The Door into Summer

The Door into Summer

Birinchi nashr muqovasi
Asl nomi	The Door into Summer
Muallif(lar)	Robert A. Heinlein
Muqova artist(lar)i	Mel Hunter
Mamlakat	Amerika Qoʻshma Shtatlari
Til	inglizcha
Janr(lar)i	Ilmiy fantastika
Nashr etilgan sanasi	Serial versiyasi 1956-yil; qattiq muqovali nashri 1957-yil
Nashriyot	Doubleday
ISBN	0-330-02516-3
OCLC	16365175

The Door into Summer — amerikalik ilmiy-fantastik yozuvchi Robert A. Heinlein qalamiga mansub roman. Asar dastlab 1956-yilning oktyabr, noyabr va dekabr oylarida „The Magazine of Fantasy & Science Fiction“ jurnalida seriya koʻrinishida chop etilgan (muqova va ichki rasmlarni Kelly Freas chizgan). 1957-yilda esa qattiq muqovada kitob holida nashr etilgan.

Gʻoyaning tugʻilishi

Asar gʻoyasi Heinlein keyinchalik eslab oʻtgan bir hodisadan kelib chiqqan:

“Koloradoda yashab yurgan paytlarimizda qor yog‘ib berdi. Mushugim tashqariga chiqmoqchi bo‘ldi. O‘zi mushuklarni juda yaxshi ko‘raman. Eshikni ochdim, lekin u chiqqisi kelmay, hadeb miyovlayverdi. U ilgari ham qorni ko‘rgan edi, shunga tushunmay hayron qoldim. Boshqa eshiklarni ham ochib berdim, baribir chiqmadi. Shunda Jinni: “E, u yozga ochiladigan eshikni qidiryapti”, deb qoldi. Men qo‘limni ko‘tarib, boshqa hech narsa dema, dedim-da, 13 kun ichida „The Door into Summer“ romanini yozib tugatdim.

Syujeti

Roman 1970-yilda, muhandis va ixtirochi Daniel Boone Davisning doimiy ichkilikka berilib yurgan kezlaridan boshlanadi. U oʻzi asos solgan „Hired Girl, Inc.“ kompaniyasini sherigi Miles Gentry hamda kompaniya hisobchisi Belle Darkin sababli boy bergan edi. Aslida Belle Danielning qayligʻi boʻlib, uni aldash yoʻli bilan yetarlicha ovoz berish aksiyalarini qoʻlga kiritadi va Miles bilan birgalikda kompaniyani egallab oladi. Danielning dunyodagi yagona doʻsti qorda tashqariga chiqishni umuman yoqtirmaydigan, „Piti“ (toʻliq ismi Petroniy Arbitor) laqabli urishqoq mushugi edi.

„Hired Girl, Inc.“ robot-changyutgichlar ishlab chiqarardi. Daniel uy-roʻzgʻor uchun moʻljallangan koʻp funksiyali yangi robot — Flexible Frank ustida ishlayotgan paytda Miles kompaniyani hamda ushbu yangi robotni „Mannix Enterprises“ korporatsiyasiga sotish niyatida ekanini bildiradi. Buning evaziga Miles oʻsha korporatsiyada vitse-prezident lavozimini olishi kerak edi. Mustaqil qolishni xohlagan Daniel bu kelishuvga qarshi chiqadi, ammo ovoz berishda yutqazib, bosh muhandislik lavozimidan boʻshatiladi. Katta miqdordagi tovon puli va qoʻlidagi qolgan aksiyalar bilan koʻchada qolgan Daniel anabioz xizmatidan foydalanishga qaror qiladi. U oʻttiz yildan keyin uygʻonib, yanada porloq kelajakda yashashni umid qiladi. Anabioz markazidagi koʻrikdan oʻtkazuvchi shifokor Danielning mastligini darhol payqaydi. U Danielga 24 soatdan keyin oʻtkaziladigan muolajaga mutlaqo xushyor holda kelishni, aks holda muolaja bekor qilinishini aytib ogohlantiradi.

Oʻziga kelib, xushyor tortgan Daniel rejasini oʻzgartirib, qarshi hujumga oʻtishga qaror qiladi. Avvaliga u „Hired Girl“dagi aksiyalari sertifikatini oʻzi ishongan yagona insonga — Milesning oʻgay qizi Frederica („Riki“) Virginia Gentryga pochta orqali yuboradi. Shundan soʻng Daniel Miles bilan hisob-kitob qilish uchun uning uyiga boradi va u yerda Belleni uchratadi. Belle Danielga zombi deb ataluvchi noqonuniy dori yuboradi. Dori taʼsirida Daniel oʻz xohish-ishtiyoqini yoʻqotib, maʼnosiz boʻysunuvchi ahvolga tushib qoladi. Belle va Miles Danielning anabiozga ketish rejasidan xabar topgach, uni Bellening shubhali sherigi — „Mannix“ korporatsiyasiga qarashli boshqa bir anabioz omboriga joylashtiradilar.

Daniel 2000-yilda uygʻonadi. Uning na puli, na bir vaqtlar oʻzi bilgan odamlarni qanday topish haqida tasavvuri boʻlmaydi. Belle unga qoldirgan ozgina mablagʻ ham 1987-yilda „Mannix“ korporatsiyasining bankrot boʻlishi bilan yoʻqqa chiqqan edi. Daniel hushini yoʻqotgan tuni Milesning uyidan qochib ketgan Piti laqabli mushugidan ham ajralgan, endilikda oʻrta yoshlarga borib qolgan Rikini qayerdan qidirishni ham bilmasdi.

Shunga qaramay, Daniel hayotini qayta yoʻlga qoʻyishga kirishadi. U hozirda „Hired Girl“ kompaniyasiga egalik qilayotgan „Geary Manufacturing“ korxonasini oʻzini rasman vakillik lavozimiga ishga olishga koʻndiradi. Keyinchalik u Milesning 1972-yilda vafot etganini, Belle esa ichkilikka berilib, umri xazon boʻlgan bir janjalkash kampirga aylanganini bilib oladi. Bellening esida qolgani faqat shu boʻladiki, Riki Daniel anabioz qilingan vaqtlarda buvisining yoniga yashagani ketgan edi. Bellening Miles bilan tuzgan barcha rejalari barbod boʻlgandi, chunki Daniel tuzoqqa tushirilgan oʻsha kechada Flexible Frank prototipi ham gʻoyib boʻlgan edi.

Havolalar

• The Door into Summer parts one, two, and three on the Internet Archive