Toʻpchoq

Toʻpchoq — Qashqadaryo viloyati, Kitob tumanidagi qishloq. „Toʻpchoq“ qadimiy turkiy etnonim sanaladi. Tadqiqotchilar fikriga koʻra, bu soʻz qadimdan otlarga berilgan sifatdan kelib chiqqan. V. V. Radlov lugʻatlarida toʻpchoq toʻbichoq „dumaloq, sharsimon; semiz, chiroyli ot“ maʼnosida izohlangan. G. Yarring ham bu soʻzni „chiroyli, xushbichim, semiz ot“ sifatida qayd etadi.

N. A. Baskakovning taʼkidlashicha, toʻpchoq epiteti faqat otlarga emas, balki odamga nisbatan ham „chiroyli, xushbichim“ maʼnosida qoʻllangan. Shu asosda u kishi ismi sifatida shakllangan, keyinchalik esa urugʻ nomiga aylangan.

Bu etnonim juda qadimiy boʻlib, „Igor jangnomasi“da ham uchraydi. Qozogʻistonning Oqmoʻla viloyatida qoraqula toʻbichoq urugʻi mavjud. Kenagaslar tarkibida ham toʻpchoq degan urugʻ boʻlgan.