Toʻy bola
| „Toʻy bola“ | |
|---|---|
| Abdulhay Karimov singli | |
| Chiqarilgan sanasi | 1990 |
| Yozib olingan | 1990 |
| Davomiyligi | 6:34 |
| Qoʻshiq muallif(lar)i | Marhabo Karimova |
| Bastakor(lar) | Abdulhay Karimov |
| Klipi | |
| „Toʻy bola“ YouTubeda | |
„Toʻy bola“ („Toy bola“, „Toychoq bola, toy bola“ deb ham nomlanadi) — oʻzbek xonandasi Abdulhay Karimov ijro etgan qoʻshiq. 1990-yil yozib olingan. „Toychoq bola, toy bola“ Karimov repertuaridagi eng taniqli qoʻshiqlarning biri boʻlib, unga katta shuhrat olib kelgan. Qoʻshiq Oʻzbekistonda hamda qoʻshni mamlakatlarda sunnat toʻylarining ajralmas qismiga aylangan. Qoʻshiq musiqasini Karimovning oʻzi rafiqasi Marhabo Karimova yozgan sheʼrga bastalagan.
Qoʻshiq matni xatna qilinib, Muhammadga ummat boʻlgan toʻy bola haqidadir. Karimovning soʻzlariga koʻra, qoʻshiqni turmush oʻrtogʻi Karimova taklifi bilan bastalagan.[1] Xonanda „Toʻy bola“ qoʻshigʻini 1992-yil Toshkent shahrida boʻlib oʻtgan Mustaqillik bayrami chogʻida ijro etganidan keyin tarona butun Oʻzbekiston boʻylab tanilgan. Oʻsha yili qoʻshiq uchun sodda klip suratga olingan. Karimov qoʻshiq tarixini quyidagicha xotirlagan:
„Toʻylar muborak“ degan qoʻshiq boʻlardi-da, toʻy bola uxlab qolardi. Toʻylarda yaxshi ziyofatlar boʻladi-yu, toʻy bola haqida hech kim gapirmaydi. Shu, turmush oʻrtogʻim Marhabo Karimova toʻyga borib keldi-yu, oʻzi soʻradi mendan. … Keliboq, ertasiga sheʼr yozibdi-da. Toʻy bola haqida. Shu bola haqida boʻladi-yu, kelajagimiz bu bola, deb turib, indan keyin, haligi, „Toʻy bola“ qoʻshigʻi yozilgan. Yozilgandan keyin endi mustaqillik toʻy bolasi, deb oʻsha mustaqillik bayramida aytganmiz.[2]
Manbalar
- ↑ „«Қизил олма», «Эсингдами сени?», «Ишонма» ва ўзбек эстрадасидаги 20-30 йилдан буён «яшаётган» бошқа қўшиқлар (видео)“. DunyoNews (3-yanvar 2022-yil). Qaraldi: 14-avgust 2022-yil.
- ↑ „Тўйболалар қўшиғи тарихи: "Тойчоқ бола, той бола"“. Ozodlik radiosi (7-oktyabr 2014-yil). Qaraldi: 30-iyun 2022-yil.