Sud tizimi

Sud tizimi — muayyan davlatdagi barcha sudlarning yigʻindisi; ular umumiy vazifani bajaradi, odil sudlovni amalga oshirishga doir munosabatlar bilan oʻzaro bogʻlangan boʻladi. Sud tizimi boʻgʻinlarining har qaysisi vakolatlari bir xilda boʻlgan sudlardan tashkil topadi. Oʻzbekiston Respublikasida sud tizimi quyidagi sudlardan tashkil topgan: Oʻzbekiston Respublikasi Konstitutsiyaviy sudi; Oʻzbekiston Respublikasi Oliy sudi; Qoraqalpogʻiston Respublikasi fuqarolik va jinoyat ishlari boʻyicha oliy sudlari; fuqarolik va jinoyat ishlari boʻyicha viloyat va Toshkent shahar sudlari; fuqarolik ishlari boʻyicha tuman (shahar) sudlari; jinoyat ishlari boʻyicha tuman (shahar) sudlari; harbiy sudlar; (Oʻzbekiston Respublikasining „Sudlar toʻgʻrisida“gi qonunining 1-moddasi). Oʻzbekiston Respublikasida ishlarning toifalariga qarab sudlarning ixtisoslashuvi amalga oshirilishi mumkin. Sud — odil sudlovni amalga oshirishga haqli boʻlgan birdan — bir davlat hokimiyati organi.

Oʻzbekiston Respublikasida odil sudlov faqat sud tomonidan amalga oshiriladi. Oʻzbekiston Respublikasida sud hokimiyati qonun chiqaruvchi va ijro etuvchi hokimiyatdan, siyosiy partiyalardan, fuqarolik jamiyatining boshqa institutlaridan mustaqil holda ish yuritadi(Oʻzbekiston Respublikasi Konstitutsiyasi 130-modda).

Oʻzbekiston Respublikasida sud tizimi va sudlar faoliyatining tartibi qonun bilan belgilanadi. Favqulodda sudlar tuzishga yoʻl qoʻyilmaydi (Oʻzbekiston Respublikasi Konstitutsiyasi 131-modda).

Hamma sudlarda ishlar ochiq koʻriladi. Ishlarni yopiq majlisda tinglashga faqat qonunda belgilangan hollardagina yoʻl qoʻyiladi (Oʻzbekiston Respublikasi Konstitutsiyasi 137-modda).