Solovki orollari

Solovki orollari – Oq dengizdagi bir guruh orollar. Onega qoʻltigʻiga kiraverish joyida (RF Arxangelsk viloyati). Maydoni 347 km². Guruh tarkibiga 6 orol kiradi, yiriklari: Solovki, Anzer, Katta va Kichik Muksalma; kichiklari: Katta va Kichik Zayaskiy orollari. Eng baland joyi 107 m (Golgofa togʻi). Granit, gneyslardan tashkil topgan. Relyefi pastbaland tepaliklar. Koʻp qismi aralash oʻrmonlar bilan qoplangan, bir qismi botkrklashgan. Orollarda koʻl koʻp. XV asr boshida Solovki orollarida monastir barpo qilingan. Monastir XVI—XX asr boshlarida surgun joyi boʻlgan. 1923—39 yillarda, asosan, siyosiy mahbuslar uchun qattiq rejimli lager va turma joylashgan. 1991-yil monastir Rus pravoslav cherkoviga qaytarilgan. XVI asrda qurilgan monastir ovqatxonasi (trapeznaya), Preobrajeniye sobori, qalʼa devorlari saqlangan. 1974-yildan So. davlat tarixiy meʼmoriy va tabiat muzey qoʻriqxonasiga aylantirilgan.