videofilmining ssenariy muallifidir. Uning turli yillarda yozgan taniqli asarlari dunyo tarjimonlari tomonidan uygʻur, qozoq va rus tillariga tarjima qilingan.
Yozuvchi 2016-yilda vafot etgan.
Manbalar
- ↑ S.Mirvaliyev, R.Shokirova. O'zbek adiblari. Toshkent shahri: G'afur G'ulom nomidagi davlat nashriyoti, 2016 — 273-bet. ISBN 978-9943-03-940-7.
- ↑ „Turobjon Maqsudov“. asarlar.uz. Qaraldi: 12-avgust 2025-yil.
- ↑ O‘zbekiston Respublikasi Oliy ta’lim, fan va innovatsiyalar vazirligi huzuridagi Oliy attestatsiya komissiyasi. „Туропова Паризод Шавкат қизининг фалсафа доктори (PhD) диссертацияси ҳимояси ҳақида эълон“. oak.uz. Qaraldi: 12-avgust 2025-yil.
- ↑ „TUROBJON MAQSUDOV. QAYTMAS TO‘LQINLAR (HIKOYA)“. Ziyouz.uz.
Izohlar
- ↑ Ayrim manbalarda tugʻilgan yili 1947-yil yil deb koʻrsatilsa, ayrimlarida 1957-yil deb keltiriladi