Slovatskiy Yuliush

SLOVATSKIY (Slowacki) Yuliush (1809.4.9, Kremenets, Ternopol viloyati yaqinida – 1849.9.4, Parij; 1927-yilda uning xoki Krakovga koʻchirilgan) – polyak shoiri. Vilnyus universitetini tugatgan (1828). Dastlabki dostonlari („Gugo“ (1829); „Yan Beletskiy“ (1830) va boshqalar) romantik ruhda yozilgan. 1831-yildan muhojirlikda yashagan. Yaqin Sharq mamlakatlariga safari taassurotida „Neapoldan muqaddas joylarga sayohat“ (tugallanmagan, 1836—39) asarini yozgan. „Angelli“ (1838), „Shveysariyada“ (1839) kabi poetik asarlarida xalq qudrati va kelajagiga ishonchi ifodalangan. Slovatskiy polyak romantik teatri repertuarini yaratgan („Kordian“ (1834); „Gorshtinskiy“ (1835); „Xayolot“ (1841) va boshqalar). „Benyovskiy“ dostoni (tugallanmagan, 1841) koʻp yillik ijodiy izlanishlarining choʻqqisidir. Slovatskiyning falsafiy-tarixiy qarashlari uning tugallanmay qolgan „Qirol Ruh“ epopeyasida birmuncha aks etgan.