Toshpoʻlat Arslonqulov

Toshpoʻlat Arslonqulov (1882 – Toshkent – 1962-yil, 5-sentyabr) – ganchkor-usta. Oʻzbekiston SSR xalq rassomi (1944). Oʻymakorlikni otasidan oʻrgangan. Arslonqulov choka pardoz usulida naqshlar oʻyishda va bezaklarga handasiy „zanjira“ shakllarini berishdagi mahorati bilan shuhrat qozongan. 1952-yildan P. Benkov nomidagi Respublika rassomlik bilim yurtida dars bergan. Buxoro va Toshkent oʻymakor ustalari bilan birga yevropa uslubida qurilgan Polovsev uyi (hozirgi Oʻzbekiston amaliy sanʼat muzeyi binosi)ni milliy oʻyma naqshlar bilan bezashda ishtirok etdi. Arslonqulov hozirgi A. Hidoyatov nomidagi teatr (1929), Oʻzbekiston Fanlar Akademiyasi Navoiy muzeyi (1939), Navoiy kutubxonasi binolarini, Navoiy teatri binosini (1946) bezashda qatnashdi. Navoiy teatrining tomosha zali, foye va boshqalardagi u ishlagan „majnuntol“, palak usulidagi bezaklar, rang-barang mujassamotlar binoning ichki koʻrinishiga alohida joziba baxsh etadi. U yaratgan goʻzal naqshlar, sharafalar, har xil bezaklar turli koʻrgazmalarda namoyish qilindi. Koʻp asarlari Oʻzbekiston davlat sanʼat muzeyida, shuningdek Moskva, Sankt-Peterburg va boshqa shaharlardagi muzeylarda saqlanmoqda.

Adabiyotlar

• OʻzME. Birinchi jild. Toshkent, 2000-yil