Statsiya

Statsiya (lotincha: statio — joy, holat) — muayyan turdagi hayvon yashashi uchun zarur sharoit (relyef, iqlim, oziq, panajoy) mavjud boʻlgan joy. Tur uchun xos boʻlgan statsiya tur areali ichida mozaik taqsimlangan. Xususiy maʼnoda statsiya tushunchasi tur hayot kechirayotgan joyni bildiradi (oziqlanadigan statsiya, uya quradigan statsiya, tunash statsiyasi). Alohida statsiya boshqasidan relyefi, oʻsimliklari bilan farq qiladi. Tur, odatda, bir necha statsiyaga ega boʻladi. Turli statsiya turning hayotida har xil ahamiyatga ega. Masalan, qishlash statsiyasi hayvonni qishki sovuqdan asraydi; tarqalish statsiyasi turning koʻpayishi va katta maydonni egallashiga yordam beradi. Statsiya tushunchasi koʻproq quruklikda yashaydigan hayvonlarga nisbatan ishlatiladi va mazmunan yashash joyi tushunchasiga yaqin keladi.