Toshkoʻmir koʻmir koni

Toshkoʻmir koʻmir koni — Qirgʻiziston Respublikasining Oʻsh viloyatida, Fargʻona vodiysining shimolida, Norin daryosi boʻyida joylashgan. Kon XIX asr oxirlaridan maʼlum boʻlib, geologik tuzilishi oʻsha paytda va XX asr boshlarida oʻrganilgan. Toshkoʻmir koʻmir koni 1916-yilda ishga tushirilgan. Konda koʻmir qazib olish 1985—95 yillar mobaynida ancha kamaygan. Toshkoʻmir koʻmir koni yura davri jinslari qatlamlaridan tashkil topgan. Koʻmirli qatlamning qalinligi 450–550 m. Unda 4 svita mavjud (quyidan yuqoriga): koʻmir osti yoki bazalt svitasi (qalinligi 40 m gacha), koʻmirli qatlam (yuqori leyas, 100 m gacha), koʻmir ustidagi qatlam (dogger, 30—150–200 m), rang-barang qatlam (malm, 120–150 m). Koʻmirli svitada 5 koʻmirli majmua boʻlib, ular orasida argillit, alevrolit va qumtosh qatlamlari mavjud. Koʻmir qatlamining qalinligi 0,6—4,5 m. Toshkoʻmir koʻmir koni koʻmiri chiqindili toshkoʻmir hisoblanadi. Koʻmirning koʻp qismidan rangli metallurgiyada, Oʻsh va Fargʻona shaharlaridagi issiqlik elektr stansiyalarida, kommunal xoʻjaliklarda keng foydalaniladi.