Tastibutoq qabristoni

Tastibutoq qabristoni — jez davrita oid yodgorlik (mil. av. XIII—XII asrlar). Gʻarbiy Qozogʻistondagi Tastibutoq daryochasi sohilidagi Tastibutoq ovuli yaqinidan topilgan. 3 yodgorlikdan iborat. Tastibutoq I va II qabriston, III esa, manzilgoh. Arxeolog V. S. Sorokin qazishma ishlari olib borgan (1956—58). 57 ta qoʻrgʻon ochilgan, yuzga yaqin qabr qazilgan, ularning 10 tasi tosh qutidan, qolganlari esa yorma goʻrlardan iborat. Qabrlardan sirtiga chiziqli geometrik shaklda naqsh berilgan sopol idishlar, jez munchoqlar, bilaguzuklar, pichoqlar, bigizlar va turli taqinchoqlar topilgan. Aholi chorvachilik, qisman ibtidoiy dehqonchilik bilan shugʻullangan. Tastibutoq qabristonidan chiqqan materiallar uning Andronovo madaniyatiga mansub qabilalar bilan genetik jihatdan birligini koʻrsatdi.