Kontent qismiga oʻtish

Toshkent shahridagi Webster universiteti

ZiyoSfera, erkin ensiklopediya
Toshkent shahridagi Vebster universiteti
Fayl:Toshkent shahridagi Vebster universiteti.jpg
Universitetining tashqi koʻrinishi (2024)
Turi xususiy notijorat universitet
Asos solingan sanasi 2019
Rektori Anthony Jarvis
Talabalari 5500 dan ortiq
Bakalavriat 8 yoʻnalish
Magistratura 4 yoʻnalish
Veb-sayti webster.uz
Tasvir yaratishda xatolik:

Toshkent shahridagi Vebster universiteti — AQShning Missuri shtatining Webster Groves shahridagi asosiy kampusiga ega, akkreditatsiyadan o‘tgan xususiy notijorat universitet. Universitet Oʻzbekistonda o‘z filialini ochgan birinchi Amerika universiteti hisoblanadi. Toshkent shahrida Vebster universiteti filialini tashkil qilishdan asosiy maqsadi faol va yetakchi talabalarni tayyorlashga qaratilgan yuqori sifatli taʼlim tajribasini taʼminlashdan iborat.

Kampuslari

Universitetning xalqaro kampuslari Yevropaning bir qancha mamlakatlarida, shu jumladan, Shveysariya, Avstriya, Gruziya va Gollandiyada joylashgan; Tailand, Gana va Xitoy kabi Osiyo va Afrika davlatlarida ham filiallar mavjud. Universitetning Markaziy Osiyodagi yagona filiali Toshkent shahrida ochilgan boʻlib, 2018—2019-oʻquv yilida oʻz faoliyatini boshladi[1]. 2019-yil avgust oyida Toshkent shahridagi Vebster universiteti Alisher Navoiy shoh ko‘chasi manzilidagi rekonstruksiya qilingan binoga ko‘chdi.

Tarixi

Toshkent shahridagi Vebster universiteti Oʻzbekiston Prezidentining 2019-yil 20-martdagi PQ-4245-sonli qaroriga muvofiq Oliy va oʻrta maxsus taʼlim vazirligi hamda Webster universiteti - taʼsischilari hamkorligida "Toshkent shahrida Vebster universitetining ta'lim dasturlarini amalga oshirish markazi" tashkil etildi[2].

Mavjud taʼlim dasturlari

Toshkent shahridagi Vebster universiteti quyidagi yoʻnalishlar boʻyicha bakalavriat taʼlim dasturlarini taklif etadi[3]:

  1. Bachelor of Science in Business Administration — yoʻnalishida bitiruvchilar oʻz bizneslarini boshqarishlari, kompaniyalarda boshqaruv lavozimlarini egallashlari va loyihalarni boshqarishlari mumkin. Talabalar biznesda keng tarqalgan turli muammolarni hal qilish uchun tahliliy vositalar va jarayonlardan foydalanadilar;
  2. Bachelor of Arts in Economics — yoʻnalishida bitiruvchilar bank, moliya, sugʻurta, davlat sektorlarida ish topishlari mumkin. Talabalar resurslarni ishlab chiqarish, taqsimlash va isteʼmol qilishni belgilovchi omillarni oʻrganadilar. Ular siyosat oʻzgarishlarining iqtisodiyotga qanday taʼsir qilishini tushunadilar, global iqtisodiyot boʻyicha kuchli bilim bilan birga analitik fikrlashni rivojlantiradilar;
  3. Bachelor of Arts in Media Studies — yoʻnalishida bitiruvchilar muloqot zarur bo‘lgan har qanday joyda — yirik kompaniyalarning marketing bo‘limlarida, matbuot xizmatlarida, ommaviy axborot vositalarida, reklama agentliklarida ishlashlari mumkin. Vebsterda talabalar jamoatchilik bilan aloqalarga strategik yondashuv, maqsadli kontent yaratish va axborotni tanqidiy tahlil qilish bilan bogʻliq koʻnikmalarga ega boʻladilar;
  4. Bachelor of Arts in International Relations — yoʻnalishida bitiruvchilari xalqaro tashkilotlarda, yirik kompaniyalarda ishlash malakasiga ega boʻladilar. Talabalar xalqaro boshqaruv institutlari o‘rtasidagi murakkab munosabatlarni o‘rganadilar, jahon mamlakatlari va xalqaro birlashmalarning ichki va tashqi siyosatiga taʼsir etuvchi huquqiy, tarixiy, ijtimoiy-iqtisodiy va siyosiy omillarni tahlil qiladilar; Vebster talabalari, shuningdek, jahon hamjamiyatining dinamikasi, strukturaviy xususiyatlari va gumanitar muammolarini oʻrganadilar;
  5. Bachelor of Education Studies — dasturi keng koʻlamli taʼlim kontekstlarida oʻqitishga qaratilgan. Bunda oʻquv dasturlari, oʻrganish va taʼlim tadbirlarini ishlab chiqish va amalga oshirishda global qamrov, fan va texnologiya, shuningdek, mahalliy hamjamiyatning muhimligiga urgʻu qaratadi. Ushbu bakalavriat dasturi talabalarga zamonaviy, globallashgan sharoitlarda oʻqitish uchun zarur boʻlgan keng koʻlamli vositalarni taqdim etadi. BEd mutaxassisliklari turli oʻquvchilarning talab va ehtiyojlariga munosib oʻqituvchilarga aylanadi.
  6. Bachelor of Science in Management Information Systems — bakalavr darajasi texnologiya va biznes tushunchalarini birlashtiradi, talabalarga IT bilan bogʻliq mavjud va kelajakdagi biznes muammolarini hal qilish uchun zarur boʻlgan bilim va koʻnikmalarni shakllantiradi.
  7. Bachelor of Science in Computer Science — ushbu dastur zamonaviy kompyuter texnologiyalari va innovatsiyalariga bo‘lgan ehtiyojni qondira oladigan mutaxassislarni tayyorlashga qaratilgan. Dastur informatikaning asosiy va muhim yo‘nalishlari asosida ishlab chiqilgan bo‘lib, nazariy bilimlar bilan bir qatorda amaliy ko‘nikmalarni ham o‘z ichiga oladi. Talabalar IT sohasida muvaffaqiyatli faoliyat yuritishlari yoki kasbiy magistratura dasturlarida tahsilni davom ettirishlari uchun zarur bo‘lgan bilim va tajribani egallaydilar.
  8. Bachelor of Laws in International Law — ushbu dastur yuridik ta’lim olishni istagan shaxslar uchun ochiq bo‘lib, huquqiy faoliyatning turli yo‘nalishlarida ishlash, global fuqarolikni ilgari surish va xilma-xillik hamda inklyuzivlikni himoya qilish imkoniyatini yaratadi. Dastur xalqaro huquq sohasida zamonaviy yondashuvlarni o‘rgatadi, xalqaro nizolarni hal etishda yangicha va asosli yechimlar ishlab chiqishni rag‘batlantiradi. Shuningdek, u talabalarni global fikrlashga, madaniyatlararo almashinuvga va kasbiy o‘sishga tayyorlaydi.

