Take Me to Your Heaven (qoʻshiq)

„Take Me to Your Heaven“
Charlotte Nilsson singli
Charlotte albomidan
Chiqarilgan sanasi	1999-yil 7-iyun (1999-06-07)
Janr	Pop
Davomiyligi	3:04
Leybl	Mariann
Qoʻshiq muallif(lar)i	Marcos Ubeda Gert Lengstrand
Prodyuser(lar)	Micke Wendt
Charlotte Nilsson singllari xronologiyasi
„Kärleken är“ „Take Me to Your Heaven“ „When Spirits Are Calling My Name“
Official performance video
"Take Me to Your Heaven" YouTubeda

„Take Me to Your Heaven“ — shved xonandasi Charlotte Nilsson ijro etgan tarona. Qoʻshiq musiqasi Lars Diedricson, inglizcha matni esa Marcos Ubeda tomonidan yozilgan. Ushbu taronada Shvetsiya nomidan Quddusda oʻtgan Eurovision qoʻshiq tanlovi 1999da qatnashib, birinchilikni qoʻlga kiritgan. Bungacha mazkur tarona shved tilida, Gert Lengstrand yozgan matn bilan „Tusen och en natt“ ([ˈtʉ̌ːsɛn ɔ ɛn ˈnatː]; oʻzbekcha: „Ming bir kecha“) nomi ostida oʻsha yilgi Melodifestivalen tanlovida ham gʻolib boʻlgan edi. Qoʻshiqning inglizcha talqini esa 1999-yil 7-iyun kuni Mikael Wendt produserligida xalqaro miqyosda singl sifatida sotuvga chiqarilgan. Tarona singllar xit-paradlarida muvaffaqiyat qozonib, Shvetsiyada 2-oʻrin, Flandersda 5-oʻrin, Norvegiyada 10-oʻrin va Buyuk Britaniyada 20-oʻringacha koʻtarildi.

Tarixi

Yaratilish tarixi

„Tusen och en natt“ qoʻshigʻi Lars Diedricson musiqasi va Gert Lengstrand matni asosida yaratilgan boʻlib, uni shved xonandasi Charlotte Nilsson ijro etgan. Xonanda qoʻshiqning shved tilidagi asl varianti bilan birga, Marcos Ubeda qalamiga mansub „Take Me to Your Heaven“ nomli inglizcha nusxasini ham ijro etgan. Bu joʻshqin tarona sevgi haqida boʻlib, unda xonanda oʻz sevgilisidan uni chin dildan sevishini va shu orqali baxt choʻqqisiga olib chiqishini soʻraydi. Qoʻshiq klipi qish mavsumiga bagʻishlangan boʻlib, unda Sharlottaning qorli yoʻllardan yurib borayotgani tasvirlangan.

Eurovision

1999-yil 27-fevralda Nilsson ijrosidagi „Tusen och en natt“ taronasi Shvetsiyaning „Melodifestivalen“ milliy tanlovining 38-mavsumida gʻoliblik uchun kurashdi. Tarona 217 ball toʻplab, tanlovda gʻoliblikni qoʻlga kiritdi. Mazkur festival Sveriges Television (SVT) telekanali tomonidan Eurovision uchun mamlakat vakillarini saralash vazifasini oʻtkazar edi. Tanlovdagi ushbu gʻalaba evaziga Charlotte Nilsson va uning taronasi Shvetsiyaning Eurovisiondagi rasmiy vakiliga aylandi.

1999-yil 29-may kuni Quddus shahridagi Xalqaro kongress markazida Eurovision qoʻshiq tanlovi boʻlib oʻtdi. Ushbu tadbirga Isroil teleradiokompaniyasi (IBA) mezbonlik qildi va tanlov butun qitʼa boʻylab jonli efirda uzatildi. Tanlov kechasida Charlotte Nilsson „Take Me to Your Heaven“ taronasini oʻn beshinchi raqam ostida ijro etdi. Nilsson Kipr nomidan qatnashgan Marlain ijrosidagi „Tha'ne erotas“ qoʻshigʻidan keyin hamda Portugaliya vakili Rui Bandeira ijro etgan „Como tudo começou“ taronasidan oldin sahnaga chiqdi.

Ovoz berish yakunlanganidan keyin, mazkur tarona 163 ball toʻpladi va birinchi oʻrinni egallab, tanlovda gʻolib boʻldi. 2000-yilda Daniya vakili boʻlgan Olsen Brothers guruhi „Fly on the Wings of Love“ qoʻshigʻi bilan gʻalaba qozondi va Nilssondan keyingi Eurovision gʻolibligini qoʻlga kiritdi.

Natijalar va keyingi voqealar

Charlotte Nilsson 2008-yilgi tanlovda Shvetsiya nomidan yana bir bor ishtirok etdi. Bu safar u Charlotte Perrelli ismi ostida „Hero“ qoʻshigʻini ijro etdi va oʻn sakkizinchi oʻrinni egalladi.

2024-yil 9-may kuni Shvetsiyaning Malmö shahrida boʻlib oʻtgan Eurovision 2024 qoʻshiq tanlovining ikkinchi yarim finalida Perrelli ham sahnaga chiqdi. U tomoshabinlar bilan birgalikda qoʻshiq kuylash shousida ishtirok etib, aynan shu taronani ijro etdi.