Siyroq

Siyroq — Qashqadaryo viloyati, G‘uzor tumanidagi qishloq va ariq. Siyroq — urug‘ nomi. O‘zbek xalqi tarkibida siyroqli urug‘i mavjudligi aniqlangan. Siyroq yoki siyroqli — bir etnonim hisoblanadi. Qo‘ng‘irotlar tortuvli bo‘limining to‘g‘iz urug‘i tarkibida siyroq urug‘ tarmog‘i mavjud. Tojikiston laqaylarida qorasiyroq urug‘i mavjudligi ma’lum, bu siyroq urug‘ining tarmog‘i hisoblanadi. Dehqonobod qo‘ng‘irotlari qo‘shtamg‘ali bo‘limining mavlish urug‘i tarkibida qo‘ysiyroq tarmog‘i aniqlangan. Qorasiyroq urug‘i qoraqalpoq va no‘g‘ay xalqlari tarkibida ham mavjud. Siyroq — umumturkiy etnonim va tamg‘a shakli. Qipchoq lahjalarida boldir suyagi, ya’ni odam oyog‘ining to‘piq bilan tizza oralig‘idagi suyak, siyroq deb ataladi. Tamg‘a shakli chiziq yoki uzun chiziq ko‘rinishida bo‘lgan. Tamg‘a shakliga nisbat berib urug‘ jamoasi nomlangan. Ariq qo‘ng‘irotlar esa urug‘ nomi bilan bog‘liq.