Bakalavriat – kengaytirilgan dastur

  • Nursing (BSN) — ushbu bakalavriat dasturida sog‘liqni saqlash, shaxsiy rivojlanish va kompleks hamshiralik amaliyotiga tayyorlashga katta e’tibor qaratiladi. Darslar turli professor-o‘qituvchilar, zamonaviy o‘quv-uslubiy materiallar va amaliy tajriba asosida olib boriladi. Dastur davomida talabalar tahliliy fikrlash, samarali muloqot qilish kabi kasbiy jihatdan muhim ko‘nikmalarni rivojlantiradilar.
  • Chemistry (BS) — kimyo bo‘yicha bakalavr dasturi organik, noorganik, analitik, fizik va biokimyo sohalarini o‘z ichiga olgan zamonaviy va keng qamrovli ta’limni taklif etadi. Laboratoriya ishlari orqali talabalar sanoat, davlat va ilmiy-tadqiqot muassasalarida ishlash yoki tibbiyot, stomatologiya kabi yo‘nalishlarda o‘qishni davom ettirish uchun zarur bo‘lgan amaliy ko‘nikmalarga ega bo‘ladilar. Ushbu daraja, shuningdek, kimyo bilan bog‘liq sog‘liqni saqlash va boshqa kasblar uchun mustahkam tayyorgarlikni ta’minlaydi.
  • Biology (BA) — ushbu oʻquv yo‘nalishi keng qamrovli bilim olishni istagan talabalar uchun mo‘ljallangan. Ushbu daraja sog‘liqni saqlash, ilmiy ta’lim, ekologiya va boshqa fanlar bilan bog‘liq turli sohalarga tayyorgarlikni ta’minlaydi. Talabalar quyidagi to‘rtta ixtisoslikdan birini tanlash orqali bakalavr darajasini olishlari mumkin: biologik xilma-xillik, hisoblash biologiyasi, ta’lim yoki sog‘liqni saqlash.
  • Psychology (BA) — mazkur dastur inson xulq-atvori, psixologik nazariya va tadqiqot metodlari bo‘yicha chuqur bilim beradi. Talabalar menejment, ta’lim va boshqa tegishli sohalarda ishlash uchun zarur bo‘lgan tayyorgarlikni oladilar. Bitiruvchilar psixologiya, konsalting yoki hamshiralik kabi sohalarda professional litsenziya olishni istasalar, keyingi bosqich uchun qo‘shimcha kurslarga ehtiyoj boʻlishi mumkin.

