Taj Coromandel — Hindistonning Chennay shahrida joylashgan besh yulduzli hashamatli mehmonxona[1]. Koromandel sohili sharafiga nomlangan hamda (HACCP) va (ISO 14001) sertifikatlariga ega ushbu mehmonxona 1974-yilda ochilgan[2][3]. U Taj Group of Hotels tarmogʻining hamkori hisoblangan Oriental Hotels Limited kompaniyasiga tegishli boʻlib, guruhning hashamatli mehmonxonalari boʻlimiga kiritilgan.

Taj Coromandel
Taj Coromandel
Joylashuvi 37, Mahatma Gandi koʻchasi, Nungambakkam, Chennay, Tamil Nadu, Hindiston
Koordinatalar 13°03′30″N 80°14′51″E / 13.058292°N 80.247633°E / 13.058292; 80.247633
Turi Mehmonxona
Asosiy sanalar 1974-yil 14-aprel — ochilgan
Qarovchi Taj Hotels
Holati Faoliyat yuritmoqda
Sayti Rasmiy sayti

Taj Coromandel shahardagi birinchi[4] va deyarli qirq yil davomida yagona boʻlib kelgan hashamatli mehmonxona edi[5].

Joylashuvi

Mehmonxona Nungambakkam dahasidagi Brakathambal koʻchasiga tutashgan Mahatma Gandi koʻchasi, 37-uyda joylashgan.

Tarixi

Mehmonxona Chennay shahri joylashgan Koromandel sohili sharafiga shunday nomlangan. Shuningdek, bu nom Koromandel daraxti (sanskrit tilida Kalpavriksha) nomidan ham kelib chiqqan boʻlib, afsonalarga koʻra, u oʻz soyasida turgan insonning har qanday tilagini roʻyobga chiqarish qudratiga ega. Mehmonxonaga tashrif buyurgan har bir mehmonga bu yerda qolish davomida istagan barcha narsasi muhayyo etilishiga majoziy ishora qiluvchi ushbu maʼno ham mehmonxonaning bunday nomlanishiga sabab sifatida keltiriladi. Buning ramzi sifatida mehmonxonaning marmar peshtoqiga oʻsha daraxt tasviri oʻyib tushirilgan[6].

1996-yilda „Southern Spice“ restorani ishga tushirildi[7].

Sharoitlar va qulayliklar

Secretary Clinton Is Greeted By Taj Coromandel Employees
AQSH Davlat kotibi Hillari Klinton 2011-yil 20-iyulda Hindistonga tashrifi chogʻida Taj Coromandel xodimlari tomonidan anʼanaviy tarzda kutib olinmoqda.

Taj Coromandel mehmonxonasida jami 212 ta xona, jumladan, 11 ta lyuks xona mavjud. „Superior“ toifasidagi xonalarning maydoni taxminan 28 m² ni tashkil etadi. „Taj Club“ xonalari esa eng yuqori ikki qavatda joylashgan[8]. Eng yuqori qavatdan oʻrin olgan „Royal Suite“ (Qirollik lyuksi) mehmonxona, ikkita vannaxona va shahar manzarasi koʻrinib turadigan, oʻtirib dam olishga moʻljallangan xususiy ayvonni oʻz ichiga oladi. Umumiy maydoni taxminan 139 m² ga teng ushbu lyuks xonada jakuzi, mehmonlar uchun qoʻshimcha vannaxona, alohida ovqatlanish hududi, uch tomonlama ko‘zguli kiyinish xonasi hamda kichik oshxona mavjud boʻlib, shaxsiy xizmatchi ham biriktirilgan. Mazkur xonada istiqomat qiluvchi mehmon „Taj Club“ning barcha qulayliklari va xizmatlaridan foydalanish huquqiga ega[9].

Mehmonxonada quyidagi restoranlar faoliyat yuritadi: Anise — 24 soat ishlaydigan qahvaxona va turli xalqlar taomlari restorani, Chipstead — launj-bar, Tea Lounge — dunyoning turli burchaklaridan keltirilgan xilma-xil choylar tortiq etiladigan maskan, Golden Dragon — Sichuan va Kanton oshxonalariga ixtisoslashgan restoran, Southern Spice — Hindistonning toʻrtta janubiy shtati taomlarini taqdim etuvchi restoran hamda The Prego — italyan oshxonasi restorani[10][11].

Mehmonxonada sakkizta konferensiya zali, tantanalar zallari va majlislar xonalarini oʻz ichiga olgan, umumiy maydoni taxminan 1 115 m² boʻlgan biznes va qabul marosimlari hududi mavjud. „The Clive“ zali 30 oʻringa moʻljallangan[12]. Shuningdek, mehmonxonada laguna uslubidagi, uzunligi 5 metr boʻlgan suzish yoʻlakchasiga ega hovuz ham bor[13].

Taʼmirlash ishlari

Mehmonxona tashkil etilganidan buyon ilk bor 1980-yillarning oxiri va 1990-yillarning boshlarida taʼmirlangan boʻlsa, 2011-yilda taxminan 1 milliard rupiy evaziga ikkinchi marta qayta taʼmirlandi. „Belt Collins“ dizayn firmasi yangi landshaft dizayniga ega kirish yoʻlagini loyihalashtirdi, gonkonglik Chandu Chadda esa keng foyening dizaynini yangiladi. Shuningdek, „Belt Collins“ hovuz yonida Taj tarmogʻining „Jiva“ brendi ostidagi taxminan 836 m² maydonga ega spa-markaz loyihasini ishlab chiqdi. Bundan tashqari, mehmonxonada taxminan 557 m² maydonli [sport zalini qurish ishlari ham olib borildi[14]. „Southern Spice“ restorani 2011–2012-yillarda qayta taʼmirlanib, uning ichki dizayni Singapurning „Poole Associates“ kompaniyasi vakili Ed Pul tomonidan ishlab chiqildi[7].

