Stephen T. Worland
| Stephen T. Worland | |
|---|---|
 | |
| Tavalludi |
1923-yil 19-fevral |
| Vafoti |
29-iyul 2017-yil (94 yoshda) |
| Kasbi | Iqtisodchi professor |
| Bolalari | 8 |
Stephen T. Worland (1923-yil 19-fevral — 2017-yil 29-iyul) — amerikalik iqtisodchi va University of Notre Dame professori boʻlgan. Uning ilmiy yoʻnalishlari iqtisodiy taʼlimotar tarixi va ijtimoiy iqtisodiyotini oʻz ichiga oladi. Worland 1967-yilda Notre Dame University Press tomonidan nashr etilgan Scholasticism and Welfare Economics kitobining muallifi hisoblanadi[1]. Shuningdek, u 1986-yilda Springer tomonidan chop etilgan Justice: Views from the Social Sciences kitobida „Economics and Justice“ bobini yozgan[2].
Biografiyasi
Worland Neoga, Illinois shahrida tugʻilgan va dastlabki taʼlimini shu yerda olgan. Ikkinchi jahon urushi davrida u Amerika Qoʻshma Shtatlari dengiz floti tarkibida USS Idaho (BB-42) jangovar kemasida xizmat qilgan[3].
U University of Illinoisdan iqtisodiyot boʻyicha bakalavr (B. A.) va doktorlik (PhD) darajalarini olgan. 1956-yilda yakunlangan dissertatsiyasi Thomas Aquinasning iqtisodiy qarashlariga bagʻishlangan.
Worland faoliyati davomida Michigan State University va University of Daytonda ishlagan, soʻng 1957-yilda University of Notre Damega qoʻshilgan va u yerda 30 yil davomida dars bergan. 1987-yilda u ikki yil davomida College of Saint Benedict and Saint Johnʼs Universityda iqtisodiyot va liberal sanʼatlar boʻyicha Clemens kafedrasining ilk egasi sifatida faoliyat yuritgan[4]. U 2017-yilda Columbus, Indianada vafot etgan[5].
Tadqiqotlari
Worlandning ilmiy ishlari iqtisodiy adolatni ijtimoiy va axloqiy tushuncha sifatida aniqlash va tushuntirishga qaratilgan[6]. U neoklassik farovonlik iqtisodiyoti tarafdori boʻlgan va Aristotle gʻoyalarini zamonaviy iqtisodiyot nuqtayi nazaridan tahlil qilgan[7].
Uning Scholasticism and Welfare Economics asarida farovonlik iqtisodiyoti va skolastik iqtisodiy tafakkur oʻrtasidagi falsafiy oʻxshashliklar koʻrsatib berilgan hamda iqtisodiy samaradorlik tushunchasining „adolatli narx“ doktrinasidagi oʻrni izohlangan[8].
Justice: Views from the Social Sciences kitobidagi bobida esa u klassik iqtisodiyot, marksizm va neoklassik iqtisodiyotni tahlil qilib, taqsimot adolati faqat ishlab chiqarishga qoʻshilgan hissa bilan cheklanib qolmasligi kerakligini taʼkidlagan[9].
Worlandning tadqiqotlari koʻpincha katolik ijtimoiy ta’limotiga bagʻishlangan. Masalan, uning 2001-yildagi Just Wages maqolasida ishchilar uchun yashash minimumi (living wage) tushunchasi yoritilgan[10].
1994-yilda u shunday fikr bildirgan: „Xristian iqtisodiyoti“ yoki „katolik iqtisodiyoti“ alohida fan sifatida mavjud boʻlmasligi kerak, ammo diniy qadriyatlar zamonaviy bozor iqtisodiyotini tushunishda muhim hissa qoʻshadi[11].
Oʻqitish falsafasi
Worland iqtisodiyot fanini shunday oʻqitish kerakligini taʼkidlagan ediki, talabalar faqat nazariya va matematik asoslarni emas, balki real hayotdagi adolatsizlik va inson taraqqiyoti muammolarini ham tushunishlari kerak.
1975-yilda u Notre Dame universitetida doktorlik dasturi ijtimoiy-iqtisodiy muammolar va ijtimoiy adolatga yoʻnaltirilgan holda qayta tashkil etilganini yozgan va bu yoʻnalish har bir iqtisodchi uchun muhim boʻlishi kerakligini taʼkidlagan[12].
Mukofotlari
1987-yilda Worland Reinhold Niebuhr mukofoti bilan taqdirlangan[13].
1993-yilda u Thomas F. Divine mukofotini olgan[14].
Manbalar
- ↑ Worland, Stephen T.. Scholasticism and Welfare Economics. University of Notre Dame Press, 1967.
- ↑ „Economics and Justice“, Justice: Views from the Social Sciences Ronald L. Cohen: . Springer, 1986.
- ↑ US Navy, USS Idaho Cruise Book, 1941–1945.
- ↑ „Stephen T. Worland Biography“. 2015-yil 23-sentyabrda asl nusxadan arxivlangan. Qaraldi: 2015-yil 11-avgust.
- ↑ „Stephen T. Worland“. The Republic (2017-yil 31-iyul). Qaraldi: 2017-yil 4-avgust.
- ↑ Worland, Stephen T. „Economics and Justice“, . Justice, 1986 — 47–84-bet.
- ↑ "Aristotle as a Welfare Economist". History of Political Economy 18 (3): 523–529. 1986. https://archive.org/details/sim_history-of-political-economy_fall-1986_18_3/page/522.
- ↑ "The Roots of Welfare Economics". Review of Social Economy 26 (2): 168–175. 1968.
- ↑ "Justice: Views from the Social Sciences Review". The Journal of Politics 51 (2): 439–441. 1989. https://archive.org/details/sim_journal-of-politics_1989-05_51_2/page/438.
- ↑ Worland, Stephen T. „Just Wages“ (2001).
- ↑ „The Right and the Good“ (1994). 2016-yil 5-martda asl nusxadan arxivlangan. Qaraldi: 2026-yil 10-aprel.
- ↑ "Doctoral programs in social economics and political economy — a note". Forum for Social Economics 5 (3): 35–36. 1975.
- ↑ „Reinhold Niebuhr Award“.
- ↑ „Thomas F. Divine Award“. 2019-yil 24-iyulda asl nusxadan arxivlangan. Qaraldi: 2026-yil 10-aprel.