Shuningdek, Toshkent shahridagi Vebster universiteti quyidagi magistratura mutaxassisliklarida ham taʻlim dasturlarini taklif etadi[4]:

  1. Master of Business Administration (MBA) — ushbu dastur o‘z martabasi, malakasini oshirish va biznes dunyosida strategik o‘yinchi bo‘lishni istagan mutaxassislar uchun mo‘ljallangan. Dastur moslashuvchan jadval, kichik guruhlar, shaxsiy yondashuv va real hayotga asoslangan ta’lim usullarini taklif etadi. Toshkent kampusida MBA dasturi marketing va loyiha boshqaruvi bo‘yicha ixtisoslashuvlarni o‘z ichiga oladi.
  2. Master of Health Administration (MHA) — manzkur dastur sog‘liqni saqlash tizimlarida strategik qarorlar qabul qilish va turli xodimlarni boshqarish uchun zarur bo‘lgan bilim va ko‘nikmalarni taqdim etadi. Shuningdek, dastur tibbiyot va sog‘liqni saqlash mutaxassislariga o‘z martaba imkoniyatlarini kengaytirishda yordam beradi.
  3. Education and Innovation (MA) — ushbu dastur ta’lim dizayni va innovatsiyalar sohasida bilim, ko‘nikma va ijodiy qobiliyatlarni rivojlantirishga qaratilgan. Dastur jamoat, biznes va tashkilot yetakchilari, trenerlar, o‘qituvchilar va boshqa mutaxassislar uchun mo‘ljallangan bo‘lib, shaxsiy o‘zgarishlar va professional samaradorlikni oshirishga yordam beradi.
  4. Teaching English to Speakers of Other Languages (MA TESOL) + TESOL Certificate — ushbu dastur ingliz tilini o‘qitish sohasida ilg‘or pedagogik ko‘nikmalar, madaniy kompetensiya va til o‘rganish jarayonini chuqur tushunishni rivojlantirishga qaratilgan. Dastur moslashuvchan tuzilishga ega bo‘lib, talabalarga o‘z kasbiy maqsadlariga mos ravishda ta’lim olish imkoniyatini beradi..

Oʻqitish tizimi

Tasvir yaratishda xatolik:
Anthony Jarvis. Toshkent shahridagi Vebster universiteti rektori

Universitet taʼlim jarayonlariga Toshkent shahridagi Vebster universiteti rektori Anthony Jarvis boshchilik qiladi[5]. Universitetda bugungi kunda bakalavriat va magistratura taʼlim darajasida 6,500 ga yaqin talaba tahsil olmoqda.

Filial yiliga ikki marta talabalarni qabul qiladi. Shu tartibda, qabul qilingan guruhlar avgust yoki yanvar oyida oʻqishni boshlaydilar.

Oʻqitish tizimi CANVAS elektron taʼlim platformasi asosida amalga oshiriladi. Ushbu elektron taʼlim platformasi kompyuter va mobil uyali aloqa telefonlariga yuklangan holda, uy vazifasi va topshiriqlarni yuklash, fanlarning onlayn muhokamasida ishtirok etish, olingan bilimlarni mustahkamlash uchun onlayn testlarni bajarish va oʻqituvchi bilan bevosita onlayn aloqa qilish imkonini beradi.

Bino

Toshkent shahridagi Vebster universiteti ochilgan davrdan boshlab poytaxt markazidagi tarixiy binoda joylashgan boʻlib, Respublika Oliy taʼlimi sohasida xalqaro hamkorlikni rivojlantirishda sodiqlik timsoliga aylandi. Shuningdek, 2020-yilda ham Oliy va oʻrta maxsus taʼlim vazirligi universitetga qoʻshni bino va yer ajratdi. Talabalar va chet ellik oʻqituvchilar uchun yotoqxona, qoʻshimcha darsxonalar, axborot laboratoriyalari, video va audio dasturlarini yozish studiyalari tashkil etildi. Sharqiy binoda talabalar uchun sport zali va ovqatlanish zonalari tashkil etilgan.

Axborot resurs markazi

Axborot resurs markazi (e-library) 30 oʻrinli elektron kutubxona hisoblanadi. Axborot resurs markazi talabalarga Sent-Luisdagi markaziy kutubxonadan foydalanish, xalqaro ilmiy-texnik maʼlumotlar va 5690 dan ortiq elektron darslik hamda adabiyotlar bazasiga kirish imkonini beradi.

Atletika

Vebster universitetining atletik talismasi Gorlok boʻlib, maktabning Webster Grovesdagi Gore va Lockwood avenyulari burchagida joylashgani sharafiga shunday nomlangan.

Yana qarang

Manbalar

  1. ↑ „Tahkent hosts Webster university’s oficcial opening ceremony“.
  2. ↑ „TOSHKENT SHAHRIDA Webster UNIVERSITETINING TA’LIM DASTURLARINI AMALGA OSHIRISH MARKAZINI TASHKIL ETISH TO‘G‘RISIDA“.
  3. ↑ „Bachelor’s Degree Programs“.
  4. ↑ „Master’s Degree Programs“.
  5. ↑ „Anthony Jarvis Named Interim Director of Webster University Tashkent“.

Havolalar

"https://ziyosfera.uz/index.php?title=Toshkent_shahridagi_Webster_universiteti&oldid=826358" dan olindi