Turkmaniston teleminorasi
| Turkmaniston teleminorasi | |
|---|---|
| Muqobil nomlari | TV and Radio Center "Turkmenistan" |
| Umumiy maʼlumot | |
| Maqomi | tugatilgan |
| Turi | kuzatish, telekommunikatsiya, attraksion, restoran |
| Joylashuvi | Ashxobod, Turkmaniston |
| Koordinatalar | 37°51′45″N 58°14′17″E / 37.86250°N 58.23806°E |
| Balandligi | 211 metr (692 fut) |
| Dizayn va konstruksiya | |
| Meʼmor | Polimeks |
Turkmaniston minorasi (turkmancha: „Türkmenistan“ teleradio merkezi) — bu aloqa va kuzatuv minorasi boʻlib, u Turkmanistonning Ashxobod shahrida joylashgan[1]. U 2011-yilda qurib bitkazilgan. 211 metr (692 ft) balandligi bilan u Turkmanistondagi eng baland inshoot hisoblanadi.
Tarixi
Qurilish ishlari 2008-yilda turk kompaniyasi Polimeks tomonidan boshlangan.
Inshoot 2011-yil 17-oktabrda rasmiy ravishda ochilgan boʻlib, ochilish marosimida Prezident Gurbanguli Berdimuhamedov ishtirok etgan.
Vazifasi
Minoraning asosiy vazifasi televideniye va radiokommunikatsiya antennalariga xizmat qilishdan iborat, biroq bundan tashqari u yerda turistik markazlar ham tashkil etilgan boʻlib, turli qiziqarli obyektlarni oʻz ichiga oladi. Antennadan tarqaladigan signal qamrovi taxminan 100 kilometrni tashkil etadi. Hozirda minoradan analog televideniye, raqamli televideniye va radio uzatish amalga oshiriladi. Mijoz antennalari quyidagi telekanallarga xizmat qiladi: Altyn Asyr, Yashlyk, Miras, Turkmenistan, Turkmen Owazy, Ashgabat va Turkmen Sport.
145 metr balandlikda (29-qavatda) aylanuvchi restoran joylashgan boʻlib, unda milliy bezak unsurlari va zamonaviy meʼmoriy uslublar uygʻunlashtirilgan. Bu yerdan Ashxobod shahri va uning atrofidagi tabiiy manzaralarni tomosha qilish mumkin, restoran joylashgan aylanuvchi platforma esa panoramali koʻrinishni taʼminlaydi. 140 metr balandlikda (28-qavatda) VIP xona mavjud.
Minorada tashrif buyuruvchilar uchun ikkita kuzatuv maydonchasi — asosiy va maxsus observatoriya mavjud boʻlib, ularning har ikkalasi 360 darajali manzarani taqdim etadi. Asosiy observatoriya 150 metr balandlikda (30-qavatda) joylashgan boʻlib, u yerdan zamonaviy Ashxobod, shuningdek, obodonlashtirilgan hududlar va Kopetdog‘ togʻ etaklari koʻrinadi.
Sakkiz qirrali bezak elementi — „Oʻgʻuzxon yulduzi“ dunyodagi eng katta meʼmoriy yulduz tasviri sifatida tan olingan va Ginnes rekordlar kitobiga kiritilgan[2]. Teleminora dengiz sathidan 1000 metr balandlikda joylashgan boʻlib, u Ashxobod va uning atrof hududlarining deyarli barcha nuqtalaridan koʻrinadi.
Manbalar
 |
Vikiomborda „Turkmaniston teleminorasi“ mavzusi boʻyicha mediafayllar bor. |