2013-yilda mehmonxona taxminan 1 208 m² maydonga ega „Ballroom“ banketlar zalini qayta ishga tushirdi[5].

Mashhur mehmonlar

Taj Coromandel mehmonxonasida toʻxtagan nufuzli mehmonlar qatorida Qirolicha Yelizaveta II[15], Jimmi Karter[4], York gersogi, Italiya Bosh vaziri Romano Prodi, Bill Klinton[4], Festus Gontebanye Mogae, Mod Olofsson, Jeki Chan[4], Sergey Stanishev, Jeffri Archer, Maxa Chakri Sirindxorn[16], Hillari Klinton[9] hamda Yaponiya imperatori Akixito va imperatritsasi Michiko[17] bor.

Mukofot va eʼtiroflar

2023-yilda mehmonxona Xalqaro mehmondoʻstlik kengashi (IHC, London) va Xalqaro mehmonxona boshqaruvi instituti (IIHM) tomonidan tashkil etilgan 8-Xalqaro mehmondoʻstlik kunida „Top Hospitality Honors“ (Mehmondoʻstlik sohasidagi oliy eʼtirof) bilan taqdirlandi[18]. Mehmonxona qoshidagi „Southern Spice“ restorani esa „Restoranlar“ nominatsiyasida mukofotga sazovor boʻldi[18].


Manbalar

  1. ↑ „Category : 5 Star Delux“. List of Approved Hotels as of : 06/01/2013. Ministry of Tourism, Government of India (2013). 2013-yil 18-yanvarda asl nusxadan arxivlangan. Qaraldi: 2026-yil 4-noyabr.
  2. ↑ „Taj Coromandel, Chennai“. Taj Hotels. Qaraldi: 2026-yil 4-noyabr.
  3. ↑ „Taj Coromandel“. Condé Nast Traveller. Qaraldi: 4 November 2026.
  4. ↑ 4,0 4,1 4,2 4,3 Joshi, Sonam. „Le Royal Meridien“. Chennai: The Times Group (2018-yil 22-oktyabr). Qaraldi: 2026-yil 4-noyabr.
  5. ↑ 5,0 5,1 „Taj Coromandel, Chennai relaunches Ballroom“. Mumbai: HospitalityBizIndia.com (2013-yil 24-iyun). Qaraldi: 2026-yil 4-noyabr.
  6. ↑ David Raj, C. R. „Taj Coromandel“. A Study on Employee Welfare Measure (on Major Specification in Canteen Facilities) with Special Reference to Taj Coromandel. Scribd.com. Qaraldi: 2026-yil 4-noyabr.
  7. ↑ 7,0 7,1 Achal, Archana. „Four tasty corners of the South“. Chennai: The Hindu (2012-yil 4-mart). Qaraldi: 2026-yil 4-noyabr.
  8. ↑ „Taj Coromandel Hotel, Chennai“. India Hotels Resorts. 2010-yil 31-avgustda asl nusxadan arxivlangan. Qaraldi: 2026-yil 4-noyabr.
  9. ↑ 9,0 9,1 George, Daniel P.. „City bids fond adieu to Clinton“ (2011-yil 22-iyul). Qaraldi: 2026-yil 4-noyabr.
  10. ↑ „Taj Coromandel“. The Finest Hotels of the World. Qaraldi: 2026-yil 4-noyabr.
  11. ↑ Muthalaly, Shonali. „A new approach to luxury“ (2010-yil 11-noyabr). Qaraldi: 2026-yil 4-noyabr.
  12. ↑ „Recreation and Facilities in Taj Coromandel, Chennai“. India Hotels Resorts. 2008-yil 3-dekabrda asl nusxadan arxivlangan. Qaraldi: 2026-yil 4-noyabr.
  13. ↑ „Best Luxury Hotels in Chennai“ (18-noyabr). Qaraldi: 2026-yil 4-noyabr.
  14. ↑ Kamath, Vinay. „The makeover of Taj Coromandel“. Chennai: The Hindu (2011-yil 16-noyabr). Qaraldi: 2026-yil 4-noyabr.
  15. ↑ CN Traveller „Chennai's best business hotels“. Condé Nast Traveller. CNTraveller.in (2011-yil 8-sentyabr). Qaraldi: 2026-yil 4-noyabr.
  16. ↑ „Hillary Clinton chooses to stay at Taj Coromandel, Chennai“. Indiainfoline.com (2011-yil 22-iyul). Qaraldi: 2026-yil 4-noyabr.
  17. ↑ „Taj Coromandel, Chennai bids farewell“. Chennai: ChennaiOnline.com (2013-yil 5-dekabr). 2013-yil 9-dekabrda asl nusxadan arxivlangan. Qaraldi: 2026-yil 4-noyabr.
  18. ↑ 18,0 18,1 „Six top IHCL Hotels in Chennai win honours at the IIHM-IHC London International Hospitality Day Awards 2023“ (2023-yil 28-iyun). Qaraldi: 2026-yil 4-noyabr.