Turkqoʻrgʻon mahallasi

Turkqoʻrgʻon mahallasi (Akmal Poʻlat koʻchasi 31) – Oʻzbekiston Respublikasi Toshkent shahar Yunusobod tumanidagi mahalla. Usta Shirin, Yangiariq, Jomiy mahallalari bilan chegaradosh. Mahalla nomi oʻzbeklar tarkibidagi etnik guruh— turklar nomidan olingan boʻlib „turklar qoʻrgʻoni“ degan maʼnoni anglatadi. Oʻtmishda (14-asr oxiri) Taxtapul darvozasi Turk darvoza deb yuritilgan, uni qoʻriqlash turk urugʻiga mansub soqchilarga topshirilgan. Mahalla 19-asr oxiri – 20-asr boshlarida „Turk – yangi shahar“ deb atalgan. Turkqoʻrgʻon mahallasi Yunusobod tumani chegarasi oʻzgarishi munosabati bilan 1980-yil yangidan tashkil etilgan. Aholisi 2 165 kishi, asosan, oʻzbeklar, shuningdek, ruslar, qozoqlar, turkmanlar, tatarlar, armanlar, ozarbayjonlar va boshqalar yashaydi. Mahalla hududida 10 dan ortiq maishiy xizmat koʻrsatish maskanlari mavjud.